要愛情，定要麵包?: 5. 舊朋友的探訪

第二朝我係藥房衝完一大輪，然後就執齊哂個人野，去病房報到。有好多同事都黎同我講，叫我放鬆
 
我自己坐係病床之上休息，計劃緊婚禮嘅事。睇返婚禮上嘅野，根本全部都唔係我想要嘅野，擺酒，係女家果邊同老人家要求，我永遠一多人就會頭痛，每當我諗返起IVE頭兩年，同阿思兩個人係杏花村海邊吹海風行石駁嘅日子，真係好開心。自從畢業之後，我都好多年冇返杏花村吹海風，因為Candy係果種要行商場嘅人，要佢去陪我去郊外、吹海風，佢會想死
 
手術需時差唔多12小時，漫長嘅12小時我需要瞓係手術室內
 
但係紙永遠都係包唔住火，病房文員係做手術前打電話去我屋企，問家屬會唔會陪我一晚。然後，然後就通哂天，家屬真係黎陪我，仲要係全家果隻
 
「你有病呀?無啦啦捐個肝俾人」
 




「你個肝俾左人地，將來我地需要咁點算呀?唔准捐!!」
 
「你而家好慷慨咩?你講!!對方俾幾多錢你要你個肝，冇五百萬唔洗諗」
 
當一講到錢之後，佢地又係到傾點分錢
 
「買多兩個單位收租，有剩再買股票就最好嘅!!」
 
而當Candy屋企知道我「有」五百萬之後，佢地要求嘅禮金就再要加，場面再豪華d，仲要包埋女家鄉下親戚酒店費用
 




我就係呢個家庭中長大，佢地凡事都係講錢、錢、錢
 
係手術開始前嘅晚上，我俾一大班親戚嘈到好攰，所以我再次靜靜地一個人去到ICU偷望下阿思，可能佢知道有人會掃個肝俾佢，所以佢瞓得好好。其實打從電視上播出妳需要換肝嘅消息嘅時候，已經有個傻小子決定捐個肝俾妳，所以妳自己唔需要太擔心。
 
我係咪好傻?將自己個肝送俾妳，然後睇住妳披上婚紗行紅地氈嫁俾其他人，同其他人組織家庭、生小朋友。果一刻好想拒絕捐個肝俾妳，好想睇住妳永遠嫁唔到俾其他人，但係咁樣真係好?咁樣咀咒妳真係好?如果當初我堅定D過黎搵妳，我地結果會變成點呢?企係妳身邊果個會唔會係我呢?
 
諗到咁樣，我自己一個人行出去戶外，拎住我最心愛嘅可樂
 
「Clarence，我早就估到係你」
 




「Jac…Jacqueline?妳點解會…」
 
「早上Jessie爸爸通知學校，話有位姓陳先生願意捐出肝臟，當時我地成班只係諗到你；姓陳，仲要咁快決定捐個肝出黎救Jessie嘅人，世界上只有你一個，只有你一個人會為Jessie犧牲咁多，無條件咁為佢付出」
 
「好傻係唔係?明知捐左個肝俾佢之後，佢就會返澳洲嫁俾人、同人生小朋友，但係我仍然要捐俾佢」
 
「你仲係好似以前咁，仍然咁愛Jessie，為左佢，你做咩都可以」
 
Jacqueline坐係我身邊拎走我罐可樂自己飲。呢個女仔，好瞭解我，第一次見佢果時，佢已經知道我同阿思之間嘅關係
 
「喂!」
 
「可樂要沒收!你準備做手術」
 
我同Jacqueline坐係椅上望住天空，大家可能會問，點解之前唔搵佢幫我搵Jessie。原因好簡單，我冇佢地聯絡方法，但係佢地又知道我嘅存在