因為EX 我成為左一個禿頭嘅毒撚 然後遇到一隻猫: 48. 再見Grace
不過當下面快鏡緊我不斷溝女食女嘅時候，突然有一幕令我有d在意嘅情況出現左。
「咦，衣個女仔有d熟口面喎…」
有日我見到衣個世界嘅我正蒲緊Disco嘅時候，旁邊有個女仔好熟口面，但就諗極都諗唔起係邊度見過。
有靚女出現，衣個世界嘅我當然無放過。
「你好，我係阿Joe呀，點稱呼?」
「Mandy~」
之後衣個世界嘅我好快就同衣個Mandy混熟，攬頭攬頸，最後仲好快帶左佢返屋企。提外話，為左方便帶女仔返屋企同慳返d酒店錢，我之後同Byran都合租左個細單位方便大家搵食。不過今次比較特別係第二日到我訓醒，發覺隔黎個位置已經空空如也。完事後第二朝，Mandy好早就起身著返衫然後走左，之後我都再無見過佢，衣個係我之前從無遇見過嘅情況。不過衣d ONS，衣個世界嘅我當然唔會在意，唯一可惜係對方咁高質自己只可以享用一次。反而天上嘅我就諗極都諗唔起到底自己邊度見過佢，點解咁熟面口。
就係咁過左大概兩三年荒淫無道又濫情嘅生活後，我可以話已經完全變成左另一個人，係感情方面亦已經完全百毒不侵。但係唔會受傷嘅同時，我內心嘅一種寂寞感亦如日俱增，好似永遠都唔會再有人可以觸動到自己嘅心靈。無錯，成日同唔同嘅女仔造愛，肉體上嘅刺激同歡愉係好正，但心靈上呢?精神上呢? 你唔投入感情，好自然你亦都唔會得到感情上嘅滿足。不過正如Jessica所講，你唔賭雖然唔會輸，但亦自然無可能做到有錢人，所以一切都係自己嘅決定同取捨。
而有一日，我係夜場竟然遇見返一個人，一個可以清楚話比我聽到底衣幾年我有無成長過嘅人。
「祖? 好耐無見喇…」
「Grace?」見到衣張熟悉嘅面孔，有一瞬間我個腦唔係幾運作得到。
「估唔到會係度撞到你… 你幾好嗎?」佢對係度見到我有d驚訝。
「我好好呀，你呢?」我努力不失禮咁答。
「我都唔錯呀，你衣家做緊咩? 比起幾年前嘅你感覺好似唔同左喎。」Grace又追問。
「係咩? 都唔奇嘅… 衣幾年我確實係經歷左唔少野。我衣家係間IT solution 嘅公司做sales，前排岩岩升左AM。你呢?」我確實已經變得好唔同。
「咁都唔錯喎，有返目標同career咪幾好~ 我同你講你唔好驚左我喎，我衣家其實做緊保險，不過放心我唔會sell你架，我已經過左要搵客嘅階段，衣家都係manage下面班人多。當然你有需要都可以搵我啦~」Grace滿臉自信咁講。
「咁犀利?不過我唔駛喇暫時。」衣個世界嘅我確實估唔到Grace會去左做保險。
「唔緊要~ 咁唔好講衣d啦，可唔可以講下你衣幾年發生左咩事?」Grace又問。
「無咩事呀，你同我分手後咪努力讀書然後出黎做野囉。」我嘗試裝作輕描淡寫咁講。
「咁簡潔? 咁你頭先又話衣幾年經歷左唔少野? 」不過Grace好似唔太信。
「工作上嘅歷練啫… 」我心裏一窒然後胡亂解釋。
「哦… 咁你之後有無再拍過拖呀?」Grace又問。
「咁實有嘅…」我唔會話自己無。
「同Mabel?」Grace一副自信十足嘅樣咁問。
「下?點會呀? 」」但對佢嘅問題我就有d嚇左一驚亦摸不著頭腦。
「竟然無? 我仲以為好快你地會一齊添…」但Grace同樣好似好驚訝咁。
「我同佢識左咁耐點會呀… 而且同你分完手後無耐我地嘈過一次好大嘅交，之後都無再點聯絡，前排佢仲同佢男朋友一齊移民左去加拿大添…」我將我同Mabel發生嘅野講左比佢聽。
「鬧大交?移民?你…唔好話我聽到衣刻你都唔知佢一直鍾意你呀下?」Grace有d難以置信咁問。而連Mabel移民都唔知，睇黎佢地反左面口就真係無晒聯絡。
「Mabel鍾意我? 哈，你都幾好想像力喎…」無經歷過其他世界嘅我就覺得佢係度講笑。
「Oh my god! 我個初戀男朋友原來係咁遲純…」佢有d不屑我咁講。
「你認真? 點會呀… 我地一直係Buddy…」佢嘅反應令我開始相信佢所講嘅可能性。
「唉…你真係好蠢呀! 你知我地分手後佢有搵過我?」Grace忍唔住問。
「知… 佢話同你反左面…」我有少少尷尬咁講，因為始終係我令佢地反面。
Grace:「咁你知唔知點解我地會反面?」
我:「因為佢覺得你對唔住我?」
Grace:「衣個我唔否認係有關係，但將心比己你會因為單單咁就同個好朋友絕交?」
我:「我一直都覺得佢係over左唔太make sense… 不過我估咁應該係因為我同Mabel本身真係好親好親嘅朋友，而佢好替我不值掛…」
Grace:「祖，你真係好可愛~ 邊會係因為咁簡單呀…」
而當Grace正同下面嘅我講返當年嘅事嘅時候，貓仙人同時間亦運用佢嘅能力，令我可以從Grace嘅回憶中睇返當年Mabel同Grace最後一次見面嘅畫面。
「Grace，點解你要咁對阿祖呀?」Mabel質問Grace。
「Mabel，感情嘅野無得勉強架…自從上左大學後，我地都慢慢變左…」Grace嘗試解釋。
「有咩變左? 定你變左心咋?」但Mabel唔接受。
「你要咁諗我無辦法…但感情嘅野唔係非黑就白，唔係淨係講鍾意同唔鍾意咁簡單…」Grace開始有少少唔耐煩。
「你地之間嘅問題我唔想亦唔適合comment…但祖為左你真係好傷心，我從未見過佢咁架… 你真係唔可以比多次機會大家?」Mabel見Grace咁亦決定唔再糾纏果個問題轉移想幫我求情。
「我同佢…已經返到轉頭架喇… 但我相信總會過去嘅，慢慢佢就會好返無事…」Grace當然唔接受。
「你地明明經歷左咁多野，點解可以話無就無咁絕情架… 黃可欣，你個新歡真係咁好咩? 我突然間覺得你好陌生呀…」而Mabel嘅說話亦越趨嚴厲同責備性。
「梁美兒，我知你同阿祖好好感情，但我同阿祖分手係我地兩個人嘅事，你唔駛句句針對住我呀? 我地都係好朋友黎架… 」Grace不滿。
「我地係好朋友，但衣家係你變心傷害阿祖就係你唔岩! 如果調返轉係佢變心唔要你我一樣會話佢!」Mabel大義凜然咁講。
「既然你要講到咁，我都唔怕講喇… 其實我同祖分手調返轉你唔係應該係最開心果個咩?」Grace嘅眼神突然變左。
「我…唔明你講咩…」Mabel唔明白。
Grace:「其實我地咁熟，你估我真係睇唔出你一直都鍾意阿祖?」
「痴線!」Mabel立刻否認。
「女人嘅直覺係好準架… 而且睇你衣家嘅反應就知我唔會錯啦。」Grace十分自信咁講。
「我係替阿祖唔值啫，你唔好亂講!」Mabel繼續否認。
「認唔認都好，係咪真你自己心入面最清楚啦。所以我同祖散左，你咪有機會乘虛而入囉，扮咩替佢唔值搵我興師問罪啫，明明最開心果個係你。話唔定第日你會黎多謝返我添呀~」Grace卻帶住嘲諷嘅笑容咁講。
「我唔係你… 我從來無諗過…對我黎講，只要佢開心我就無所謂。而且當年仲係我鼓勵佢追你架，因為我知佢真係好鍾意你… 所以我先更加忍受唔到你傷害佢。」Mabel嘅語氣突然有d感觸同內疚。
「所以你終於認喇? 認你鍾意佢，認你偏心佢? 唔好同我講你咁大反應只係單純因為你當日有份鼓勵佢而內疚呀~」Grace食住上追問道。
Mabel回應唔到。