宇宙傳送門: 1.1

現時夜晚七點十八分，我終於返到屋企門口。

我準備係背囊拎條鎖匙出嚟「死痴線佬，阻我成十幾分鐘…」我自言自語。

「嗯？」我揾唔到條屋企鎖匙。

然後我揾晒身上所有嘅袋，但都揾唔到。係呢一刻，我諗起個靚仔版嘅我…「唉～唔會喇，應該係漏咗喺公司啫。」

於是我將份外賣掛係門柄，然後我踎低身，伸手入鐵閘同木門之間，揾其中一隻鞋。好彩我一向都收埋條後備鎖匙係呢隻鞋度。





開完兩道門之後，我將條後備鎖匙再次放返入隻鞋度。

入到屋，我將份外賣放係飯枱到。但我發現飯枱有啲嘢擒住咗，打開之後，見到係已經食咗幾餐嘅罐頭同冷飯「嗯？今日唔係返夜班咩？」

於是我打個電話俾我媽。

「喂？今日唔係返夜班咩？」

「喂？喔….唔係，我有啲嘢買，出咗去。返到屋企啦？枱面有啲嘢食㗎，你食住先啦。」電話嘅對面係我媽把聲。





「我見到。同埋今朝你撳錢嚟咩？成五萬喎，呢期嗰啲唔係還咗啦咩？」

「嗯….唔係吖，未還～。得啦，我好快返，你食住先啦。」

「…….哦。咁好啦。」我收咗線。

入房換咗件衫，之後開電視，諗住用嚟送飯。好彩買咗外賣，如果唔係又要食罐頭同冷飯。

「….報稱失蹤，同類失蹤案件已經係今個月嘅第十九宗，警方表….」電視聲。





開始食飯嘅同時又聽住新聞報導，但我對啲內容冇乜興趣，所以諗住開YouTube。

「叮噹～！」

呢個時候，門鐘響起。我唔使去睇貓眼都知係我媽返嚟，但佢都冇帶鎖匙咩？

我打開咗道木門之後，發現鐵閘已經係開咗。「做咩開開下門又唔開呀？」

我抬起頭，眼前嘅係一個男人，就係頭先嗰個痴線佬。

「Hi!」佢笑住咁同我打招呼。

「又係你…」佢忽然一腳踢咗落我個肚度！

我一下子俾佢踢返入屋，瞓咗係地下。雖然都痛，但歷經過無數痛苦嘅我，呢啲唔算得啲乜。





我諗住起返身嘅同時，佢一嘢坐咗落我身上面。

「999吓話？！」佢左手撳住我，右手一拳打落嚟我塊面！

「報警吓話？！」第二拳！

「最後警告吓話？！」第三拳！

去到第三拳佢停咗，回一回氣，環望一下我屋企之後，佢冷笑咗下。

「哼，仲係度自己呃自己。」第四拳！

四拳之後，佢企返起身。而我，瞓咗係地下，係頭先嘅十幾秒內，俾佢踢咗一腳，打咗四拳。





我諗正常人應該會頂唔緊，但我係由細到大都已經習慣咗。

不過，就算頂到都好，我嘅視線同聽覺都係會有啲模糊。隱約之間，我聽到個熟悉嘅聲音，係尖叫聲。

我努力咁企返起身，抺走啲鼻血，然後望過去尖叫聲嘅來源。等我眼前嘅畫面終於由低清變返做高清嘅時候，我望緊嘅方向係廚房，尖叫聲源至我媽。

我媽跪咗係廚房地下，雙手合十，個樣睇落好驚恐。而企係我媽面前嘅嗰個痴線佬，俯視住我媽，表情有啲微妙，佢右手已經攞住咗一把菜刀。

「一樣樣，仲竟然冇死，乜你唔憎佢㗎咩？」個痴線佬捉起我媽。

「喂！你想點呀？！」我喝住佢。

聽到我把聲，佢走去我媽後面，左手從後捉住我媽條頸，右手將菜刀刀尖打直指向我媽嘅下巴。

「唔係唔係唔係…，okay…okay…，你冷靜啲先。」眼前嘅光景令到我好不解，點解會咁？發夢吖？啲鼻血繼續流出嚟，但我都冇呢個精神去顧自己。





「嗯～？我睇落去好唔冷靜咩而家？」又係佢嗰個從容嘅笑容。

我望住佢對眼，望得出呢條友堅係痴撚線，我諗佢真係乜都做得出。但點解？點解係我哋？

「我同…，我哋會唔會有啲咩誤會？你想要啲咩？我可以俾晒你！你放低把刀先。」係我講嘢嘅同時，我眼前自己對手、聲帶都不由自主咁震緊。

個痴線佬開始移動把刀，係我媽面前舞嚟舞去。「我？同你？冇冇冇冇。但呢個女人有。」佢對眼向上望一望，諗咗諗「應該話呢個女人嘅存在令我好想佢死，而且佢都應該。」

我媽唔敢出聲，全身不停咁震，佢合埋咗雙眼，兩行眼淚係合眼嘅同時流咗出嚟。

「分享痛楚吓話？吓？」個痴線佬望住我媽，將把刀重新放返係下巴位置。

我好心急，同時又諗點解佢會講到呢啲嘢「我真係～唔，你先放咗我媽先，我哋再慢慢講。吓？」





「咩事呀？我聽到有人嗌喎！」呢個時候，由於屋企門口仲係處於打開嘅狀態，住係我隔離單位嘅李生行咗入嚟。

李生係我二十幾年嘅隔離鄰舍，我冇正式問過，但佢睇落去係三十幾歲左右。

李生望咗去廚房嘅方向「吓？！…你..你..你做咩呀？你..想點呀？放低把刀！」

個痴線佬用無奈嘅表情望向李生，但完全冇放低把刀嘅意願。

「你…你你唔放低把刀，我報警㗎！」李生手震住咁係佢褲袋攞咗部電話出嚟，打999。