《屍河明居鑽石山》（是咁的，我發現打喪屍有得升呢）: 410

010




「系統，SAM可以升呢嗎？」

（SAM狀態從第0級升至第1級，需要約等於1.2枚《夜之眼》的點素；下一級……）

「唔駛講咁多，幫我升。」我話，「我要升到我開住SAM時再感覺唔到任何嘢為止。」





（只能保證提升你的情緒壓抑常數，而你必需要理解的是，所有被壓抑的情緒最終都需要透過HPA釋放。）

「我只係要求一樣嘢。」

我抹乾眼淚，

「喺我去到聖母醫院之前，唔准幫我關咗個SAM。用咩代價都要維持開住！」

副Con只係『嗡』咗一聲。





……

我臨尾再望一眼嗰個笠住布袋嘅細路女。

起程。

升級咗嘅SAM狀態，令我嘅行動變得更加果斷，更唔會受情緒影響。

所謂『影響決定嘅情緒』，原來亦包括咗『猶疑』。





唔係話猶疑本身係一種情緒，而係人會猶疑，原因在於『驚揀錯』，即係恐懼……

我打開個寫字樓鐵閘，正門走出，然後直落樓梯！

樓梯口正好被一架泊停嘅旅遊巴擋住，遮住咗消防局嗰邊嘅視線！但唔係始終都要經過消防局咩？

唔係。

我唔要沿住條鳳德道走，而係要橫過呢條雙線雙程行車嘅大馬路！

呢個時候，廢老開始喺老人院嗰邊發癲！

「食嘢啦！生肉餅啊！擺到臭臭哋，仲好味！仲有條紅衫魚啱唔啱？未劏嘅，連腸食啦！」





廢老開始將啲唔啱食嘅嘢，逐件掉出街！

即時引嚟成條馬路啲喪屍瘋搶！

當然，我哋係夾好嘅。

佢儘可能向住另一邊方向掉，為咗製造空檔俾我！

當然，鳳德道好長好闊，好多撞車後嘅喪屍滯留，唔可能靠咁樣就集中哂佢哋。

而且，動靜太大，連兩頭街尾嘅喪屍都被驚動，紛紛拖步過嚟……咁要等到啲喪屍清空，唔知等到幾時。

而我，只係需要令啲喪屍，一時專注喺其他嘢度。

「喂！你捨得過馬路未啊？我就嚟連老婆個爛頭都要掉埋落去啦！」





呢個係暗號嚟！

我由橫巷衝出去，直穿過條大馬路！

霎時就引起咗幾條喪屍回頭注意，但係呢個時候廢老做嘢！

「豬膶啊！我都唔捨得食啊！搶啦你班仆街！」

我轉頭一梢，見住一塊濺哂血嘅豬膶掉咗出嚟，可以話係劃空而過！睇嚟掉之前，廢老仲揸咗幾嘢，好好血水……

啲喪屍霎時癲哂！

嗰啲發現到我嘅喪屍，全部擰返哂面，被引哂去舊豬膶度！





我要快快趣趣過馬路！

我一腳踏落馬路中間條欄杆，一𨈇而過！但就喺本空，同條迎面而來嘅喪屍撞埋一齊！

但係條喪屍好似當我唔係人咁。

佢聞咗兩吓我身上啲殺蟲水味，就將我推開，跑去爭嗰舊百步以外嘅豬膶！

我跨過欄杆，再兜過幾部撞埋一齊嘅車，終於過咗對面馬路！

由鳳德道轉入雙鳳街口，而聖母醫院，就喺呢條街嘅另一頭！

我走入橫街之前，轉頭一望……

我見到廢老樓下，啲喪屍甚至堆成一座山仔咁高，仲繼續疊緊！喺呢個時候，恐怕已冇人知道舊豬膶去咗邊。





啲喪屍想咬嘅係廢老！

點解？因為佢仲喺上面係咁Fing手，將手上啲血水Fing埋出嚟！

『喂！夠啦！可以收手！』

我同佢猛揮手打暗號。

點知佢拎起支燒酒，一吓飲哂仲要攞個樽嚟扔我。

「走你就走啦！唔好阻住阿伯撚屍！」

我對眼只係紅咗一紅，情緒已被壓抑。

我轉頭直闖入雙鳳街！

我要親眼睇到聖母醫院而家變成點……