因為EX 我成為左一個禿頭嘅毒撚 然後遇到一隻猫: 37. 淪陷
結果衣晚我地又去左太平山睇夜景。今晚嘅Leann雖然都係心事重重咁嘅樣，但至少比琴晚狀態好返唔少，貌似亦無喊過。
「多謝你今晚又黎陪我呀…」望住大地在我腳下嘅夜景無耐佢講。
「客咩氣呀，我都唔知幾榮幸可以陪你~」我嘗試繼續講笑等個氣氛可以輕鬆d。
「榮幸?」佢有d唔明白。
「我相信衣個世界無一個男人會視陪女神睇夜景為一個苦差~」我解釋。
「喂呀… 女咩神呀… 都係普通人一個啫…」女神聽到有d唔好意思。
「我仲好記得大學果陣有幾多男同學為你而著迷，日日跟住你尾… 就算到到衣家你睇公司班男同事有邊個唔係成日向你獻殷勤?」我提出實証。
「咁你呢? 所以你送野比我又陪我都係同佢地一樣?」但估唔到Leanne會有此一問。
「正如頭先所講，無男人會視陪女神為一個苦差，而我都係一個正常嘅男人…」我唔想太假咁否認。
「原來你都係咁…」我睇得出Leanne聽我講完後個樣有少少失望，或者佢真係希望有一個男人可以對佢係唔一樣，當佢只係一個正常普通嘅女仔。
「不過… 我當然同佢地有唔一樣啦。首先，我地識左好耐，所以我了解你，你就算唔講外表，都係一個好溫柔、善良、善解人意、純真唔造作嘅女仔。只要真係認識你，就知你無其他女神果種高高在上嘅感覺。」但同時間我當然唔會直認。
「但你唔係話我果陣傷害左你?」女神問。
「咁感情無得勉強嘅，而且雖然最後你同左另一個一齊，但我都唔覺你係有心玩我或者想收我做兵果d，只係我唔夠好令你鍾意我啫…所以唔可以怪你~始終唔係你鍾意人就代表人地要鍾意你，雖然當時我都真係好唔開心…」我解釋當時理性嘅感覺。
「對唔住…」聽到我咁講Leanne有少少唔好意思。
「傻啦，事實上唔係咁，我都唔會同衣家個女朋友一齊~」而我當然唔想女神為此內疚或者有負面感覺，佢衣刻本身已經夠負面。
「原來咁反而係我幫左你!」果然聽得出Leanne聽完我咁講後即刻放鬆左唔少，無左內疚仲覺得自己做左件好事咁。
「係呀，所以應該我要多謝你先岩~ 另外仲有就係當你琴晚同我講你婆婆過左身，其實我好明白你感受…」
「因為你爸爸?」以前同Leanne傾過咁多偈，所以佢知我老豆係我中學果陣就交通意外過左身。
「嗯… 當時我都同你一樣，所有野黎得好突然，根本完全無心理準備… 所以我好明白果種心碎同絕望嘅感覺，因為我地唔會再有可能可以見到佢地同佢地傾偈… 亦因為咁，我好明白衣個時候所有安慰同鼓勵嘅說話其實都唔會有用，最有用一定係身邊有人可以陪住自己走過衣段時間。我果陣都比你好少少，因為我有媽咪同我一齊過，而你就真係得你一個人… 所以我知衣段時間，你好需要人嘅關心同陪伴，特別係一個了解你感受或者可以令你安心嘅人… 而我，好希望自己可以做到幫到你嘅角色。」諗返起老豆過身果陣，我都神色一黯講道。
「祖… 多謝你… 其實我真係好傷心好辛苦… 你係咪真係可以幫我?」Leanne聽完我講，壓抑左成日嘅負面情緒又比我引發左出黎，開始係度喊。
其實當我地唔開心果陣，有一個了解自己感受嘅人係身邊真係幫到好多，有時甚至可以一下子拉低晒我地本身對人嘅戒心同防備，將自己最軟弱嘅一面完全裸露係對方眼前。
「傻瓜…喊啦，將所有唔開心嘅野喊晒出黎，唔好收埋收埋，我會一直陪住你同你一齊渡過衣個艱難嘅時間…」望住衣刻咁軟弱咁Leanne，我好自然咁將佢抱左入自己懷內，然後由佢嘅淚水沾濕自己膊頭上嘅襯衫。
衣個時候，我諗起當年Mabel都係衣個時候比左溫暖我，雖然係以另一個激烈百倍嘅方式… 突然間我意識到衣家咁好似有d問題，但又無理由衣個時候推開Leanne，所以我努力收斂心神唔比自己多諗，就只係輕輕咁拍住Leanne嘅背脊以示安慰。
然後過左唔知幾耐，Leanne哭聲漸止，亦意識到自己失態就係我懷裏走返出黎。
「唔好意思呀，攪到你件衫濕晒…」
「傻啦，衣件衫我唔洗架喇，比你d fans知道佢充滿住你嘅眼淚應該會肯用天價買佢返去日日聞~」唔想大家尷尬所以我講笑道。
「喂呀! 你再係咁我唔睬你架喇… 」Leanne露出個難為情嘅表情，但又好似對我撒緊嬌咁，果刻我感受到我個心不按規律咁跳動左幾下。
「講笑啫~ 佢地天價買我都唔肯賣啦~」但表面上我扮無事繼續講笑。
「史德祖!」而Leanne亦終於破啼為笑。
經過衣一晚後，我同Leanne之間好似突然間完全無晒隔膜咁，大家都會keep住傾偈又咩都會講。而或者Leanne衣段時間真係太需要人陪伴幫佢分散自己嘅注意力，所以之後我地不時亦繼續有約出黎食飯然後再去唔同嘅地方睇夜景。飛鵝山、獅子山、畢架山、青欣山甚至嘉頓山我地都有去過，而有時我地又可能只係傾住偈咁遊下車河。慢慢地我地好似都習慣左有對方係身邊或者message上嘅陪伴。除左每日無間斷嘅訊息，我亦都習慣左一星期總會預留幾晚時間陪佢去散心，大家都不自覺咁習慣左對方嘅陪伴同依靠，成為左對方生活上嘅一部份。
好快我其實已經意識到有d唔妥，但因為佢係Leanne，係我曾經心目中嘅一個夢，所以我潛意識忽略左衣種唔妥嘅感覺，自己催眠自己只係陪伴一個朋友走過衣段艱難嘅時間叫自己唔好諗多。直至有晚我同佢上左火炭個半山欣賞緊成個沙田景色時佢突然同我講
「祖，多謝你衣段時間一直陪住我，我好返好多喇… 所以不如今晚後我地都係保持返距離唔好再咁單獨見面?」
「點解?」我明知故問。
「因為你好快就係人地老公喇，咁落去唔好…」Leanne唔敢望住我，只係望住山下風景有d難過咁講，但我睇得出佢隻眼係out focus緊。
「咁我地係好朋友啫~問心無愧咪得囉…」我仲想自欺欺人。
「但我驚再係咁落去我會於心有愧呀…」但Leanne無比我地咁做。
「Leanne…」
「係我最傷心黑暗嘅日子，你突然嘅出現比左好大嘅溫暖我。衣段時間你成日陪住我，令我不自覺咁習慣左有你係身邊陪伴同照顧嘅日子，習慣左有你可以依靠… 初初我都仲可以同自己講朋友啫，我唔開心所以需要個了解我嘅朋友陪伴同關心，that’s it。但慢慢我發覺自己開始會掛住你然後成日想搵你，如果有段時間你無覆我我會唔開心，會擔心你… 我唔可以再比自己沉落去喇… 因為我知道你係人地嘅未婚夫，咁只會傷害自己…」Leanne一口氣講晒自己心入面嘅感受。
雖然我唔係無諗過Leanne鍾意左我嘅可能性，但以往嘅經歷令我一直都相信衣樣係唔可能會發生嘅事。所以聽到Leanne突然嘅表白，我有d驚訝，但更多係開心。我知道德上我唔應該留住佢，但以往對佢嘅迷戀加上衣幾年同Mabel相處亦真係越黎越平淡，衣家衣種久違了嘅心動感覺令我猶豫，然後好自私咁選擇左另一個決定。