因為EX 我成為左一個禿頭嘅毒撚 然後遇到一隻猫: 53. 因果

「可唔可以講我聽咩事? 」我對此確實有點意外。
 
「我同我前夫係大學果陣玩交友app認識，而畢業幾年後我地就結左婚，本身我地其實都幾開心，直至我隻狗豆豆過左身… 豆豆係我中學果陣開始養，我結婚後我就帶埋佢同我前夫一齊住。點知係我地婚後兩年佢就因病過左身… 豆豆係我生命中好重要嘅一個屋企人，佢曾經陪我渡過左我人生好多艱難嘅時光… 所以果陣我好唔開心，晚晚都喊，仲幫豆豆攪左個喪禮，點知果晚佢無出現… 佢話公司突然有個大project，要趕工所以黎唔到。
 
本身雖然我係有d唔開心，但一來公事要緊，二來豆豆始終係我帶過去，佢地感情係無咁深，所以我都無點怪佢。但點知之後我意外發現左佢果晚原來係去左同佢上司去左飲酒慶祝傾成左單大生意而唔係趕工… 」Cherry邊回憶邊講。
 
我:「咁佢係有d過份喎… 所以你地係因為咁離婚?」
 
Cherry:「嗯…你係咪覺得我好小題大做?」
 




「又唔係嘅… 果陣你咁唔開心咁需要佢，但佢就無陪你… 而且雖然話佢同豆豆感情無你咁深，但如果真係愛你，佢應該明白豆豆對你嘅意義係d咩，會一樣重視你所重視嘅野… 所以佢缺席係反映左佢未必真係好愛你，又或者唔係咁了解你… 而我覺得最主要令你傷心嘅原因未必係因為隻狗，而係因為佢呃左你…」我嘗試代入Cherry感受講。
 
「可能你比佢睇得仲透徹…」Cherry望住我，然後隔左一陣回應道。從佢嘅眼神，我見到佢有d意外，但係係impressed果種。
 
「係呀，睇我幾了解你~」我講笑道。
 
「正如頭先所講，雖然我會唔開心，但我接受到佢唔重視豆豆，接受到佢無陪我，但我接受唔到佢咁呃我… 因為我覺得大話有第一次就會有第二次，而兩個人如果唔可以坦誠相處，咁衣段關係都唔會健康… 我追求嘅關係，從來都係想要大家可以完全坦誠相對。」而Cherry就仍然認真。
 
「可能佢唔想你難受先咁講嘅… 始終好難講出口話要同老闆慶祝所以去唔到你個仔嘅喪禮…」我嘗試為佢前夫解釋。
 




「佢都係咁講，只係我接受唔到啫… 事實上衣件事發生後我地都唔係即刻離婚，但就好似一塊玻璃多左一條好深嘅裂痕，而衣條裂痕一出現，就會引發更多裂痕，最後成塊玻璃都會碎晒…」Cherry陷左入自己嘅回憶。
 
「咁我都明，就算同一件事，觀感係唔同左之後望到嘅野都會唔同…」而我亦明白佢嘅意思。
 
「所以… 你會唔會呃我?」Cherry靜左陣後望住我問。
 
「知你咁介意衣樣野，以後就算有相同情況，我會知大話可能比事實更傷害到你，所以唔會講大話呃你…」我應承道。
 
「記住你講嘅野呀~」Cherry聽到後對我甜甜一笑。
 




 
或者大家真係太夾，又或者大家真係缺愛得太耐，果晚後無耐我就同Cherry正式一齊左。其實都無正式確認過，只係有晚食完飯送佢返屋企嘅時候我主動拖住左佢而佢又無fing開我咁我就當係一齊左。其實之後我都有諗過同佢坦白以前嘅自己係點，但最後我都係因為害怕而無咁做到。反正我只要改過自新以後都唔再做player，咁Cherry就唔會受傷亦唔會知我嘅過去，果陣嘅我係咁諗。
 
同Cherry一齊係開心舒服，大家係生活品味同細節都幾夾，我亦得到左我好耐都無得到過嘅心靈滿足，可以再次認真投入一段感情。一年多後我地仲搬埋左一齊住再一齊養左隻狗，一切都向住好嘅方向行。而我地有感年紀都唔細又想生小朋友所以都開始諗結婚，而當我地連各自父母果關都過埋就順利排期結婚。
 
「咦，今次個結果好似唔錯喎，玩完都可以搵到個岩嘅人結婚。」天空上嘅我見到衣個世界嘅自己今次似乎終於可以有個好結局。
 
「你信唔信因果?」貓仙人微微笑左下，然後不置可否咁問。
 
「信呀，衣個世界有90%嘅事都係事出有因，正如點解有咁多個平行時空其實都係因為有好多唔同嘅因出現左。」我諗左陣後答。
 
「咁你信唔信”出得黎行，預左要還?”」貓仙人又問。
 
「嗯… 都信嘅… 不過你到底睇過幾多嘅香港電影同劇集?」我其實幾好奇衣個問題嘅答案。
 




「對我黎講睇你地嘅故事本身就同睇電視劇無咩分別…」不過貓仙人無直接答我。
 
初時我都唔明貓仙人問衣堆問題係咩意思，直至係我地婚禮前一星期，一個人嘅出現。
 
 
「我阿妹係英國返左黎喇~」Cherry係電話同我講。
 
「終於有機會見到佢~」對於衣個阿妹，我一直所知不多亦無見過，淨係知佢去左英國做野，但就一直無深究原因，亦無問佢拎過相黎聽，因為我地好似都有意無意咁盡量唔講唔提大家以前嘅野。
 
「係啦衣個衰妹，唔係我結婚都唔知幾時先可以請到佢返黎呀!」Cherry有d不滿咁講。
 
「點解佢當年會去左英國嘅?」而我亦終於順勢問下背後有無原因。
 
「當年佢同佢個初戀男朋友分左手後好唔開心… 本身過左排後佢好似好返少少，但之後有日佢突然又同我地講係英國搵到工會飛過果邊做野… 初初頭一兩年都有返下黎，但之後就完全無再返過黎…」Cherry解釋。
 




「原來係咁…」
 
而我第一次見到衣位小姨，係第二日Cherry去婚妙鋪final fit嘅時間。不過當我地見到大家果陣，大家都有d驚呆，然後係陷入左無盡嘅尷尬﹐因為我發現佢係我成為player後其中一個玩過嘅女仔。
 
「你地做咩個表情咁怪? 你地本身認識?」Cherry察覺到我地古怪嘅表情問。
 
「唔係呀，無諗過未來姐夫咁靚仔咋嘛~」Cherry個妹首先反應過來然後答道。
 
「車，係你之前話見相不如直接見人，懶係話要保持神秘感唔睇佢嘅相咋嘛~」Cherry笑住講。。
 
「係啦… 早知咁靚仔我應該一早問你拎左相先…」阿妹就語帶相關咁望住我講。
 
「哈哈，唔緊要，黎緊大把機會睇~」Cherry並無多心我地嘅古怪，然後好快就捉左佢阿妹去睇衫同試衫。
 
而我就係衣段時間陷入左短暫嘅回憶。




 
印象中Cherry個妹叫Ceci，識佢都係之前有日見佢係酒吧飲得好醉，然後同佢傾左段時間後我就帶左佢返自己屋企，仲同佢一齊左一段好短嘅時間。之後我就將Jessica對我做過嘅野做返係佢身上。衣家諗返再結合埋Cherry之前所講嘅野，好可能就係因為佢失戀無耐後再加上我衣個致命嘅一擊，令佢選擇遠走他方去左英國生活避世…
 
霎時間我陷入左驚恐，如果比Cherry知道左我同佢妹嘅事，比佢知道左我以前係一個點嘅人，佢仲會唔會肯同我結婚?
 
心驚膽戰但又要扮無野咁捱完左衣個試衫環節後，Cherry因為有d公事急住返左公司處理，而我就乘勢可以同佢阿妹有個攤牌嘅機會。