因為EX 我成為左一個禿頭嘅毒撚 然後遇到一隻猫: 33. Mabel的自白
「唔知…」諗起我地第一次發生關係果次佢有想講但我阻止左佢。
Mabel:「我地細細個就認識，由細玩到大，你又一直好照顧我，本身我對你已經好有好感，但要講真係比你吸引到，其實係小學一次嘅陸運會。你仲記唔記得我地小學有個同學叫郭小東?」
「記得…」我仍流住眼淚咁點頭。
「小三果陣有次因為佢蝦我你為左幫我出頭就同佢起左爭執…然後唔知點解，你地嘈嘈下就變左相約要係陸運會入面一決勝負…」Mabel邊回憶邊講道。
「因為果陣佢成日覺得自己跑得好快，所以我先揚言要係佢最自豪嘅地方打低佢…」經Mabel提起我都開始諗返當時嘅畫面。
「原來係咁… 但你記唔記得最後嘅結果?」Mabel笑住咁問。
「結果因為太緊張… 我起跑無耐就唔小心kick到自己跌左係地下，最後贏唔到不突只仲跑包尾添…」諗起當時情況我都不禁苦笑左下。當時應該都算係我以前作為一名型男少有嘅柒事。
「係… 其實果時你起返身已經被遠遠拋離，但你都無放棄好努力咁繼續盡全力跑去完成賽事，之後我問你點解明知輸仲要咁落力跑，你話就算輸左個比賽，都唔可以輸比自己。參加得比賽就要盡全力，咁係對自己同對比賽嘅尊重，唔係參加黎做咩?」Mabel 有d懷緬咁講，仲模仿埋我當時嘅語氣。
「我有講過d咁嘅野咩?無咩印象…」但我就唔記得自己講過衣堆說話。
「果刻其實我都唔係好明，心入面仲覺得你有少少傻… 而因為你輸左比賽，結果之後就成日比果個郭小東笑。但之後你卻出乎意料咁忍得，無再同佢鬧交。然後我發現你喺之後果年放學後成日自己一個會偷偷地咁去練跑，不斷咁係條小徑度來回跑好多次，結果到到第二年嘅陸運會，你贏返佢仲一口氣拎埋冠軍。果刻我真係覺得你好charm好有型。
以前雖然我好鍾意嘗試好多唔同嘅野，但就全部三分鐘熱度好易半途而廢。直至果次見到你唔肯放棄同唔肯認輸嘅精神，我就比你感染到，然後我同自己講我都要好似你咁，所有野都唔可以再輕易放棄，一定要堅持到底，因為只要堅持就一定會有回報! 而同時果刻開始我就鍾意左你… 不過好笑嘅係你果年贏左後就無再參加短跑比賽，激到個郭小東紥紥跳~」Mabel講到最後又忍唔住笑起上黎。
「哈哈…贏左梗係唔會比機會佢報仇啦，我本身又唔鍾意跑步嘅，出返啖氣後就無理由為佢仲繼續keep住練跑架? 但我又唔想再輸比佢喎，所以咪索性唔再參加囉…」我稍作解釋。
「嗯… 之後到中學你籃球學屆你因傷輸左後，我明你有幾唔開心… 而為左追趕你嘅步伐，我都入左排球隊，然後開始地獄式嘅訓練。其實果陣好傻… 單戀你嘅感覺並唔好受，而得到你鼓勵後我仲下定決心同你表白，點知原來你明明知道都扮唔知道… 不過我同自己講，你已經示範過努力堅持就會有收獲比我睇，所以我都要努力証明衣樣野，我同自己講如果我搏命練波，最後可以贏到學屆，咁就証明衣套理論係真係work。咁只要我繼續堅持，總有日你會比我感動到鍾意我… 而結果我真係贏到學屆，亦因而令我更加堅信，只要繼續係你身邊，終有一日你會比我感動到鍾意我…
之後無耐，我地竟然真係發生左關係，然後再發展成…SP… 果陣面對你嘅忽冷忽熱其實我好唔開心，亦好疑惑我喺你心目中到底係咩嘅存在? 有時感覺仲好似衰過以前做buddy果陣咁… 但我都無諗過放棄，那怕入左大學之後你越黎越少搵我，我都仍然堅信會有可以同你一齊嘅一日，直至果晚你話我地唔可以再繼續咁落去，就算我點求你你都唔肯繼續比我留係你身邊…
果刻我終於知道我真係唔可以繼續鍾意你喇，原來有d野真係唔係努力就得，特別係感情，付出同收獲係可以完全無關係無得勉強… 當然要接受其實好難，我亦曾經好痛苦… 但好彩我男朋友一直無放棄過我，然後我先終於明白，有時唔好咁執著學識放低，我地先可以行得更遠… 原來我一直堅信嘅野唔一定係岩… 又或者一開始我就當錯左感情係比賽啦… 所以阿祖，其實我講咁多野你聽，都係想話比你知，衣刻你可能好難受，好唔想放棄，但過來人嘅身份話你聽，其實只要你肯放下，所有野都會變得唔一樣，你會豁然開朗，然後有另一個新嘅人生… 如果我傻左咁多年都可以，你又點會唔可以?」
聽完Mabel嘅剖白，我只係感到更加後悔忍唔住喊得更加大聲。
「你好好保重喇，多謝你份禮物，令我可以完全放低埋對你嘅恨同遺憾… 希望有日你會搵到你嘅幸福…」 講完Mabel就轉身走左去。
最心痛是 愛得太遲
有些心意 不可等某個日子
「又播音樂?」空中嘅我突然聽到背景音樂於是表達不滿。
「唔岩聽? 咁換歌囉。」貓仙人選擇用衣個方式對待我嘅不滿。
後來 我總算學會了 如何去愛 可惜你 早已遠去 消失在人海
後來 終於在眼淚中明白 有些人 一旦錯過就不再
「唉…」歌詞實在太中，我忍唔住嘆起左一聲。
「係咪更加了解自己真實嘅一面?」貓仙人問。
「衣個世界嘅我咁對Mabel，最後咁都可以話係我自己咎由自取。正如岩岩句歌詞，有些人 一旦錯過就不再，原來有d感覺無左就係無左，就算之前幾鍾意都好…」我感觸地講。
貓仙人:「愛得越深，傷害就越大，大到某個位，人一係就要醒悟，一係就要死架喇。」
「係嘅… 我真係太仆街，點解果陣我唔可以早d識珍惜?」我問左一個老生常談嘅問題。
「因為你地人類都係犯賤，對你好就唔會珍惜，然後係要無左先識後悔。你曾經對Leanne好好佢都係一樣唔領情架。」而貓仙人都係比左個老生常談嘅答案。
「係喎，到底女神係點比人溝走架?」唔想再糾纏衣個題目，我乘機轉話題問道。
「黎緊你會有機會知嘅，唔駛太心急。」貓仙人無直接答我。
「咁衣個世界最後嘅我又係點?」
貓仙人無出聲，下面嘅世界開始以超快鏡而運轉。首先Mabel之後都同原本世界一樣同男朋友移民去左外國。而我因為Mabel件事大受打擊，之後雖然憑住個樣要出Pool其實都唔難，但就總係覺得之後出現嘅女人個個都唔及Mabel，然後拍拖無耐就分手。而因為一直後悔自己無好好珍惜Mabel，日日活係懊悔當中，自暴自棄加上心境變化令我慢慢我又好似原本個世界咁變左一個肥佬同開始脫髮，之後就連短暫嘅女都溝唔到，孤獨終老。
「結果我都係做唔到Mabel嘅提醒，放唔低執著結果行返衣條路…」見到衣個世界嘅我最後嘅結果，我都感到好唏噓。
「正如你個青梅竹馬所講，本身你就係一個好頑強好唔願意認命嘅人，但衣d人一旦受到打擊信念破滅接受唔到事實，就好可能會變得一蹶不振，所以衣兩個世嘅你最後都攪成咁。相反，佢因為你反而領悟到”放下”衣兩個字然後搵到幸福。」貓仙人解釋。
我:「咁衣個世界嘅我好似仲慘d添… 係喎，點解衣個世界阿媽無介紹阿敏比我識嘅?」
貓仙人:「唔好睇少你阿媽，佢大概都知你同Mabel嘅事，加上你之後都有好多短暫女朋友，所以佢無原本個世界咁擔心，然後到擔心果陣已經miss左搵阿敏嘅時機。」
「原來係咁… Mabel… 好似個個世界同佢最後都係攪成咁… 有無一個平行時空係我同Mabel可以一齊? 睇完岩岩衣個世界，我覺得好可惜… 但其實我都好有疑問到底衣個世界嘅我係咪真係咁鍾意佢? 明明之前都完全唔著緊，但後期就突然變到咁，仲催毀埋自己嘅一生添… 其實我係真係鍾意Mabel，定只係唔願意接受現實?」我又提出左疑問。
「你地人類d感情就係咁攪笑，亦未必有得解釋。你地唔係好興有句”只有失去左先識珍識”同同埋”得唔到先至係最好”?
鍾意或者愛係一個由感覺引發嘅行為，但其實後悔同唔甘心何嘗唔係一種感覺? 講穿左其實可能都只係一個心魔。愛唔愛本身就係一種感覺，所以又邊有得話係咪錯覺? 其實上一個世界嘅Grace可能都係一樣。佢會咁落力追返你可能都係因為佢接受唔到自己輸左比第二個，接受唔到自己嘅野比人搶走，特別係佢仲要咁好勝。而衣個”唔想失去”嘅感覺令佢覺得自己真係仲好鍾意你，就正如你一直都以為自己好鍾意Grace一樣…
或者你可以咁諗，唔係因為失去左所以先發現自己鍾意然後後悔，而係因為失去左所以先至鍾意然後後悔，先後次序係唔同。無左失去衣個因，其實就唔會有好鍾意衣個果，或者”失去”本身就係一種感情催化劑，無左衣個chemical，就永遠唔會有相對嘅reaction令你感情轉變。只係你地人類接受唔到因為失去而鍾意一個人衣個解釋而堅持說服自己只係以前無發現無珍惜啫。
Anyway，正如頭先所講，鍾意係一種感覺，所以感覺係點其實咪就係點囉，無話真定假亦judge唔到係真定假。我只可以話比你聽唔同世界發生嘅事係點，然後再等你自己慢慢去推敲同領悟。就算係我講嘅野，都唔一定係事實。始終你地唔係我創造出黎，我都只可以憑我咁多年嘅觀察同經驗講我嘅感受同推測你聽。你地人類，有時真係好複雜，好難理解同猜透。」
「係嘅… 衣d問題可能根本就無答案，唔好諗得咁複雜可能自己會舒服d…」聽到貓仙人都會無啦啦加句anyway又用埋judge, chemical, reaction衣d 英文terms，學足我地香港人嘅語言，其實我有種好怪嘅感覺，但都廢事深究了，因為我自己衣刻都有d亂。
「岩呀，隨心而為，明嘅就會明，唔明嘅逼自己諗都唔會明。黎緊我地去嘅果個世界，可能一次過滿足到你兩個願望。」貓仙人唔再同我糾結係衣個話題。
「咁我地快d去啦，太sad喇衣家…」而我都想快d離開衣家個氣氛，唔想再諗住。
「咁你仲唔唸咒?」貓仙人眼尾哨一哨我。
「貓仙人醒，貓仙人勁，貓仙人無得頂，喵喵喵chance~」因為心急又已經慣左，所以今次我好爽快就開始唸咒。