由青梅竹馬開始: 晚餐

下午，琪琪工作到有點頭昏腦脹，想以零食補充腦力。她打開抽屜拿出那包kit kat，卻又覺得不捨得吃。她望著巧克力和貼在包裝上面的卡紙，一股久違了的情緒開始浮現。
除了 “甜”字，沒有字更適合形容琪琪的情緒。這個晚上，琪琪開始發現她經常想起東這幾天對她的關懷。但她不敢去思考自己是否動了情。
 
到星期四，琪琪在工作期間也開始不能完全專注。她經常留意走廊，看看東會否出現。當東在上午出現時，她掙扎是否要跟他到茶水間。但同時卻似乎有聲音告訴她女性要有矜持。她留在座位，等待東回程。東回程時與他四目交投。大家向對方報以一個微笑。這個過程已令琪琪高興了半小時。她因此亦憶起中學時期和勤曖昧時的情況。
下午，同樣的劇情再上演了一次。
 
晚上琪琪臨睡時開始想得更多。她動了情嗎?怎可能呢?她根本只與東獨處過幾分鐘，又怎可能喜歡了對方呢?但琪琪無法否認她為明天的約會緊張起來。要穿得特別點嗎?要打扮得美麗點嗎?思考了一輪，她決定像平日上班一樣算了，以免顯得太突兀。
 
約會天，琪琪又在辦公桌前等待東路過。但今次琪琪有主動找東的理由。琪琪追到茶水間:“你今晚想食乜野呀？"
 


東:冇所謂。你揀呀。
 
琪琪:咁等我諗下先。
 
東:我唔多野做。你走得話我知?
 
琪琪:好。
 
就在這時，有別的同事來到茶水間。琪琪和東就像滿有默契地裝作是毫不熟絡的同事一樣。
 


到三時多，陳生忽然跟部門內的同事說，五點半去附近的餐廳，讓大家在一個輕鬆的環境討論下工作。同事們私下議論紛紛，質疑是否因陳太另有約會，所以他們要為陳生解悶。同時，原有約會的同事也要通知別人。琪琪想打直線給東。但她拿起電話時又想:其他人聽到她的說話會否猜到她約了東?最後她決定走到東的部門。幸好東的辦公桌在走道旁，她趁無人留意，將紙條交給東，叫他到茶水間。琪琪在茶水間解釋了情況。東說他會自己邊閒逛邊等琪琪的電話。東順理成章將自己的電話號碼告訴了琪琪。
將近八點，陳生主持的聚會完結。大家各自回家和與友好約會。琪琪確認她視線範圍內沒有其他同事後就致電給東。原來東在附近的商場。琪琪提出到另一區吃晚餐，兩人在地鐵站會合，一起往月台走。
琪琪:唔好意思要你等我咁耐。
東:唔緊要。你阿頭好似都出左名麻煩。我呢啲small potato都知。
初次約會，難免有一些不自然。但在前往餐廳期間，兩人總能找到公司的八卦互相分享。
琪琪不想待薄東，選了一間比較高級和幽靜的西餐廳。入座時，已近九點。點餐後，琪琪擔憂東會追問她和勤的事，所以先發制人。
琪琪:你諗住喺公司長做?
東:諗住做到二月。都會再考a level。
琪琪:咁你開始溫返書未呀?
東:梗係未啦。


琪琪:其實咁樣都未必好。我唔知你屋企情況，可能要你返工幫補下。但我以前有個同學想考多次，好快發現一路返全職一路自修都唔會真係讀到書。
琪琪一路為東提供讀書的意見。但這個話題總有完結的時候。吃甜品時，東還是提起了琪琪不願提的事。
東：咁你而家同男朋友點呀？
琪琪：算分開左架啦。
東：算分開？即係仲有彎轉啦。
 
琪琪：冇架啦。我放棄左。我知佢都放棄左。只係爭在冇講清楚嗰兩個字啫。
東：可以咁拖泥帶水架？
琪琪：即係乜野意思呀？
東：我以為如果要分手都要講得好清楚添。
琪琪：唔係架。我兩次分開都係咁。
東：我就掉返轉，兩次分開都講得好清楚。
琪琪：嘩！你咁細個就咁多經驗。
 
東：同你一樣兩次啫。


琪琪：我兩次其實都係同一個人。
東：嘩！原來係復合咁浪漫呀？
琪琪：浪乜鬼漫呀？最後咪又係唔WORK。你咁細個就可以有兩個女朋友嘅？
東：講個秘密你聽呀。你唔好講俾人知喎。
琪琪：好。
東：一個係學校MISS。一個係中學師姐。
琪琪：下？
東：真架。
琪琪：師姐梗係OK 啦。MISS就真係太過……唔知點講。
東：MISS係我初戀添。師姐就喺佢上年升YEAR 2時分左手。
琪琪：唉……環境變呢，就好難維繫。我都係咁……
 
琪琪結帳後，和東離開餐廳。琪琪想上洗手間才乘車回家。她在洗手間時想：”弊啦。呢餐飯食得咁開心！我係咪真係動左情？而佢又好似鍾意姐姐，點算好？”昔日堅持要待勤表明的琪琪不會再採取主動，況且就算她肯定自己動了情，要接受比自己小四年的高考生一起，也未必可能。琪琪離開廁所，和東一起走向地鐵站。在月台上，琪琪準備和東道別：”我有車啦。你嗰邊至啱喎。BYE BYE。”但東甚麼都沒有說，跟了琪琪上車。