因為EX 我成為左一個禿頭嘅毒撚 然後遇到一隻猫: 55. 李思敏與林志偉(一)

第五個平行時空
 
「大家好，我叫李思敏，請多多指教。」李思敏有少少怕醜咁向全班同學介紹自己。
 
「思敏，咁你坐去果個空位度啦，林志偉，你幫missie照顧思敏唔好蝦佢呀!」老師指住後面一個空位同思敏說。
 
於是阿敏就揹住個書包走到去個空位度坐低左。
 
「你好我叫林志偉呀，點解你會轉校過黎嘅?」衣位生得都算俊俏同高大，但就有少少痴肥叫林志偉嘅男學生見阿敏坐低左後就有少少熱情咁問。
 




「因為我地搬左屋，媽咪唔想我咁遠返學所以就轉左過黎喇…」阿敏有少少膽怯同怕醜咁講。
 
林志偉:「咁你以前住邊?」
 
敏:「我以前住天后呀。」
 
「嘩~ 咁點解要搬黎大埔衣d咁遠咁山旮旯嘅地方?」林志偉有d驚訝。因為以前住對面海感覺好似高人一等咁，仲要對比果陣嘅大埔衣d相對偏遠嘅地區。
 
「媽咪話因為我地無錢喎…」阿敏臉有少少難色。
 




「嗯… 咁以後有咩需要幫手就話我聽啦~」林志偉拍左自己心口一下講。
 
對於初初去到一個陌生環境嘅小朋友，坐係佢附近嘅同學仔對佢影響其實都幾大，加上阿敏本身比較內向同細膽，好少主動同其他新同學傾偈，所以佢初初好似都唔太識到朋友。好彩衣位林志偉對阿敏好熱情，每次見阿敏自己一個佢都會專登走過去撩佢玩同傾偈。不過慢慢我就發現衣位林志偉，貌似原來自己都唔多朋友，其他同學對佢好似都有少少敬而遠之，而望佢嘅眼神，甚至帶有種畏懼。
 
只但係林志偉自己雖然生人勿近咁佢自己亦唔介意，但當佢見到好似無咩人願意同阿敏玩果陣，佢又有d擔心同唔開心，於是我見到佢開始去恐嚇其他女同學。
 
「喂，你地以後玩果陣叫埋李思敏知唔知?」佢走去堆女同學度講。
 
「哦…」明顯班女同學有d畏懼於是敷衍完林志偉就好快散左。
 




之後佢地都有開始搵埋阿敏一齊玩，但就真係純粹叫完佢黎就唔理佢果隻，因為佢地礙於林志偉嘅威嚇唔敢唔叫，但同樣因為咁令佢地連阿敏都驚埋唔敢同佢交心。結果林志偉嘅幫忙反而令阿敏更加難交到朋友。
 
阿敏雖然係內向細膽，但佢唔係蠢，慢慢佢都睇得出班入面嘅同學好似好驚林志偉咁。
 
「點解… 你地好似好驚林志偉咁嘅?」有日佢終於忍唔住問。
 
但其他同學聽到佢嘅問題好似都唔太敢答咁。
 
「李思敏，果個林志偉好霸道架，大家都怕左佢唔太敢同佢玩，我見你同佢好似好熟佢又幫你出頭，你都小心d唔好同佢行太近呀…」終於其中一個同學見阿敏慒盛盛咁就忍唔住同佢講。
 
「但佢對我又好似無咩唔妥喎…」阿敏唔明白，因為林志偉對佢好似又無咩野。
 
「總知我地提左你啦…」女同學見阿敏唔聽就無再理佢。
 
阿敏覺得好奇怪，但就無因為咁唔理林志偉，而其他人因為見佢仲同林志偉熟，所以都繼續咁嘅態度對佢。




 
「林志偉，點解其他同學好似個個都咁驚你唔敢同你玩嘅?」係坐位阿敏問林志偉。
 
「佢地個個都好細膽驚左我囉~」林志偉一臉得意同自滿咁講。
 
敏:「你對佢地唔好?」
 
「唔係呀…咁你會唔會都驚左我?」林志偉突然有d擔心。
 
敏:「咁又唔會… 暫時都係得你一個肯同我傾下偈同玩，你又無對我做d咩…」
 
「佢地仲係唔肯同你玩? 我明明見佢地有時玩都會叫埋你格?」林志偉有d驚訝，因為衣段時間佢一直以為自己”幫”左阿敏。
 
「佢地係有叫我，但叫完就唔理我… 佢地話因為見我同你熟所以唔敢同我熟喎…」阿敏對林志偉坦白。
 




「竟然係咁! 可惡… 等我再同佢地傾下先…」林志偉有d嬲想即刻去搵佢地。
 
「你唔好啦，我驚你越講越衰…」阿敏見佢咁就捉住左佢阻止佢。
 
「唔駛擔心喎，嚇下佢地就得架喇!」林志偉叫阿敏放心。
 
「嚇? 嚇邊得架? 就算佢地最後比你逼到，都唔會係真心啦…」但阿敏當然唔認同。
 
林志偉:「咁… 至少佢地會肯做呀…」
 
「所以你成日咁嚇佢地同蝦佢地?」阿敏好似開始明白點解其他人咁驚林志偉。
 
「又唔好咁講，我都係大聲少少講我想佢地做嘅野啫…」林志偉有d唔好意思咁講。
 
「咁邊得架… 唔怪得個個驚左你啦… 想人幫自己做野要有禮貌咁請求人地架嘛~」阿敏想勸林志偉從良。




 
「我以前都試過… 但我發覺唔一定得，有時佢地仲會得寸進尺，反而我惡d，佢地唔聽就嚇佢地或者打佢地咁佢地以後就會聽話。」林志偉解釋。
 
「唔怪得佢地話你霸道唔肯同你玩啦… 咁邊有人鍾意你架!」敏沒好氣咁講。
 
「我駛咩佢地鍾意啫，我要佢地聽話就得啦!」林志偉反問。
 
「無朋友咁你開心咩?」阿敏見林志偉堅持又問。
 
「點解唔開心? 而且我… 有你衣個朋友嘛~」林志偉有少少怕醜咁講。
 
「我? 係喎…咁點解你對我又好似無咁霸道嘅? 唔係我應該都會驚左你唔敢同你玩…」阿敏醒起林志偉對自己唔同所以問。
 
「嗯…唔知點解第一眼見到你後就唔忍心對你惡囉~ 唔緊要啦，佢地唔同你玩，以後就我地兩個自己玩~」林志偉答。
 




「唔制呀! 我唔想得一個朋友… 而且你係男仔，我點可以得你一個朋友喎!」阿敏當然唔制，仲臉露委屈。
 
「所以你好介意佢地唔理你?」林志偉見阿敏唔開心開始有少少著緊。
 
敏:「係呀… 不過我都唔會因為咁疏遠你嘅…唔係你就太可憐，而且你對我又唔錯…」
 
「我明白喇…」林志偉若有所思咁答。
 
原來衣個林志偉平時好霸道，見到同學有新玩具或者文具如果佢有興趣，佢就會搶黎玩。有時成班一齊玩遊戲，佢又要話事玩咩遊戲，例如玩捉，然後佢又一定要自己做鬼。如果其他同學唔肯，佢就會鬧同嚇佢地，再唔肯有時甚至會用暴力。因為佢體型比較大，所以其他同學都唔敢同佢打，然後慢慢就驚左佢唔想同佢玩。當然同學總會同老師投訴過，老師亦有訓斥過林志偉，但就效用不大，林志偉亦唔肯改。雖然佢受老師同父母訓話完之後都稍為收斂至少唔會亂咁打人，但結果慢慢就變左無人敢再同林志偉玩。
 
不過衣日佢同阿敏傾完偈知道對方唔開心後，佢第二日就做左一個驚人嘅舉動。