巴士上的那個女孩 (SM?甜故?): 《第拾章》

又係一個平靜既晚上。
自己一個坐喺返歸既巴上上面，聽住歌，望住街既風景。
但係個心有啲矛盾。一邊係巴士女神，一邊係小美。
巴士女神既冷酷同貼地絕對係我好鍾意既類型。
小美同我個ex真係好相似，嗰種小鳥依人既感覺…無辜既眼神勾起既我心底既保護慾。
『喂，痴漢先生，諗咩諗到咁入神啊？』
巴士女神一下就坐咗喺我隔離。
『喂喂喂，妳講咩啊…都話我唔係痴漢。有名妳叫㗎！我叫阿Jack啊！』
『係啦係啦，做咩啊，諗緊上次被人非禮嗰個女仔啊？』
點答啊…


係咪咁準啊女人啲第六感。
雖然有一半係諗緊佢，但係唔通答佢我都有諗緊妳咩。
『無啦，攰啊，發下吽哣啫。妳到底叫咩名啫？』
『我叫 Carmen 啊。做咩成日想知我叫咩名啫…嗰個女仔咪幾好囉。唔好暗戀我啦～』
『頂妳啦…鬼得閒暗戀妳啊，宜家啲港女咁自戀㗎咩？』
『喂，你要落車啦，仲講？』
仆街，係喎。
『喂，下次問妳拎whatsapp 啊～』
『傻仔，下次先啦～』
我九秒九街咗落車，如果唔係又會被人閂門之後又嘈落唔到車㗎啦。


一落咗車嗰刻，我諗到一個好重要既問題…
點解佢會知我幾時落車㗎？
唔通佢一直都有留意我？
哈哈哈哈哈，我就好似係傻佬咁喪笑，但係同時亦都係打心底咁笑出嚟。
我好似有聽到有人講咗句…『傻仔。』
（叮～你有條新訊息～）
（Jack，救命啊！）
（喂，搞咩啊妳？）
（小美？）
（喂，唔好一句救命就唔見人好喎！）


我極快食完個飯，就不停咁打畀小美。
（我喺諾士佛臺）
一收到呢個短訊，我就仆街咁仆過去。
喂…大姐啊，講埋喺邊間好唔好啊…
我唯有逐間酒吧去搵啦…
終於…終於…畀我見到佢啦！！！