因為EX 我成為左一個禿頭嘅毒撚 然後遇到一隻猫: 42. 欲斷難斷

「曾經我真係相信自己有能力去改變佢，但原來點努力佢都係會有第二個，第三個，所以最後我都知我要放棄… 果陣我好唔開心，仲質疑自己係咪唔夠好，而之後都無再拍過拖，直至遇到你…」Leanne略帶傷感咁講。
 
「咁我都係適逄其會係你最需要有人陪嘅時候咁岩出現左係你身邊啫，唔係你都無可能會鍾意我…」我有感而發。
 
「你講得好岩呀… 知你已經有未婚妻我更加唔會… 但婆婆果身對我打擊真係好大，果刻我好唔開心好軟弱好想有人陪自己，結果你咁岩出現一直陪住我，又好了解我感受，然後就比你乘虛而入，仲一發不可收拾…」Leanne將個頭枕左係我心口講。
 
「所以係個天係緣份要我地一齊，抗拒唔到架… 如果對方唔係你，唔係我一直嘅女神同心結，我都未必會出軌…」我嘗試用衣個原因將我地嘅行為合理化。
 
「其實仲有一個原因令我易接受左同你咁…」隔左一陣，Leanne突然講。
 




「係咩原因?」我好奇問。
 
Leanne:「你仲記唔記得Cindy?」
 
我:「點會唔記得? 佢前排同佢個青梅竹馬結左婚嘛，不過上次見返你同你去食野果次講起佢你好似有d難言之忍咁。」
 
Leanne:「係呀… 其實佢過得並唔開心…」
 
我:「因為佢老公仲係咁偷食?」
 




「嗯… 其實佢結婚前都知，而且佢亦明白佢次次所謂嘅無下次都唔會係真… 不過佢話覺得大家由細識到大咁耐，佢已經無可能再搵到第二個人可以取代到佢。同埋佢覺得衣個世界其實個個男人都係咁，所以一係就接受衣個事實，一係就索性唔好拍拖唔好結婚唔好同男人一齊…」Leanne語氣有d無奈咁講。
 
我:「哦…所以佢選擇左接受衣個事實?」
 
Leanne:「係… 不過佢只係理性上接受左，但感性上唔得，所以佢都係會唔開心… 然後有日佢為左平衡自己心理，決定自己都要試下出軌…」
 
「我… 真係無諗過佢會咁…」坦白講我聽到真係有d驚訝。
 
「我都無… 但見住佢咁，再加上我父母本身同埋Henry嘅事，令我覺得感情同婚姻其實本身就唔可以信… 所謂一生一世都係得個講字唔會因為簽個名就guarantee到d咩。唔係話有心作假，只係改變要黎果陣根本無人可以阻止到，所以無人會知聽日發生咩事…  既然係咁，當事情真係要發生果陣倒不如唔好諗咁多及時行樂自己開心就算…」Leanne有d無奈同心淡咁講。
 




「我反駁唔到你…因為我都做緊相同嘅野…」作為出軌者的我，當然反駁唔到亦唔會想反駁，因為其實大家都需要一個說法去說服自己做緊嘅野係合理。
 
「不過雖然係咁諗，但我其實仍然覺得好內疚呀… 好彩我唔識你女朋友… 而同一時間我覺得自己都越黎越鍾意你…」Leanne攬實我咁講。
 
我:「我何嘗唔係? 不過既然已經決定左發生左，就唔好再諗，好好咁enjoy我地衣幾個月啦~」
 
「嗯… 我都決定唔比自己再諗衣d野，我要開開心心咁同你過埋衣段時間!」Leanne換上左個笑容咁講，而衣個仙子般嘅笑容，令我忍唔住又再次壓上左佢，誓要再次將仙子拉返落凡間。
 
 
發生於關係後，我能夠感受到Leanne對我更加完全開放晒自己，之後我同佢嘅關係更加親密，二人亦都越愛越深，完全唔再諗四個月後會發生嘅事。不過雖然Leanne真係好靚，但為左避免佢唔開心同諗多，我地發生左關係後我都唔敢經常有咁嘅要求，只係間中情不自禁先比佢自然下發生。
 
然後三個月好快就過左。衣三個月係充實又難忘，好似發生左好多事咁，但偏偏感覺時間又過得好快。係結婚前一星期，縱使真係好唔捨得，但我知道我係時候要完結衣段關係。
 
你問我有無諗過放棄Mabel然後同Leanne一齊，當然有諗過，但都只係限於喺諗嘅層面。同Mabel經歷過咁多野，雖然我唔係道德撚，但作為一個人有嘅道德約束都令我知道我無可能咁對Mabel。
 




而另一個我無諗過嘅感覺係，雖然Leanne仲係好靚，我都仍然好鍾意佢，但對佢果種迷戀或者夢想嘅感覺已經隨住同佢亳無保留咁愛過一段時間後慢慢淡化左唔少。原來女神，真係要係得唔到嘅情況下先會存在。而若果有日你有幸得到左後，佢就唔會再係你嘅女神，而極其量只係你一個好鍾意嘅女朋友。唔係話佢會變差或者你唔再鍾意佢，只係種感覺或者desire係真係有分別。當然，衣段感情同回憶，我知道絕對係一世難忘，足夠我回味一世，亦會成為我衣一生一個非凡嘅成就。
 
不過我以為因為大家最初一早已經有共識，到衣日來臨嘅時候，Leanne嘅感受同反應唔會太大，點知當我同佢講要完果刻，佢竟然會崩潰左。
 
唔知係睇得電視劇多定男人真係鍾意用goodbye Q去講goodbye，之前對Mabel又好衣家對Leanne都好，我都係選擇左係同佢地攪完後講分手。
 
「Leanne，過埋今日我地要完喇…」大戰完後我攬住Leanne略略休息左陣後講。
 
「下? 你下星期先結婚，點解要咁快完?」Leanne好緊張咁問道。
 
「始終我都要調節心情… 無可能等到結婚果日先完。而且我地都知總會有衣一日…」我有少少意外，所以嘗試解釋。
 
「你…真係捨得我?」Leanne有少少口齒不清咁問。
 
「唔捨得… 但我無其他辦法…」我輕輕撫摸住佢個頭頂講。




 
「我都好唔捨得… 不如我地唔好完住啦，我接受唔到同你就咁完突然無左你呀…」佢將個頭貼近我胸口然後攬實我哀求道。
 
「就算我地再一齊多幾日，之後都係要完… 無意思架…」我嘗試保持理性。
 
「我就係唔捨得… 不如我地繼續一齊呀，就算你結左婚我地都可以繼續偷偷地一齊架…」見我堅決Leanne真係亂左方寸開始心急提出左繼續落去嘅提議。
 
「傻架咩… 我地唔係一早講好左過左衣四個月我地就一刀兩斷?」我有d愕然然後自然反應咁講。
 
「係呀，但我接受唔到，我想反口，我衣家先知我唔可以無左你呀!」Leanne開始失控攬實左我邊喊邊講。
 
「傻妹… 你係一時激動先會咁諗架咋… 冷靜之後你一定會後悔，我唔值得你咁架…」我嘗試用氹嘅方法想佢冷靜。
 
「所以你主意以決? 無論我點你都唔會改變主意?」Leanne抬起頭梨花帶雨咁問我。
 




「係…」我猶豫左陣然後都係艱難咁講出左衣個字。
 
「我憎死你呀!」絕望嘅Leanne離開左我懷抱好快著返衫然後就走左。望住佢嘅背影我好想留住佢，但我知我唔可以… 本來我以為Leanne雖然傷心，對住佢我亦好內疚，但件事都總算可以告一段落。但點知果晚我又收到Leanne嘅message。
 
「對唔住… 我知我地本身講好左，今日我嘅反應唔應該咁大… 但我真係好唔捨得你… 我地真係唔可以繼續?」
 
「我都唔捨得，但咁對你對我都唔好，我地始終係無結果…」我回覆。
 
「咁… 我地可唔可以一齊出多去最後一次?」Leanne見我堅持再退而求其次。
 
「唔好咁啦，就算見完都係無意思架，只會令大家越黎越唔捨得…」但面對對方驚人嘅魅力，我都有d驚衣個最後一次反而令大家無限咁有最後一次。
 
「我明白喇…」Leanne貌似放棄。
 
到到第二日，Leanne又send message比我




 
「我岩岩book左酒店呀，今晚可唔可以黎搵我?」
 
「唔好咁啦…我知我黎只會害左你，所以我唔會黎架…」再三掙扎我都係拒絕左，而再次証明女神得到左後就再唔係女神衣個講法。
 
Leanne:「我做到咁你都唔肯再見我? 你真係咁絕情?」
 
我:「對唔住，但我真係為你好…」
 
Leanne:「其實我係咪真係好差好唔值得人鍾意? 點解當年Henry係咁，衣家你又係咁?」
 
我:「唔係… 你好好，只係我地有緣無份係錯嘅timing重遇… 我相信你將來會搵到專屬於你嘅幸福架!」
 
「但我淨係想同你一齊… 點解我地唔可以好似之前果四個月咁咩都唔諗繼續一齊? 點解我以前咁蠢唔鍾意你唔接受你… 點解我地唔可以有second chance…」我感受到Leanne又開始崩潰。
 
「我地之前可以咩都唔諗，係因為我地知道四個月後會完… 但如果諗住無期限咁落去，我地就會有避忌，唔係遲早都會出事…」我保持理性分析比Leanne聽。
 
「你講過你得到左我後唔會唔鍾意我架… 你呃我!」但當然唔會有任何作用。