要愛情，定要麵包?: 11. 多年後的重逢

Jacqueline行埋我身到推我一推「過去啦，Jessie一早就知道係你救佢」
 
係呢個情況下，我慢慢行近思思面前，佢抬起頭望住我
 
比起8年前嘅佢，消瘦左唔少，我單膝跪左佢面前，捉起佢隻手
 
「冇事啦，妳會健康咁生活落去」
 
「點解…點解要係你…」
 




「傻妹，有咩話點解唔點解，妳唔記得…我應承過妳要照顧妳保護妳咩?我嘅仙子，公主殿下」
 
「你….你好傻」
 
思思淚線忍唔住，眼淚不停咁流出黎。我唔可以喊，我點都要忍住，雖然呢8年黎我搵得佢好辛苦
 
「唔好喊公主，再喊唔靚女架啦，妳仲要做新娘子架嘛係唔係?」
 
「我…我…」
 




「妳未婚夫呢?」
 
「佢請唔到假，尋晚返左去澳洲」
 
「等妳好返，我飛過去參加妳婚禮好唔好?」
 
「點解…點解你要咁辛苦，明明…Jacqueline就係你身邊，我其他同學又鍾意你…點解你仲要對我…」
 
「世上冇話邊個代替邊個，我鍾意果個係妳，永遠都係」
 




「對唔住…我扔低左你…」
 
終於我再一次攬住思思，佢係我懷內不停喊同道歉
 
不過我係時間離開佢啦，相處太耐，我都會忍唔住。我錫左佢額頭一下，再摸一摸佢個頭
 
「做人老婆啦，乖乖地，到時我再去澳洲觀禮啦」
 
我地相處一陣，醫生就要Jessie返病房休息
 
而我就繼續俾屋企煩住下，走左入office，幾經辛苦，終於擺脫呢班人
 
就係我出院第二日，我就繼續返藥房坐下
 
「Clarence，你唔休息多陣?」




 
「唔啦，我工作狂黎架嘛」
 
又係rush hour時間，雖然我返到黎，不過大家仍然為我分擔工作
 
「Clarence，加護病房呢張單你負責處理，送埋上去」
 
「送上去?應該係P做喎」
 
「你睇下病人個名，之後你決定上唔上去啦」
 
病人：凌慧思
 
「老總，我送上去之後，病人可能會捉住我喎」
 




「俾你上去休息下呀，唔洗受到屋企人電話騷擾」
 
一聽見屋企人同女朋友呢幾個字，我個頭又開始痛。自從我reject左凌sir張支票之後，屋企同Candy都經常煩我
 
我帶住思思嘅藥，上去加護病房，當時思思合上雙眼休息，佢已經比之前退左黃，咁樣就證明我個肝係佢體內開始正常運作
 
「同事，請問你…」
 
「呀…呢到係凌小姐嘅藥，Mycophenolate Mofetil 250mg、Tacrolimus 5mg、Prednisolone 5mg，抗排斥三文治，麻煩姑娘對一對」
 
姑娘好細心咁Check藥名、份量，然後再check藥劑師簽名後，自己簽名，再加埋我簽名
 
正當我轉身離開之時，同事叫停左我
 
「Clarence…你唔留低陪下凌小姐?」




 
「唔需要啦，我地兩個成日見面唔太好，一黎影響工作，二黎影響其他病人」
 
「你真係好偉大，為左自己鍾意嘅人，可以唔怕危險捐肝，仲可以拒絕一張大額支票而家你係醫院好出名啦」
 
我真係唔明白點解我會咁出名，其實我只係做左我應該做嘅事，身為醫護人員，去拯救性命，好正常不過者
 
送完藥後我返到埋自己位，就發現有一疊資料放左係我檯面，係外國大學藥劑學位資料。我抬一抬頭望老總睇下佢係唔係位。