因為EX 我成為左一個禿頭嘅毒撚 然後遇到一隻猫: 57. 暗生情愫

轉眼間兩個人都踏入左中學生涯，而緣份又讓兩個人升讀左同一間中學。喺新學校因為好多新同學並唔知道林志偉以前嘅威水史，而佢自己本身亦再無以前咁霸道同衝動，所以漸漸佢都開始有返自己嘅朋友，唔再係得阿敏會陪佢玩嘅孤獨精。
 
不過隨住大家都踏入青春期，慢慢又有另一d變化發生。首先係林志偉越生越高大，再無以前果種細路仔嘅痴肥，開始越大越有型。而阿敏亦生得越黎越靚，身材越黎越好，開始吸引到唔少男同學注意同垂青，向佢慢慢靠近。但由於林志偉一直都當左阿敏係佢私人物品咁，由以前開始已經一直唔鍾意其他男同學痴近佢，所以當佢一見到有男同學埋阿敏身都會立刻趕佢地走，仲成日以阿敏男朋友自居。
 
無啦啦比人話係自己男朋友，阿敏當然十分不滿亦一再否認，但林志偉都完全唔理繼續秉承佢以前一貫霸道嘅態度，慢慢阿敏都無佢乎。而曾經有人講過如果有人日日同你講同一件事，就算件事未必係真都好，慢慢你自己都會當左衣個係事實。可能因為咁，所以漸漸阿敏好似都覺得總有一日自己真係會同林志偉一齊。
 
「真係無諗過原來阿敏以前係咁靚咁索架喎…」
 
天上嘅我見到衣家嘅阿敏都唔太敢相信自己嘅眼睛，因為係我個世界嘅佢個樣雖然唔太差，但就真係一個好肥嘅女仔，我實在聯想唔到佢同衣家衣個又靚又正嘅女仔同佢係同一個人。而隨住阿敏個樣漸漸成型，我亦終於知道點解喺上一個世界覺得自己喺Disco遇到仲同佢訓左晚嘅果個女仔會咁熟面口，因為原來佢就係阿敏，只係當時身型實在相差太遠所以我認唔出。
 




(點解阿敏之後會去果d地方仲變成咁?) 我心入面不禁問。不過貓仙人當然並無為我解答所以我只好繼續睇下之後到底發生咩事。
 
果然上到中學無耐，阿敏就幫自己改左個英文名叫Mandy。而去到中二，林志偉因為覺得自己開始大個，亦越黎越驚阿敏有一日會比人搶走，所以終於同阿敏正式表白希望佢可以做自己女朋友。
 
「敏敏，我地唔經唔覺都識左差唔多5年喇…」有日林志偉扮晒若無其事咁同阿敏講。
 
「係喎… 時間真係過得快~」阿敏諗左一諗後就笑住回應。
 
「咁衣五年你過得開唔開心?」林志偉又問。
 




敏:「開心呀~ 諗返搬左黎大埔後初初雖然好似無晒d朋友仔咁，但衣家都識左好多唔同嘅新朋友。」
 
「哈哈，係呀，初初無人同你玩得我肯同你玩架咋~」林志偉講笑道。
 
「咪住… 好似係你果陣人緣唔好，我又咁岩坐左係你隔黎，結果攪到d人因為你連我都遭殃唔肯同我做朋友喎…」阿敏換左做個不滿嘅表情。
 
「係咩? 咁最後我都算有努力補救呀~」林志偉帶住少少尷尬咁講。
 
「都係嘅~ 仲因為你同d女同學講對唔住，之後就個個都當左我神人咁主動黎同我傾偈，諗返都好笑~」諗諗下阿敏又笑住講。
 




「咁我咁多年黎係咪一直對你都好好先?」見到阿敏笑林志偉舒服返d，然後好快又問。
 
敏:「嗯…係唔錯嘅~」
 
「其實我都唔知點解當時第一眼見到你，就好似觸電咁隻眼再離唔開你… 當聽到Miss Cheung叫你坐去我側邊，我真係好開心…以前雖然我好霸道，但對你我就永遠都惡唔出… 然後隨住慢慢長大，我就知我對你果種感覺原來係叫一見鍾情… 為左你，我可以做好多以前唔願意做嘅野。
 
我記得小六果陣有一次我又打左人然後你好嬲話唔再理我，果兩個星期係我人生最害怕嘅日子，因為我真係好擔心以後都無左你… 所以自此我決心改過以後唔再打人。而當我知你報左邊間中學後，我亦同我阿媽講我一定要報衣間中學，仲為此努力溫書左一段日子，好彩最後我地都可以一齊升上同一間中學繼續做同學。而因為我收斂左脾氣，我衣家都可以有自己真心嘅朋友… 一切都係多得你…
 
不過近衣一兩年其實我又開始驚，因為你越生越靚，越黎越受其他男同學歡迎，我好驚有一日你會鍾意左佢地是但一個然後同佢一齊，所以雖然明知你唔鍾意，但我係衣方面都保持霸道本色周圍同人講你係我女朋友… 而當我見你近排同果個姜曹好似越行越埋，我就更加之驚… 所以我決定唔忍喇，我今日就要同你表白，要你做我真正嘅女朋友! 敏敏，可唔可以? 我真係好鍾意你架…」林志偉一臉深情咁講道。
 
聽到林志偉真心嘅表白，阿敏當然感動，事實上佢其實亦早已預左自己有一日會同對方真正咁一齊。不過雖然心係咁諗，但佢無立刻應承，因為佢知自己可以令對方做任何嘅野。雖然林志偉衣家脾氣已經無咁衝動同暴燥，但阿敏仍然覺得對方做人好似無咩目標同方向咁，佢好希望佢除左自己外，人生可以有返d動力同其他目標，然後為衣樣野拼搏，佢亦想睇下對方可以為自己拼到咩地步，於是佢開左個提議。
 
「好鍾意我? 有幾鍾意先?」
 
「鍾意到為左你我做咩都得!」林志偉一臉豪氣咁講。




 
「阿偉… 其實除左我，你嘅人生仲有d咩? 或者咁講，你仲有d咩係鍾意有興趣?」阿敏隱藏住心入面嘅暗喜問道。
 
「嗯… 近排我跟Jason去打過下籃球，覺得都幾好玩~」林志偉諗左陣後答。
 
「咁你可唔可以試下努力打籃球?」阿敏乘機問。
 
「下?可以嘅… 但點解?」林志偉不明所意。
 
敏:「我想你做人有返d目標同拼勁，搵d你真係鍾意做嘅野全力以赴~ 我想睇下你搏命個樣…當然唔係講緊追女仔~」
 
林志偉:「咁我試下啦… 但咁同你做唔做我女朋友有咩關係?」
 
「如果你黎緊入到校隊拎到冠軍，我就答應你啦。」阿敏開出左條件。
 




「真係?」見阿敏無拒絕，林志偉心入面十分之開心。
 
「真~」阿敏笑住答。
 
「好!」
 
之後林志偉就好認真日日打籃球，仲主動申請加入校隊。不過雖然佢好努力，但始終岩岩起步無耐，實力自然無咁快追得上其他隊員，所以雖然最後佢嘅誠意同努力感動到教練比佢入隊，但就一直都無咩出場嘅機會。直至球隊入到四強，佢先終於憑住自己嘅拼勁同執著，加上唔願意放棄嘅精神，成功為自己爭取到一次機會。