《屍河明居鑽石山》（是咁的，我發現打喪屍有得升呢）: 517
517
你問我怕唔怕黑？
好難答。
你話我半夜起身去廁所，敢唔敢唔開燈？
我冇問題。
但你話掉我去一個我從未去過嘅荒山野嶺，四圍伸手不見五指？
我會好驚。
就係正常人嘅水平吧？
但係而家，我用緊松果體嘅視力，往內觀察緊我所睇到嘅黑暗……我發現咗種欲罷不能嘅吸引力。
隨住鈣化剝落得越多，我可以睇得越深入，好似沉入緊去一個無底深淵咁。
雖然呢個深淵裏面，我好肯定隱藏住一定會令人好恐懼嘅嘢。
但與此同時，我嘅好奇心亦禁止不住。
好似『反正已經跌咗落去，不如睇清楚最深處有啲咩』嗰種『本死無大害』嘅心態……
「到底裏面有啲咩？」
除咗恐怖，我覺得夜晚入面，仲有所謂嘅『答案』。
所有我未搞清楚，需要知道嘅嘢。
我沉浸咗喺黑夜裏面，成為咗黑夜嘅一部份……我甚至唔係好為意，自己其實不斷喺度開緊新眼藥水，一支一支咁滴哂落眼度，一滴都冇浪費，全部吸哂入去。
正當我就要伸手捉得住『夜』嘅最深處『嗰舊嘢』時……
我突然醒返。
視角變番做正常嘅雙眼……一時間，我對浴室嘅燈光好唔適應，好似由好耐無見光而突然俾人用大光燈照住咁。
松果體痛到流眼水。
痛到一定要將隻松果體閤翻埋……原來裏面都有眼皮。
（《夜之眼》覺醒完成。）
（等級晉升至Level 1。）
之前幾次錯過，而家好似不經不覺咁，突然就開咗隻眼。
（《夜之眼》必需要在環境光度低於『褪黑色素』被抑制的水平，方能開啟並激發出全部的能力。）
（在高光環境下，《夜之眼》處於閉合狀態，各種能力發揮效率為約50%。）
（松果體鈣化是《夜之眼》大敵，建議日常保養，避免使用含氟化物之牙膏，亦需注意食水的含氟量……）
連點保養都講埋，真細心……
（與此同時，避免越過『夜』的分界線，已覺醒《夜之眼》的人類謹記必需時常曝露於日光或強烈人造光線中，以確保松果體不致被褪黑色素永久侵蝕。）
（是為人性之底線。）
「要曬太陽？唔係會慢慢喪失人性，去咗『夜』嗰邊？」
不過呢樣嘢唔到我擔心住。
諗咗點挨過今晚先！
隨住《夜之眼》覺醒，聽人講咗好耐嘅『技能路線圖』，亦終於打開得到。
（發現幾項已預先激活的技能。）
（《血色追蹤》：《無痕者》Level 1技能。）
我記得！
係最初喺自己屋企時，突然視野一灰，可以睇得到啲隱蔽血跡嘅技能嚟，好似啲鑑證電視劇咁！
（系統發現你的《血色追蹤》已達等級2，對應《夜之眼》Level 4。無法解釋越級技能覺醒的原因。）
（《點素治療》：《無玷者》Level 1技能。）
（《強效消化》：基礎技能，目前為等級2，對應《夜之眼》Level 4。無法解釋越級技能覺醒的原因。）
（《暴走者》等級2。每次持續時間：12秒；使用次數：5。無法解釋……）
（《原始腦本能》等級1，又名《蜥蜴腦》。無法解釋……）
（《碎骨者》：暴走者及原始腦的進階合成技。技能冷卻時間：視乎使用次數及點素餘額）
（S.A.M.，即『常設生存模式』，目前等級2。）
（H.P.A.，即『壓力釋放模式』，目前等級1。）
我大致上就係識以上技能。
而幾乎每個技能後面都有句『無法解釋』，即係話我啲技能等級，絕對係我而家《夜之眼》Level 1唔應該學得到嘅。
除咗因為我走緊嘅係《孤行》線，亦有可能係我仲未正式『開機』已經面臨緊啲危險狀態，所以將初次滴眼藥水時嘅基本點素，用咗去開一啲技能嚟應急保命。
但係咁就打亂咗條路線圖。
我目前主要係踩緊四條線：
《無痕者》一級。
《無玷者》一級。
《暴走者》二級。
《孤行者》無等級。
原來話，所有路線嘅等級『總和』，會同你《夜之眼》嘅等級相同。可以話《夜之眼》Level係一個Quota嚟，你有幾呢，等於你有幾多『職業點』去加落啲暴走者啊之類嗰度。
咁即係話，我而家1＋1＋2，理論上我應該至少係Level 4。
但實際上，系統顯示我只有Level 1。
（目前尚可分配路線點：2。）
（你要把《無痕者》升至第三級嗎？）
咦？即係話，我係可以有相等於《夜之眼》Level 6的點數配額……唔通我孤孤吓，已經孤行咗去Level 6？
《無痕者》三級？
「一定要升《無痕者》？」
我問，「可唔可以將嗰兩點分落其他路線？」
（升級《無玷者》尚需累積治療他人的經驗，以及『心性』的調適。）
（升級《暴走者》尚需累積戰鬥經驗，以及身體承受程度的大幅度提升。）
「咁仲有冇其他路線？」
我問，「我聽過有啲係可以大幅提升搬運能力嘅……」
（缺乏進入其他路線的相應『際遇』。）
「咁副Con總共有幾多條路線？」
（視乎《孤城英雄》玩家集體潛意識的深度學習進程。）
開始講緊啲我唔需要知道嘅嘢，算。
（有鑑於你的《奇蹟路線》有著非常嚴厲的時間限制，建議你不作保留，將所有升級潛力全部用盡。）
「好！」
我《潛行者》升到第三級。
就喺呢個時候……
突然成間醫院啲燈，熄哂！一陣好唔舒服嘅感覺，驟然向呢個地方逼近……