由青梅竹馬開始: Agnes的分析

勤：其實我開始覺得件事唔太WORK。
Agnes：你指你同佢？
勤：係呀。
Agnes：點解呢？你應該恨左好耐至係架。
勤：我好大壓力。覺得配唔起佢。
Agnes：你好似話過佢叻過你？
勤：佢讀書叻過我、職位高過我、搵錢又多過我……
Agnes：佢有冇介意呀？
勤：佢冇話有。
Agnes：有冇FEEL到佢介意呀？


勤：咁又冇。
Agnes：咁你自己唔好介意就得啦。
勤：但係好難。例如我知我老竇係介意嘅。
Agnes：咁你老竇有冇叫搵過第二個呀？
勤：咁又冇。
Agnes：咁咪得囉。一切都係睇自己心態啫。
勤：咁簡單？
Agnes：勤呀……我好多謝你以前俾過好多快樂我。我都想你幸福。雖然我唔知你同佢點喺返埋一齊。但係既然兜兜轉轉咁多年都喺返埋一齊，就唔好咁容易放棄。
勤：我明。就算而家要我放棄，我都唔知點放棄。全世界都知我地訂左婚。Pre wedding都影左……
Agnes：呢啲都唔係最重要嘅。最重要係你同佢之間。以前唔鍾意嘅野，有冇改進呀？


勤：下，即係點？
Agnes：例如……你覺得以前散係乜野原因？
勤：我覺得佢諗左自己先，唔夠愛我。
Agnes：咁你而家仲覺唔覺佢係咁？
勤：又冇覺得嘅……
Agnes：咪係囉。只要兩個人搵到自己鍾意嘅相處方式，覺得舒服咪得囉。
勤：嗯……
 
勤也覺得Agnes的意見合理，也就不再在這個問題上糾纏。兩人可以聊別的話題。原來Agnes在懷孕不久就搬到東涌。這兒的單位大一點，可住得下一家三口加上外傭。而且她丈夫的父母也住在東涌。他們偶爾也可以幫忙照顧小朋友。Agnes之所以能見勤，也是因為她叫外傭帶了女兒到夫家那邊。不過，Agnes對於勤的感情事還是有不少興趣。
 


Agnes：你記唔記得，幾年前有一次你咪爭啲同琪琪喺返埋一齊。但最衰都係我，搵左你上我度。
勤：記得……我自己揀嘅。點會關你事？
Agnes：如果我冇搵你，可能嗰陣時你地就喺返埋一齊。而家結左婚生左仔啦。
勤：都唔一定嘅。
Agnes：好在你地都喺得返一齊。我罪孽都冇咁深重。但其實點解今次會喺得返一齊呢？
勤：我都唔知呀。我主動搵佢，佢又冇即刻拒絕我。我同阿妹講左個情況，佢話佢冇拒絕即係好有機。仲話我應該即刻求埋婚。佢話女人見到三字頭其實會好想結婚。我真係估唔到我阿妹係啱。
Agnes：咁你阿妹佢都幾醒。
勤：今次算係囉。
Agnes：咁你有冇同琪琪講我地啲野？
勤：梗係冇啦。點講得。
Agnes：都唔駛怕GA。你同我一齊時，你同佢都分開緊。我就唔講得我同你啲野俾我老公聽啫。但係我以前啲好亂嘅野，佢都知架。連你都知。
勤：可能我驚講左佢會好唔鍾意掛。況且我都唔覺得有需要講。佢又冇問。不過就算佢問，我都會話冇。
Agnes：咁你有冇問佢同你分開左之後啲野呀？
勤：我問過佢個死黨囉。冇直接問過佢。佢死黨話佢都冇同第二個一齊。
Agnes：你真係信？


勤：你覺得琪琪呃我？
Agnes：你都冇問過佢。佢冇得呃你噃。
勤：你覺得佢其實有過其他男朋友？
Agnes：正常應該有掛。佢咁嘅條件，冇其他男朋友先唔正常啦。
勤：咁又係。
Agnes：同埋好話唔好聽，個世界都仲係男人話事架。女人要撈得掂，基本上得三個可能性。
勤：乜野？
Agnes：一係就本身有後台，即係例如個老豆本身就係高層老闆。一係咪係靠出賣姿色出賣身體。講明先，唔係個個女人都有條件出賣呢啲。第三咪係佢個人真係真係要好叻，令你班男人冇得唔服，冇得唔升佢。你覺得琪琪係邊種？
勤：ER……
Agnes：佢應該唔係有後台嗰種嘛。咪得返兩個可能性。咁我梗希望佢真係好叻嗰種啦。
 
勤沒有回應，但顯然有點害怕琪琪實際上是靠出賣身體上位的人。他立刻想起多年前琪琪和CARSON之間的事。雖然琪琪堅持否認她和CARSON有過越軌行為，但琪琪真的沒有和那人一刀兩斷。是否她進入了職場也會這樣？Agnes見到勤的臉色有點變異，就安撫他：”喂你唔駛咁驚喎。我講下可能性啫。”
 
勤：你話我要唔要問下佢。
Agnes：問左安心啲你咪問囉。不過呢個世界大家有唔同相處方式啦。為左段關係，有時有啲野要犧牲下、妥協下、詐唔知……


勤：咁你而家有冇犧牲左啲乜呀？
Agnes：最大犧牲咪犧牲左你囉。
勤：我有咁重要咩？
Agnes：點會冇？你知唔知冇得俾你瀨，我幾唔開心。