《屍河明居鑽石山》（是咁的，我發現打喪屍有得升呢）: 514

514




阿詠同我一樣咁擔心，佢已經逐個同伴追緊部對講機，要同出咗去啲Team Leader講返……

其實我唔知點判斷至啱。

去捉施永義呢件事，當然係好危險，但正如佢哋話齋，唔趁住佢重傷去捉，仲等幾時？





尤其係如果佢真係搞掂咗個奇蹟，又再升呢，傷勢再好返之後，仲有邊個阻止到佢呢？

而且我亦無法準確判斷，聖母呢班人有無制伏施永義嘅能力。

「我知你擔心我哋係出於好意。」

唐唐話，「交俾我哋！阿詠會同阿良佢哋講返，佢見過Carlos施啲咩能力，有冇啲係我哋仲未知道嘅，會叫佢哋小心……」

「你放心喺度抖多陣！」





「就算有下一步決定，都等體能狀態恢復返先！」

然後唐唐都出咗去，成班人喺走廊圍住幾部對講機，似乎同啲Team Leader溝通緊。

一時間，得返我一個喺浴室。

我手臂同腳踭嘅傷，已大致醫返好。

之前已稍為醫咗肚，而頭先Kiki佢哋亦已擺低咗成Pack眼藥水，同埋幾樽維他命啊，鈣片之類嘅嘢。





佢哋話食得幾多得幾多，陣間仲有人會拎多成袋過嚟，可以俾我拎走。另外有同事話落地下室攞兩副後備Con，同埋Manual俾我，但唔知Manual仲有冇多出嘅Hardcopy要搵……

當然，而家咁嘅時勢，冇得靠Online Version，畢竟唔知幾時啲後備發電機會乾塘。雖然醫院應該會好啲，尤其呢度，可能個Plan係包埋額外嘅後備發電機。

如果救得返莎倫，有冇機會帶佢過嚟呢邊，安頓落嚟？

我一邊帶樂觀咁諗，一邊已經隊哂成樽鈣片。

綜合鈣片：

當中亦包含維他命D、維他命K等有助骨質改善的多種微量元素。

食完之後，個胃慢慢發熱，升級咗嘅消化能力開始做嘢。





成身骨頭慢慢慶起上嚟，好似入面啲骨髓慢慢煲熱咗咁，周身不斷有『噗噗噗』咁嘅跳動感生起。

我覺得自己啲骨頭，直接透過樽鈣片嘅受惠而強化緊！

（現開始修補你身體各部位多達37處牽涉骨質的細微創傷，並跟據你目前的等級賦予補強。）

（檢測到你身上有三處重大骨骼創傷的傷癒痕跡，將會消耗較多的營養素，以達成重點強化。）

我隻唔知斷過兩次定三次嘅右手踭，同埋前臂，仲有左腳踭，即係斷過後用《無玷者》修補過嗰啲位，開始慶到著火！

甚至好刺痛！

感覺好似浴火重生咁……《無玷者》主要係醫好創傷，但恢復後嘅機能強化，始終要靠攝取養份！

慶咗一、兩分鐘，熱度減退，我亦覺得升級已經完成。





（全身骨質密度平均提升26%，韌性提升32%，硬度提升28%。）

（其中達到最大強化效率的身體部位：骨質密度提升86%，韌性提升132%，硬度提升78%）。

我憑空試批兩踭……覺得直情聽到啲發發聲！

呢啲先叫戰鬥力提升！

我諗住乘勝追擊再啪多樽，點知Kiki只係俾咗一樽我……然後我擰轉個樽，先睇到上面貼左張手寫指示：

Level 2或以下：每天服用不多於20片。

Level 3以上：每天服用30-50片，視乎消化能力級別。





*過量攝取時系統亦會出現溫馨提示，請勿為了急於升級而浪費珍貴的醫院資源！

「……我有冇浪費到呢？」

副Con確實彈咗條訊息俾我：

（身體目前的鈣質虧空率為：2%。）

（建議繼續攝取。）

咦？

睇落我唔止冇浪費，而且啪哂成樽……好似有成120粒，都仲可以啪落去？

可能我消化能力等級，比其他人高掛？





不過差2%好小事，當成已經補充足夠吧……

（骨質綜合強度已足以解鎖《暴走者》的進階技能。）

（建議配合攝取更多的維生素D及K，以讓技能激活。）

我即刻喺堆補充品裏面，搵到一樽維他命D，一樽維他命K，諗都唔諗，直隊！

身體對營養素的索求，令我完全無視咗對食藥嘅抗拒感，甚至覺得好味過食糖！同啲鈣片一樣，我都係塞滿個口然後咬到碎哂，溝勻哂啲口水先成啖吞落肚，咁樣更加有助消化！

咔嚓！

（覺醒技能：《斷骨者》。）