由青梅竹馬開始: 拂袖而去

翌日，勤也要復工。他早上等地鐵時在月台內巧遇同事Agnes。Agnes和勤在同一間分行工作，職銜一樣。但Agnes比勤早入職年半，算是勤的前輩。所以勤稱呼她做Agnes姐。

Agnes:你住呢頭架?
勤:係呀。
Agnes:我早幾日搬來架。
勤:你唔係下年嫁人咩?而家搬?
Agnes:係呀。下年先至擺酒註冊。不過早幾日搬埋左一齊住啦。
兩人進入較為多人的車廂，就不便交談。勤心中不禁羡慕著Agnes和她的男友修成正果。下車後，兩人一起到快餐店吃早餐。拿過食物坐下後Agnes問勤:“你放假有冇去邊度玩呀？”
勤:去左台北。
Agnes:同女朋友？


勤:係呀。
Agnes:咁咪好開心囉。我上次去旅行就係男朋友求婚呀。你去完旅行覺唔覺兩個人更加Close呢?
勤一臉苦惱地說:冇。仲差左。
Agnes:下?點解嘅?
勤:佢覺得我plan得差掛。咁真係唔係plan得最好。但都唔駛成日發脾氣。好似一啲都唔欣賞我咁。
Agnes:你地第幾次一齊去旅行呀?
勤:第一次。
Agnes:呀！早排我有個friend同個男仔拍左半年拖。好似好煙韌咁。點知第一次去完旅行返來就話唔夾要分手。希望你唔會係咁啦。
勤:希望唔會啦。但我地前晚返來後，都冇搵過對方。冷戰緊。
Agnes:咁你做男仔認少少低威搵返人先啦。有問題都要溝通解決嘅。



勤點了頭，就主動將話題轉移到枯燥的職場。
 
之後一天是星期五。勤在早上沒有碰到Agnes。但在下班前，Agnes特意問勤:“你搵返女朋友未呀?”勤示意沒有，Agnes就勸他:“冷戰得愈耐，感情就愈淡呀。星期五晚氣氛輕鬆啲，搵返人啦。有啲野唔拖得架。”勤聽過Agnes的話後心想：雖然自己對旅行發生的種種仍然生氣。但既然自己又不是要分手，那盡快找琪琪和好以及解除心結也是需要的。於是勤下班就乘車往琪琪辦公室的方向進發。在車上，勤打了兩次給琪琪，但都無人接聽。根據之前的經驗，琪琪應該還未下班。勤下車後慢慢走到接近辦公室樓下的地方，再打一次電話。不過琪琪還沒有接。勤在原地徘徊，打算過十分鐘後再找琪琪。五分鐘後，勤的電話卻先響起，找他的就是琪琪。
 
琪琪：你搵我？
勤：係呀。你今晚放工得唔得閒？
琪琪：可能都好夜至得喎。
勤：幾夜？
琪琪：唔知呀。


勤：我見到你噃。
琪琪：下？
勤：你望過來左手邊。
 
琪琪向左望，果然見到勤。她跟身旁的同事交待了幾句，就走到勤面前。
琪琪：你點會喺度嘅？
勤：想搵你傾下。
琪琪：我而家唔得喎。
勤：你唔係放左工呢咩？
琪琪：啲同事話去飲野呀。
勤：咁飲到幾點？
琪琪：我唔知呀。話唔埋架。遲啲先講好唔好？
勤：你唔覺得有啲野我地要傾下解決下咩？
琪琪：我都覺。但我而家唔得呀嘛。
勤：你又唔係有緊要野做。我都特登走來搵你啦。


琪琪：你都打橫來講嘅。你又冇事先約我。我隨傳隨到嘅咩而家？
勤：即係你同你啲同事飲野重要過我啦？
琪琪：邊有得咁講！我唔想喺條街到同你拗呀。做戲俾人睇咩？
 
琪琪轉身準備離去時，勤伸出手拉著她說：”而家唔傾就以後都唔好傾！”琪琪望一望勤，甩開他的手離開。勤只能無助地望著琪琪的背影遠去。