好人卡太多 所以愛神憐憫我?: 5.4

 
「呀蚊？」我拎起電話
 
「呀明…點呀…你搵到靚靚未？」呀蚊既聲線入面帶住幾分惶恐
 
「岩岩搵到，佢冇事。依家番緊黎…不如喺M記等？」
 
「好…我等你…」
 
假如我接受左Judy…




呀蚊會點對我同Judy呢…
當佢聽到我講同佢個好姊妹一齊左…
而且成頂帽咁戴住…
呀蚊點會原諒我地…
好彩…
我相信自己既心意會帶我去一條正確既道路….
 
「Judy…上黎啦…」我指住自己部單車
 
「坐…坐你後面？」Judy好似會錯意




 
「我意思係見你部單車唔見左，要行番去呀蚊嗰頭要好遠…所以你上車啦…」
 
「哦…」
Judy略帶失意坐左喺我後面
 
「Judy…我地…永遠都會係好朋友…」我小心翼翼咁講
 
「嗯…明嫁啦…不過都係嗰句…我唔會咁易放棄…幸福係要自己爭取。」
 




的確…幸福係要自己爭取…
機會一旦離去，真係喊都冇用…
 
我再冇理會佢…
唔係因為我嬲左佢…
而係我怕再講會更加hurt到Judy…
 
眼前風光依然…
但情感上已經有好大既變化…
 
「嗯…? 」我慄左一慄
Judy又再次將成個心口貼實我…
雙手再一次環抱住我…
 
「Judy…我講得好清楚…」我即刻解釋




 
「呀明…比我攬多你一陣…今次之後…我可能再冇機會同你有咁既接觸…我真係好鐘意你…」Judy喺我耳邊噴氣
 
可能…我欠Judy已經太多…
我真係唔想連依個少少要要求都拒絕…
我諗依一刻就係我補償佢既時間…
 
「見到呀蚊佢地就放手啦…」我語重心長
 
「嗯…」Judy依然緊緊咁環抱住我
 
我知道…之後我同佢唔會再提起今日既事…
 
愛情要完結的時候自會完結。
到時候，命運自會畫上句號。




 
愛一個人很難，
但要讓對方明暸你愛一個人更難。
 
對不起…Judy…