我係一個精神科醫生，想分享吓執業十幾年嚟遇到過不可思議嘅人和事: 背景

係開始之前講返少少背景先，我一半時間會駐守精神病院，一半時間喺診所，所以重患或輕患病人都有機會接觸。

大部份住喺精神病院嘅患者都比較嚴重，但其實精神病並唔係好似大部份人諗到咁，大多數患者都係冇攻擊性而且其實冇病發嘅時候同正常人一樣，人嘅腦袋好複雜，患者都係困咗喺自己嘅世界走唔返出嚟，所以先要用到藥物或者科學嘅方法帶佢慢慢走返出嚟。

第一個分享嘅係正希嘅故事，抑或係正言嘅故事，我接觸正希嘅時候佢已經相對比較嚴重，佢大部份嘅事我都係從佢日記之中得知，所以佢嘅故事我會用第一人稱從佢嘅日記角度寫出嚟。

正希係我執業頭幾年遇到嘅患者，但絕對係我咁多年之中見過其中一單最不可思議同埋難忘，甚至有一刻令我相信靈魂嘅真確性。