《屍河明居鑽石山》（是咁的，我發現打喪屍有得升呢）: 111

011

各種可能性，侵入腦海。我只覺得自己個腦有某個部位好痛，好攰……

而呢個時候，個『冷靜狀態』已慢慢消褪緊。

如果係沈莎倫害到麥包咁，而佢又係咁Sell我入廁所，係想我見到麥包瞓咗喺入面之後，大嚇一驚，然後佢就可以……

一陣又一陣嘅毛管棟，從心底發出嚟！





我有見過莎倫歇斯底里嘅時候係點，根本係癲婆嚟。如我講過，佢發起脾氣上嚟唔係人咁品……

我不自覺背脊靠牆，怕俾佢突然衝出嚟拮我一刀！

『唔、唔係喎……點解我會諗到麥包已經死咗？』我突然又諗。

可能佢只係腳傷得太重，再爬唔返出嚟呢？

因此攞唔到手機（應該喺莎倫房）。





佢亦唔敢亂出聲，因為莎倫可能已經嚇怕咗佢。佢腳有傷，如果奪門而逃，應該跑唔過莎倫。

『麥包、麥包你喺入面嘛？我係朗天。』

我用唔會有聲音發出嘅『氣語』，向住廁所嗰邊問。希望沈莎倫聽唔到。

吱……

係廁所門輕微郁動的聲音！從廁所窗花透出嚟嘅光影改變，我確認廁所門真係郁咗一郁。





雖然唔排除道門喺半開情況下，有機會係俾風吹郁。

但我直覺覺得，呢個係佢我講嘢嘅回應！

『麥包！你無事嘛？』

我儘量呵氣得大力啲，希望裏面嘅人可以聽到我講咩；

而與此同時，我一面斜眼睥住沈莎倫道門嘅動靜。

『麥包！你而家傷成點？』

入面再無反應。

『講唔到嘢，都俾啲回應我！』我用聲帶唧咗小小聲出來。





……碰！

廁所入面有整跌嘢嘅聲音！引起嘅空洞回音好大，成間屋都聽到。

而另一方向……

噗。

我有無聽錯？

沈莎倫個門把好似有聲……佢係張隻手放咗喺門把度，然後儘可能無聲扭開個門鎖嗎？

呢個時候，我甚至有踢開莎倫道門，質問佢咩料，甚至乾脆一巴星暈佢嘅衝動！





但其實懷疑佢動機不純，我又只係靠估。

明面上，佢係搵緊我去睇吓麥少傑有無事！

與此同時，我亦諗到不如搬張梳化頂住沈莎倫間房先，諸如此類，呢個時候，通常人嘅主意係超多。

難嘅係選擇！

我始終……最關心麥少傑嘅情況！佢係我唯一嘅『老死』啊……

我怕再拖，佢會無得救！

就算我唔識急救，俾杯水佢飲住先，俾啲嘢佢食，隨便扎蹦帶止止血之類，我都算叫做得到啊！

『少傑！唔駛驚，我嚟睇你。』





我貼住牆咁橫行往廁所方向……期間碰到一條……

餐椅嘅櫈腳？

係俾張梳沙責爛的？

我直覺執起枝櫈腳，斷裂個位仲好尖……呢枝櫈腳令我有少少安全感，雖然我唔肯定自己防緊邊個。

我檻多步，就可以見到廁所。

我一檻而過，而家嚟到『騎樓』，向左望就係廁所。

一望過去，我深深咁吸咗口氣……





亦不期然咁捏緊手上揸住嗰枝櫈腳。