我係香港最後一個冇打針嘅人: 七/洛城南站

「你休想！」翻版林明禎好嬲咁吐咗啖口水落阿瓏塊面到，佢又幾有骨氣架喎，本身仲以為佢個樣睇落咁可愛應該唔係好受得住呢啲，點知仲有勇氣去反抗。

「你咁快又唔記得咗拿？」阿瓏氣定神閒咁拎咗枝針灸用嘅銀針出來，翻版林明禎見到即刻露出驚恐嘅眼神，話：「我..我幫你們…可是你們下不了車的。」

「你依家叫架車係下一個可以停嘅站到停低，我地落車。」

「可是我不認識車長…」

阿瓏用枝銀針輕輕咁滑過翻版林明禎嘅右邊面頰，好温柔咁話：「咁算啦，我同你係呢到，慢，慢，玩。」講完，佢就拎著枝針對著翻版林明禎條頸，翻版林明禎即刻話：「好好好！我叫，我叫。」





「咁先乖架嘛。」阿瓏企番起身，走咗去辦公枱到拎咗個無線電話去翻版林明禎面前，問：「幾多號電話？」

「…*601」阿瓏開住個電話擴音打咗呢個號碼，再伸去翻版林明禎嘴邊，電話入面傳來一陣「嘟—嘟—嘟」聲，過咗陣就有把女聲接咗電話：「請報上名字，職銜，還有專屬編號。」

「…林湘湘，疫苗防控第一組執行副隊，18072。」

「…確認完畢，林副隊，請問有什麼需要報告？」

翻版林明禎，都係叫番佢真名啦，林湘湘望咗望阿瓏之後就答：「1080在運送途中出現中毒狀況，申請提早轉移至防控中心。」





「好的，請稍等，現在會立刻請示上頭指令。」之後又變番啲「嘟—嘟—嘟」聲。

林湘湘用運送來形容我，講到我好似貨物咁，係佢地眼中我呢啲「犯咗事」嘅人真係連人都唔配做咩？不過諗番佢地對我都算幾好，仲以為會好似睇戲一樣個囚犯受咗傷或者病咗就會放埋一二面等佢自生自滅。我一出事林湘湘就即刻趕過來，仲要解埋我對手扣，平時明明食飯痾屎訓覺我地都要戴著，不過亦都係因為咁阿瓏先可以咁順利進行佢嘅計劃。頭先阿瓏講嘅谷針陰謀又係啲咩呢？「燎」呢個組織嘅人全部都冇打過針，咁即係代表佢地應該有人喺政府度做臥底幫佢地攪晒啲針卡記錄，連呢個小劉都係組織嘅人，究竟佢地呢個組織有幾多臥底，滲透咗落幾多個政府部門度？同埋我都唔知依家叫好定唔好…好嘅係我可以唔洗喺監獄島度渡過我嘅下半世，但唔好嘅係我根本唔知之後會發生咩事，一陣未去到就俾人亂槍射死…我仲有好多嘢諗唔通，唉，頭都爆…

把女聲又番番來，佢話：「林副隊，上頭批准提早轉移1080至防控中心，新月號會在10分鐘後停在洛城南站，下車後會有軍車接送你們。」

「好的。」然後就收咗線。阿瓏放番個電話去張枱到，同小劉講：「照計劃行事。」小劉除咗冇戴眼鏡條𡃁嘅衫褲俾咗阿瓏著，再穿番阿瓏啲衫上條𡃁到，之後拖咗佢去啡櫃入面。

我問：「咁…咁佢地咪會揾唔到你囉，頭先林湘湘剩係話帶我一個炸喎。」





阿瓏就答我：「一個半個囚犯死咗根本冇人會理，佢地喺落車啲時候就會揾到佢。」

「死咗？佢都未死？」

阿瓏行咗過去，插咗一插枝銀針落冇戴眼鏡條𡃁嘅頸部大動脈，過咗十秒之後佢全身抽搐，反白眼同開始嘔白泡，然後就冇再郁過。阿瓏笑著咁講：「咁咪死咗囉，小劉，攪掂埋啲手尾。」之後小劉拎咗一把小巧嘅萬用刀出來，開始刮花佢塊面，喺傷痕到流出來嘅血仲要係紫紫地色，見到呢個咁嘔心嘅畫面我個胃又開始翻騰，我即刻擰轉頭去另一面唔睇住佢做啲咁嘔心嘅嘢，我見林湘湘都唔忍心見到自己嘅下屬俾人咁樣糟質，合埋咗對眼。

攪掂好晒啲「手尾」之後，阿瓏拍咗拍林湘湘嘅膊頭示意佢擘大番對眼，再同佢講：「我依家會幫你鬆綁，如果你諗著偷走或者做啲咩小動作我保證你會死得比佢痛苦十倍。」林湘湘果然係俾頭先死得咁慘嘅嗰條𡃁嚇親，鬆咗綁都照坐係原地到郁都唔郁。阿瓏真係好恐怖，佢會唔會去到防控中心覺得我冇利用價值就毒死我，諗諗下我都打咗個冷震，但係我冇得簡只可以跟佢地行，希望上天保佑等我唔好英年早逝…

火車突然開始減速，睇來我地已經到咗洛城南站，小劉想扶起林湘湘，但係林湘湘即刻推開咗佢自己戰戰慄慄咁扶住牆企起身。阿瓏伸出一隻手向門口，好似啲紳士讓淑女行先咁，講咗句「請。」林湘湘慢慢打開咗醫務室嘅門行咗出去，阿瓏同小劉一人捉著我一邊手臂同我一齊行出門口。