《屍河明居鑽石山》（是咁的，我發現打喪屍有得升呢）: 522

522

「係燈柱後面個草叢！」

企喺外牆上噴緊滅火筒嗰個人大嗌，「啲喪屍衝破咗個鐵絲網走咗入嚟！搵人頂住，唔可以俾佢哋喺入面四圍走！」

好幾條喪屍已經跟住爬緊上簷蓬，目標都係個槍手？

我用《無痕者》能有遠遠一聞……佢應該係現場唯一身上冇噴殺蟲水嗰個！





「Jason！」

我唔理得咁多，嗌咗Jason一聲，自己就衝咗上前！我跨上大門嗰幾級樓梯，向住喪屍爬緊上去嗰條簷蓬柱，攬步一衝！

喺S.A.M.長開嘅狀態下……

原始腦本能！

我踩住啲喪屍踭上去，連躍三步之後，揸實支警棍，朝住爬到最上嗰條喪屍，當頭扑落去！





頭顱炸開！

而我趁呢條喪屍氣力一鬆，支警棍從佢腋下穿過，扣實佢胸口，然後死力向下一掹！

將佢連同下面嗰幾隻喪屍，好似剝皮咁從條柱度剝咗落嚟！

四、五條喪屍撻咗喺地！

然後我自動波咁，逐條喪屍一棍扑頭，然後另一手就探入去摘眼……呢批都係新死嘅喪屍，頭骨好硬，唔用武器唔得。





我扑到第四隻到，支棍已經有啲『拗擰』。

我揪起最後嗰條作勢想扑，抬頭一望，見到拎住塊防暴盾嘅Jason，呆哂咁望住我。

「分一隻俾你？」我話。

Jason起勢咁搖頭。

咁我唔客氣。

搞掂咗呢幾隻，身後不遠傳嚟喪屍跌落地下嘅聲響。

「夠膽掹我？仆街啦你！」

砰！





原來個槍手自己踢返掹佢條喪屍落嚟，嬲得滯轟咗一槍霰彈俾佢嘆！

但係咁近都射歪！只係大半個肚爆咗，仲識郁！

我舉手叫佢唔好再開槍，然後先走埋佢扑頭執雞。

「你哋冇俾流彈打中嘛？」個槍手仲好唔好意思。

「有。」

Jason個盾上面，有幾點冒緊煙，「Training講到明霰散嘅射擊目標，唔可以係醫院範圍內。」

當時佢及時舉起個盾擋住咗喺我身後。





「下次唔會！」

個槍手唔敢怠慢，即刻拎支殺蟲水嚟狂噴上身，「係我衰，當值做Sniper就唔噴嘢，但係啲《黑旋風》真係好『那』皮膚，每次噴完Up通宵都好痛……」

「我記得阿詠叫你『朗天』？」

「拖你落水唔好意思，但我哋真係搞唔掂……你睇吓有冇辦法，拖返Kiki落嚟！」

「咁落去，大家攬炒！」

我點點頭，再同Jason耍咗個眼色。

一齊衝向條燈柱！

首先要解決咗燈柱後方，啲喪屍捐草叢漏入嚟嘅大問題！





而家有個滅火筒人，由另一邊調咗過去，對住個窿狂噴！另外有個人一手拎防暴盾，用嚟扳啲衝咗入嚟嘅喪屍，另一隻手仲得閒執起啲倒塌咗嘅樹幹，諗住塞返住個窿！

呢啲就係《建設者》？蠻力肉盾？

但係支滅火筒已經噴完，啲喪屍仲係咁捐入嚟，嗰條友諗緊扔唔扔氣油彈……

「唔好扔啊！」

喺街壘上面守住Kiki嗰個人話，「陣間燒著啲樹，成間醫院俾你燒埋！」

「等我嚟！」

我搶過嗰支由青島啤酒整出嚟嘅氣油彈！





「我幫你開路！」

Jason撐起防暴盾，「係咪向住鐵絲網個窿衝過去就得？」

我望咗一圈。

「順手過一過嗰邊先！」我指咗指街壘一旁，樹叢前嘅物資囤積處。

我哋就好似冒住槍林彈雨咁，喺啲滅火泡沫，濺血，屍液之間，喺個大盾下方彎腰跑過，去到物資堆度，我一手又攬多幾支氣油彈！

「好！跟住衝入去！」

我搭住Jason膊頭，等佢硬衝入去個樹叢入面！

當中有兩、三條喪屍跨越稀疏的植物而過，有啲係要襲擊另外一個《建設者》，有啲係俾嗰個《建設者》用盾扳飛跌過嚟嘅。

「唔好俾佢哋拖住！」

我同Jason講，「全部推哂佢哋出去！」

「好！啊啊啊啊啊……！」Jason大嗌起上嚟，推力提升咗！我甚至感覺佢膊頭啲肌肉實咗咁突出嚟！全身肌肉都係！

甚至，為咗幫另一個建設者解圍，Jason有心用佢個盾，兜埋側邊啲喪屍……最終佢用個盾頂住足足五條喪屍，就憑一口蠻力推去鐵絲網個窿度！

「嗚！」

臨到個窿前面，幾條喪屍合力抓住個鐵絲網邊，推唔出！

而且好快外邊有另一啲喪屍幫拖！令Jason想掹返個盾入嚟都唔得，甚至反過嚟要將佢掹出去！

Jason谷到面都紅哂，死頂！

但出面已經成十幾條喪屍係咁拖係咁扯……

「我嚟幫你！」

我一手搭落盾背個把手度。

暴走者！

我全力向後一揪，扯到班喪屍失哂平衡，再全力將個盾推出去！

啲喪屍跌成一堆！

然後我火駁火，將啲氣油彈由個窿度扔出去，全部就扔喺條街度！

一片火海，圍住咗個窿！

我仲隨手扔咗支殺蟲水入火度，再即刻縮返喺個盾後……

砰！