要愛情，定要麵包?: 19. 堅持要麵包的我們

我一度懷疑自己聽錯，所以我向佢確認一次
 
「阿思…妳話妳…悔左婚?」
 
佢望住我點一點頭
 
「妳唔結婚?」
 
佢再點一點頭
 




「發生咩事?係咪佢蝦妳呀?」
 
佢吸一吸氣
 
「佢對我唔差，只不過…係我自己問題」
 
「妳有咩問題?」
 
「自從返到黎之後，我諗左好多野」佢望住我又低一低頭
 




「結婚唔係一件小事，所以我再諗清楚。原來有個人…可以為左我而犧牲咁多野，佢一直係到等我搵我…如果佢唔係真心真意對我….佢絕對唔會咁做」
 
阿思佢坐埋我身邊攬住我
 
「所以為左我自己同佢幸福…我點都要做一次衰人」
 
阿思雙眼充滿淚水咁望住我
 
「所以我選擇悔婚」
 




我嘆左口氣
 
「妳咁又何苦呢?我過黎讀書，到考到牌，並唔係一時三刻嘅事，唔通要妳陪我一齊捱咩?」
 
「係!」佢眼神非常堅定
 
佢雙手捉住我
 
「今次到我黎照顧你，我唔介意係到養埋你」
 
我笑左一笑「我邊洗妳養呀傻女」
 
「唔….唔洗?」
 
「我係沙田間屋放左租，每個月嘅租金扣除供樓果筆，D錢會入落我戶口，我好快就轉到過黎」




 
「咁…我地兩個都要儲錢架嘛」
 
「儲錢做咩呀?」
 
「儲錢…我地結婚囉…」
 
我搣下佢塊面「傻女，妳恢復返哂先啦，係呢度醫生點講呀?」
 
「肝功能好好，你個肝非常健康」
 
「呵!當然啦」
 
「不過仲要食下藥咁」
 




我睇下佢D藥，無咩特別，多數係維他命同消炎止痛之類，已經唔洗食抗排斥藥
 
思思捉實我雙手「我地…就係呢度開始啦。今次冇人會阻到我地兩個」
 
「嗯」我攬到佢實一實
 
之後我再開始大學生讀書生涯，由PG變返UG，個感覺好特別
 
不過係澳洲讀大學同香港好唔同，人地唔會理你年紀有幾大，只要你會讀書就可以
 
而且我有多年配藥經驗，加上我好多藥理已經讀過，所以跟上進度並唔難
 
而我成績仲要唔差
 
每一晚，我都係書房溫書溫到好夜先返上床同思思瞓覺




 
有時佢攬住我問，我會唔會好辛苦
 
為左我地將來，點辛苦都係值得
 
係我地曳曳完果時，我同佢都望到肝臟上個位嘅淡淡疤痕
 
每次我地總係望住對方相擁而笑
 
三年後，我成功畢業同拎到藥劑師牌，同一時間，我地收到香港電視台嘅訪問邀請…
 
「咁陳先生，你認為你捐左個肝俾凌小姐之後，有冇咩得著呢?又問下凌小姐，妳之後價值觀有冇改到呢?」
 
「其實我果時冇諗過會有人捐肝俾我，但係…佢真係出現左」
 




「咁係唔係因為呢件事妳先會..同陳先生…」
 
「其實唔係嘅，當佢做完手術後，我返到醫院，我上司已經將藥劑學位資料俾我，我係過到黎澳洲佢收留我之後，我地先走埋一齊」
 
「咁即係而家要叫妳做陳太啦，咁都好恭喜你地兩個，希望你地小朋友會平安出世」
 
錢，係買唔到快樂，買唔到健康，買唔到回憶





-完-