人妻出軌的二三事: 1 「一點綠」1
「今日你阿媽生日，你難得返早更，放咗工就早啲到啦！」
我一面幫囡囡梳頭紥辮，一面同啱啱起身，喺房出嚟嘅老公講。
「妖，你老公班所謂同事，個個好似隻狗咁奶老細呀，你唔係唔知嘛，我點話得埋啫！」
佢打幾個喊露，走埋嚟摸吓囡囡塊面，又撥吓佢啲頭髮。
「點話得埋？！你放咗工唔同人去飲酒，唔上嗰個女人度，咪話得埋囉！話晒係你阿媽生日，唔係我阿媽生日呀，你玩少一晚駛死咩！」
我撥開佢隻手，啱啱同囡囡梳順啲頭髮，準備紥辮，佢撥亂晒，要再梳過。
「我同老頂去飲酒吹水，係拉關係呀，你想唔想老公扎職呀？我唔喺出面博殺，你同阿女有咁舒服咩！」
每次講起嗰個女人，佢都唔敢正面回應，淨係避開唔講。
「三個人逼喺嗰有、百零呎公屋有幾舒服呀？唔同你講咁多，我趕住湊囡囡返學，總之你今晚一定要到，唔好要我替你喺班姨媽姑姐面前諗藉口，講大話。」
我十九歲同佢未結婚就搞大咗個肚，到而家個囡囡四歲幾，我都係一直湊住個女，唔駛喺出面捱，睇老闆面口，相嗌唔好口，我講就咁講啫，而家住緊百零呎嘅公屋，我哋三個人亦都夠晒，好過人哋住劏房，捱貴租，我都知足嘅。
老公做嗰間公司，升職加人工到確實係由老闆話事，雖然好黑暗，不過佢咁低學歷，有咁高人工，所以我想佢想轉行都係得個講字，我理解佢要應酬拉關係，不過應酬只係借口，佢成日去滾，最近仲識咗個唔三唔四嘅女人就真。
近嚟同佢好日都唔慌講多幾句，一講就嗌交咁，我都唔理得咁多，講完就如常趕喉趕命咁送囡囡返學校。
～～～～
今日又見到佢嘞，喺一大群接送仔女返放學嘅師奶、太太嘅女人堆裡面，一個成日拖住個幾歲大囝囝嘅男人的確係比較突出。
我住得遠，怕遲到，每朝預咗好鬆動時間，所以好早就到學校，我又唔喜歡八卦，通常囡囡入咗班房，我就離開學校，佢可能遲啲啦，所以唔係成日同佢碰到頭。
到底係咪佢呢？
我心裏面諗。
點解我會咁問自己呢，因為喺我哋學生家長聊天群組裡面，有一個好積極參與嘅男人，無論係學校發生乜嘢大小事情，學校校政嘅事項，佢一定積極留言唔在講，有時甚至成班女人得閒得滯，講吓湊仔、煮飯、娛樂新聞呢啲女人經，佢間唔中都會發吓言。
起初班師奶家長無乜點理佢，唔多回應佢嘅留言，但係佢又唔介意咁，個個唔理佢一件事，佢有佢自己講，整整吓有幾個家長開始回應佢，我間唔中都會問吓佢升小學派位嘅嘢。
如果將女人比喻為紅色，佢就係萬紅叢中嘅一點綠，哈哈，我笑起上嚟。
男人之家得閒到日日帶個仔返學放學，懷疑佢係咪失業，定係有咩問題，靠老婆搵錢之類，有啲可憐佢，引起我女人嘅八卦天性，想發掘多啲佢嘅資料。
不過喺個群組裡面，我係唔活躍嘅一個，無乜人會留意到我，而「一點綠」嘅頭像係一個卡通人物，我確認唔到而家見到呢個男人，係咪群組裡面嗰個「一點綠」。
～～～～
囡囡每朝返三個鐘頭學，我又住得遠，每程車都要成個鐘頭，我費事返去屋企一陣間又要出嚟接放學，又嘥時間，又嘥車錢，所以每朝都係喺學校附近唯一一個商場裡面行一陣，又或者食個早餐，坐到夠鐘，每日都係無無聊聊咁消磨幾個鐘。
遇啱過幾日商場裡面一間大型百貨公司做特賣，好多臨時工喺度食完早餐，跟住開工，我捧住盤早餐好辛苦先搵到一張吉枱。
「我可唔可以坐呀？」
我慢慢嘆杯咖啡，耷低頭全副精神轆手機，有把男人聲問我。
「喔～」
我抬起頭，個男人正係今朝我喺學校門口留意嗰個。
「你係Tracy媽咪？我係天誠嘅爸爸，我哋喺群組裡面有傾偈㗎！」
我喺群組用大頭相做頭像，可能因為咁，佢認得我。
怕我誤會佢搭訕，主動表明身份，跟住就坐喺我對面。
果然係佢，女人堆中嘅「一點綠」，今次係我哋第一次喺呢個商場裡面同佢碰面。
我點頭同佢笑吓，就繼續耷低頭轆我嘅手機，不過我知道佢耐不耐就偷偷望吓我，尤其係領口露咗出嚟嘅事業線。
我無嬲佢，因為佢俾番少少自信心我，我仲有啲咁多嘅吸引力。
我今年先得嗰廿四歲，一向都俾人讚我靚女，就算生完囡囡，身材都一直保養得幾好，三十四、二十六，條腰係粗咗少少，不過做咗媽咪，上圍都升咗cup，由 C升去D，襯落條腰都唔覺好肥。
只不過老公呢兩三年因為做嘢，成日黐埋啲唔三唔四嘅女人度，最近仲搭上咗個酒吧拳手，兩三個星期都唔掂我一次，搞到我以為自己變咗做黃面婆，無晒自信心。
～～～～
今朝俾「一點綠」偷睇過個波，加上今晚奶奶生日，飲咗啲酒，好想搞吓嘢。
等囡囡瞓着咗，我沖好晒涼，又特登揀件半透嘅睡袍，上到床仲好下氣咁主動攬住老公，又錫佢個面，又錫佢條頸，又伸手落佢啫啫度，點知佢應酬式咁揸幾吓我對波，就擰轉埋身，背住瞓覺。
「你有無數過幾耐無掂我？」
「發咩姣啫，聽朝要返早呀！」
「你咪以為我唔知你喺出面啲嘢，你喺出面滾，唔理我，我痕起上嚟，都可以好似你咁㗎！」
我唔知邊度嚟嘅勇氣，竟然咁講。
「哈哈，你去滾？！你男人都唔見多個，成日玩住部手機，知唔知有咩交友網呀？出去滾！哈哈，溝到咩麻甩佬記住話俾我知喎。」
老公咁睇小我係有原因，同佢生咗囡囡之後，我就疊埋心水，專心湊女，每日買餸煮飯做家務，得閒就揸住部手機煲劇，人都唔識多個，到囡囡上咗幼稚園，先叫做加入個家長群組，同人傾吓學校嘅嘢，邊度有資格講出軌。