《屍河明居鑽石山》（是咁的，我發現打喪屍有得升呢）: 107

007

抓門抓出嚟嘅？

抓到指甲都甩哂出嚟？

沈莎倫講得啱……

『麥包真係癲咗！』





我亦明白點解有啲直痕係啡色……係指甲斷咗之後，仲繼續抓……所留低嘅血跡嚟。

啡色，已經乾咗嘅血。

……兩、三日前嘅事？

但門把無血。

即係話抓門嗰個人，並未嘗試好正路咁開門……





我伸手試咗一試，理所當然係裏面反鎖咗。

「莎倫，你困咗喺入面幾耐？」

『……』

佢無答，只係喺度喘氣。

「我諗你可以出返嚟，麥包應該唔喺屋企度。」





到目前為止，我都未聽到屋企入面有其他人嘅動靜。

『……你有無搵過廚房同埋廁所？』

當沈莎倫講呢句話時，我眼前又閃咗三次嗰種『警示性』紅色畫面……

如果我當呢啲徵狀，係一種不祥預兆？

呢個預兆，係警告我喺廚房或廁所有危險……

定係沈莎倫呢個人對我有危險？

因為如果廚房或廁所真係有個癲佬喺度，即使危險早就喺度……咁點解要到莎倫講出嚟，先出現呢種預兆？

「……」





我暗暗用力推吓莎倫道房門。

……好實。

而且我聽到佢把聲，同隔住道牆一樣咁『遠』，我估計佢係搬咗張書枱或衣櫃等，去頂住咗道門。

我留意到門較仲有啲鬆動，其實道門已經歪歪哋。

如果莎倫無搵嘢頂門，可能當時麥包已經撞爛咗衝咗入去。只係我當時仲未諗到一樣嘢：

以麥包身手，用力踹幾腳，後面用咩頂都無用啦。

點解唔用腳踢，甚至唔扭門把，而要用手抓，抓到自己受咁重傷？





『會唔會麥包其實都唔想真係傷到莎倫，所以噤住自己，只想將脾氣發洩出嚟？』我心諗。

好似有啲人嬲得滯會打牆，女人就𠝹手，透過自我傷害嚟洩咗自己度氣，透過痛感而令自己清醒返，亦有自我懲罰嘅意思。

始終麥包係我最好嘅朋友，就算一廂情願，我都想盡量維護佢。

「好！咁我入廚房廁所幫你睇吓。」

我當時覺得，屋企99%係無第三個人喺度，但睇睇總會令自己放心，亦可令莎倫放心。

嗰啲紅畫面啊預兆之類，當時我唔會信。

再講，我尿急得好緊要，再唔疴就瀨。

我轉過頭，正想行去廁所。





而眼尾咁啱就『梢』到一樣嘢……

嚇到我連尿都標咗少少出嚟！