因為EX 我成為左一個禿頭嘅毒撚 然後遇到一隻猫: 65. 求婚
「果陣我唔明阿敏點解會講果堆說話，純粹係令我諗起Grace有感而發，但衣家我知佢講緊嘅係林志偉…」天上嘅我突然明白阿敏當時嘅感受。
就好似我同Grace咁，曾經我地都以為自己好了解對方，但面對對方無情嘅傷害，突然間果種陌生感令我地發覺原來自己並唔係真係咁了解對方，然後曾經最親近嘅愛人成為左最遙遠嘅陌生人。不過比起佢受嘅傷，我果d好似真係少兒科好多…
「你地本身經歷就有d似，亦正正因為咁先咁易拉近左你地嘅距離…」貓仙人講。
而正如阿敏所講，就係咁我地之後就慢慢成為左真正嘅朋友，間中會互相text下同埋約出黎食飯。點解會出黎食飯呢? 其實都係為左兩個阿媽… 為左避免佢地不斷再幫我地約人相體，所以我地都造左一個發展中嘅現象比佢地，甚至試過親自登門造訪見過雙方各自嘅母親。果然之後佢地就無再叫我地去相體，每次知我地約左大家出街仲笑得好開心添。所以喺反正識多個朋友傾偈無壞又可以令母親開心嘅心態下，我同阿敏就繼續保持住衣種特別嘅朋友關係，直至差不多一年後嘅一日。
「阿祖呀，你有無諗過我地之後會點?」有次晚飯途中阿敏突然問我。
「之後? 無呀，都係順其自然，見步行步啦。」我諗左一諗後隨意答。
「你…有無諗過我地索性真係永遠一齊等我地嘅媽咪可以以後唔駛再擔心我地?」阿敏過左陣後又問。
「你…指我地結婚?」阿敏咁突然嘅提議有d嚇親我，我需要確定無誤會佢嘅意思。
「嗯…」阿敏眼神移離了我輕輕嗯了一聲。
雖然同阿敏相處無咩問題，大家都開心同舒服，但突然就話要去到結婚衣步，我真係從無諗過，好似中間跳左好多個steps咁。
「點解咁突然有衣個提議?」我問。
「你覺得衣個提議好差?」阿敏反問。
「又唔係，只係好突然無諗過你會有咁嘅提議…」我否認。
「其實我地都知我地各自個阿媽有幾擔心我地嘅終身大事，衣家雖然無再逼我地去相體，但過一排佢地遲早會問我地幾時結婚，到時我地一係放棄呃佢地然後繼續接受佢地之後d相體，一係就都係要照結婚，如其係咁倒不如早d結左佢?」阿敏解釋。
「但你真係ok我地咁結婚?」佢嘅說話我明，但我比較關心嘅係佢嘅意願。佢真係接受到我地咁就結婚?
「同你相處都幾舒服呀，大家情況又有d相似… 我唔想又要再去重新認識一個人喇，真係要用好多心力好累… 我亦唔覺得自己之後會遇到咩緣份係大家都鍾意大家… 所以如其係咁，不如同你一齊做下roommate咁可能仲舒服呢~ 我地可以一齊住得黎又保持各自有自己嘅私人空間，咁悶果陣可以有人陪下，想要metime果陣又可以匿喺自己私人空間，唔好咩?」
果刻嘅我本身對愛情都無晒幻想，心亦早已經乾涸左多年，確實我都唔覺得自己將來會再遇到咩姻緣，所以阿敏嘅提議我都唔覺得唔可行。始終阿媽年紀都大，我都唔想佢再為我操心…
「聽落又係嘅… 你ok我無理由唔ok呀~」諗左諗我就落左衣個草率嘅決定。
「咁以後多多指教喇，roommate~」阿敏笑住咁伸出左佢隻手。
「多多指教~」我亦伸出左自己隻手同佢相握。
就係咁，我地之後就合租左一個有兩間房嘅單位，再好快咁排期註冊結婚。始終我同阿敏都係宅男宅女好低調，而且結婚都係為左唔駛兩老擔心，唔係真係話有愛情衣個元素係入面，所以我地都唔想大排筵席咁攪又好似呃人地嘅祝福咁而只係好簡單就咁簽個字就算。至於兩個母親知道我地有著落已經好開心，所以對我地唔擺酒果d都完全無意見。
以上係我諗返當年同阿敏點解無啦啦會去到結婚衣步嘅回憶片段。
但衣家下面嘅世界喺發先頭先果堆野之前，似乎正發生緊一d我唔知嘅野，因為我見到我阿媽有日襯我返左工，偷偷叫左阿敏上黎屋企。
「阿敏，多謝你唔嫌棄我個仔呀… 你同佢相處成點? 佢對你好唔好?」客套完一輪，我見我阿媽突然問阿敏。
「Auntie唔好咁講啦，調返轉阿祖都無嫌棄我呀… 我同阿祖處都幾舒服呀，佢對我都好好，感覺上佢都係一個好人黎呀，所以唔駛擔心~」阿敏初初有少少愕然，但好快就笑住咁答。
「咁就好… 我衣個傻仔當年失左一次戀後就成個人都變晒… 我真係好擔心佢成世都無人理孤伶伶一個呀…」我阿媽聽到後眉頭解返唔少。
「一次失戀?」雖然我同阿敏不時會傾下偈，但或者大家都不堪回首往事，所以大家對大家以前嘅感情生活係點其實都一無所知。
「阿祖無同你講過? 可能佢都唔好意思同你講…」我阿媽有少少驚奇，但之後諗一諗又釋然。
「無呀，我地都好少講以前嘅野…」敏有d尷尬咁講。
「都正常嘅，始終唔係一件開心嘅事… Auntie偷偷講你知呀，阿祖以前其實以前完全唔係衣家咁嘅樣架，靚仔又成日打波入埋校隊，我果陣聽佢個青梅竹馬Meimei講，佢仲係學校嘅校草添! 之後佢鍾意左個女仔，仲同衣個女仔一齊左，本身一直都好好，直至讀左大學一年後佢地就突然分左手，果陣阿祖好傷心，成個人無晒鬥志同信心頹廢晒，最後仲開始甩頭髮再變埋做個肥佬，之後就更加連街都唔點出朋友又唔識多個，不知不覺咁就差唔多10年…
我都係擔心自己有咩事後得返佢一個，所以先開始幫佢搵相體對象，之後好彩就搵到你…」我阿媽向阿敏解釋道。
「原來阿祖有段咁嘅往事…」阿敏聽完後有d感觸，我知係因為大家經歷都相似，都係受傷完後外貌同性情貌似都改變左。
「個傻仔真係好傻架，為個女仔毀左自己一生.... 所以當我知道佢同你一齊，我真係好開心亦好感激你…」我媽為左表達感激之情突然捉左左阿敏隻手講。
「Auntie你真係唔好咁講啦，我同阿祖一齊又唔係為左d咩…」阿敏有少少尷尬。
「阿敏呀，Auntie今日搵你上黎，其實係有個不情之請…」我媽突然又提。
敏:「…請講?」
「其實我前排去覆診，發現自己有左肺癌，可能淨返嘅日子都唔多喇… 但係我臨去之前，好希望可以見到阿祖成家立室… Auntie唔係逼你或者想打咩人情牌，只係如果你覺得阿祖個衰仔還可以，都值得你付託終生，我想你考慮下可唔可以同佢結婚照顧佢一世… 我知我衣個要求有d唐突同過份，不過我真係放唔低阿祖好擔心佢…」我見我媽開始眼濕濕。
「醫生到底點講?阿祖佢唔知?」因為從未從我口中聽過，所以阿敏估我並唔知情。
「我唔想佢擔心所以無講佢聽… 你都要幫我保守秘密呀，唔係佢又亂黎… 醫生話做化療可以頂一陣，但應該都活唔多過兩年喇… 所以我先咁急幫阿祖搵對象又想睇下你地有無可能可以成為夫妻…」我媽帶住淚痕咁講。
「唔好放棄治療呀，你個身體先係最重要…」敏鼓勵道。
「放心我唔係尋死，但都要有定最壞嘅打算…你可唔可以考慮下?」阿媽又再問。
「我會考慮下…」
天上嘅我已經O晒嘴，因為到衣刻我都唔知我阿媽原來有左肺癌，亦唔知阿敏原來當日同我提議求婚，竟然係因為我阿媽。
「我阿媽有肺癌? 點解我一直唔知，同埋都唔覺佢有咩特別唔舒服嘅?」一直同阿媽一齊住而竟然察覺唔到佢身體有異樣，我除左係震驚更多係內疚同擔心。
「知自己有幾不孝喇咩? 不過唔駛太擔心，你睇埋落去先…」貓仙人突然又講。