由青梅竹馬開始: 破冰之後

剩下琪琪和勤兩人，尷尬的氣氛即時出現。勤努力思考應說甚麼話好，但還是琪琪主動出擊:“你呢排幾好嘛?”
 
勤對於應如何回應顯得有些不知所措。他想了想才答:“OK啦。你呢?”琪琪則說:“都冇話點。咪係返工放工咁。”

勤:你仲係喺以前嗰度做?

琪琪:係呀。不過都諗緊轉工。

勤:咁係咪好似以前咁成日ot?



琪琪:係。所以我都想轉工。

勤:成日ot咪好辛苦……

琪琪:係好鬼死辛苦至啱。所以咪想搵份早啲放工嘅工。

勤:以前我成日嫌你掛住返工唔得閒……唔好意思……

琪琪:過左去就算啦。



勤:但係……但係如果可以返轉頭，我估我唔會咁。

琪琪:但係冇得返轉頭嘛……

勤:我知……

琪琪:今日好日子唔好咁掃興啦。

勤:我放唔低……



琪琪:唔好咁啦……咁耐啦都……

勤:見返你我就覺得放唔低。

琪琪:唔好咁啦。今日唔係講呢啲野嘅時候……

勤:我明……
 
談到這裡，有姊妹團成員叫琪琪。琪琪就示意要去做其他事。勤望著琪琪的背影，一臉懊惱。其實之前一晚勤已經想清楚，希望趁今天向琪琪示好，所以就算要為過去的事認錯，他也不介意。何況過了這些日子，人長大了明白世事了，對琪琪的難處有更多理解。勤問自己：”如果自己可以不介意Agnes有另一半，但自己卻仍然怨琪琪只顧工作，又怎過得去？”當然，勤為免自己會太過失望，也沒有太大的期望。但當真的有會和琪琪破冰時，他所期待的又比起簡單幾句話更多。所以當琪琪離去時，勤又難掩失望。遠處的JOE見勤似乎有點惆悵，就走過來問勤怎麼樣。勤說：”冇呀。起碼講返幾句野囉。”JOE就回應：”慢慢來啦。仲有成晚。記得搵個機會送佢返屋企。”勤點頭。
之後貓趁新娘房又只得她和琪琪二人，就問琪琪剛才與勤談得如何。琪琪笑說：”佢話放唔低我喎！”貓見琪琪回應時面露笑容，就說：”你笑得咁開心！心動呀？”琪琪連忙否認：”痴線！我點會咁容易！只係覺得自己都有啲價值啫。”貓道：”你幾時冇價值過？個重點應該係，喺你心目中邊個人至有價值。其他人冇，但阿勤有。”琪琪笑而不語。事實上，對琪琪來說，令她欣慰的不是勤說自己沒有放下她，而是勤承認以往他真的有不對的地方。這幾年來，琪琪想起和勤的往事時，總比勤那個”自私”的指控困擾著。現在她覺得自己終於有機會不再受這冤屈。儘管這不代表她準備好重新接受勤，但起碼她對勤的芥蒂已少了一大半。
 
因此，在宴會中，琪琪不再刻意避開勤的目光，甚至會主動跟勤談幾句。琪琪的舉動令勤覺得有些希望。JOE和貓雖然忙於拍照和招呼親友，但也看在眼裡。一對新人就再三提醒勤不要放棄這個機會。宴會快將結束時，勤開始思考怎樣開口跟琪琪說要送她回家。他又想，如果琪琪說不需要，他又應怎麼辦？勤一直注視著琪琪的動態。當他終於見到琪琪身邊沒有人時，即趨前問：”咁夜啦。我送你返屋企好唔好？”琪琪沒有即時回應，令勤緊張得要命。他甚至想起當年他正式向琪琪示愛時等待琪琪回覆時的緊張心情。