因為EX 我成為左一個禿頭嘅毒撚 然後遇到一隻猫: 31. All Lost

無傷心太耐，我又繼續周旋係Cindy同Leanne兩者中間。其實雖然同Leanne熟左，而我對佢亦超好，成日噓寒問暖又會主動關心佢，佢有野搵我幫手我亦從無托佢手肘，但佢一直比我嘅感覺都真係只係當我係朋友。反而同Cindy，唔知係咪因為佢失戀下意識想搵寄託，對我好似慢慢都有d意思，我地會開始私下見面，間中大家嘅對話都會有少少曖昧成份。
 
兩三個月後，其實我覺得只要開口，我就可以同Cindy正式一齊。同Cindy相處，我地真係好岩傾好多話題，所以雖然一開始我無衣個動機，但慢慢我對佢都真係動左心，亦覺得會有同佢一齊嘅一日。只不過另一方面我亦知道如果我同Cindy一齊左，咁代表我同Leanne都唔會再有可能，因為佢地兩個咁friend，無可能會接受大家鍾意同一個男人，又或者係一d傷害到對方或者大家感情嘅行為。雖然其實本身我都覺得同到Leanne一齊嘅機會唔高，但人就係咁，只要有一絲嘅可能你都會唔捨得放棄，特別佢仲係自己嘅女神，於是我地就陷入左膠著嘅狀態。
 
直至有日，Leanne突然搵我同我講，Cindy決定同返佢個青梅竹馬一齊，仲怨我咁耐都唔行動，我先醒悟我可能一直錯判左形勢。
 
知道左後我立刻message Cindy。
 
我:「點解咁大決定唔同我講呀?」
 




「點解要同你講?」點知一開始就比佢反問返轉頭，而我唔知可以點答。
 
我:「咁我地都算係…好朋友呀?」
 
Cindy:「OK，咁我衣家以好朋友身份同你講聲我同Johnny復合左喇。」
 
「…其實我以為我地唔只係好朋友…」雖然感受到對方唔太善意嘅語氣我都照硬住頭皮咁講。
 
Cindy:「我都以為係… 同佢分左手後，我一直希望有人出現可以救我走，之後你真係出現左，而衣幾個月我其實一直都等緊你開口…」
 




我:「咁點解咁突然同返佢一齊都唔同我商量下先?」
 
Cindy:「因為我終於諗通左點解你一直唔開口。」
 
我:「下?」
 
Cindy:「你好似忘記左我同Leanne有幾熟? 而且一開始我比你加入佢黎陪我，本身就係為左造就機會比你地，只係當時我無諗過最後反而係自己陷左入去啫…」
 
我:「所以你諗住讓愛?」
 




Cindy:「唔係… 只係因為我知道你一直唔開口係因為唔捨得放棄佢…」
 
「我無呀… 只係我一直唔敢開口…」雖然比Cindy講中左但我仲想狡辯。
 
「唔駛扮野喇… Leanne個傻女有時會將你地嘅野講比我聽…佢本身係想幫你講好說話，不過我一聽自然就知道你係想對佢示好啦…」可惜Cindy並唔係蠢。
 
「對唔住…」我只好又講衣三個字。
 
Cindy:「唔駛對唔住，本一開始身你個目標就唔係我啦，只係有d意外發生左啫… 而且既然你同佢一樣都唔係一個專一嘅人，咁點解我唔索性接受返佢? 始終我地由細識到大，佢一直都係我身邊一個好重要嘅人… 再講，咁咪可以等你專心focus 係Leanne度囉…」
 
到果刻我先知原來衣幾個月Johnny一直哀求Cindy比多次機會佢，Cindy一直猶豫係因為我，而我最後嘅行為卻令佢失望，因為我話緊比佢聽我同Johnny其實都係同一種人…
 
「對唔住… 除左衣句我唔知仲可以講咩… 希望你今次個決定係無錯啦…」事以至此，我都只可以接受現實。
 
Cindy:「將來嘅野無人知嘅，你都比心機啦，不過你條路好可能比我更加難行…」




 
果陣我並無特別張衣句說話放係心，以為佢嘅意思係因為Leanne衣個女神本身就好難追。直至後來我先知原來衣句說話係佢對我最後善意嘅提醒，亦解釋緊點解佢話佢唔係讓愛，因為除左佢睇穿左我唔專一外，佢亦一早就知我同Leanne一齊到嘅機會真係好低。
 
知道左Cindy同Johnny復合左後，Leanne都無再為我同Cindy製造咩機會。但因為我地熟左，所以我地都會好似好朋友咁繼續傾偈，有時仲會單獨出下街食飯，佢有唔開心又會同我講下。但因為我一直感受唔到佢對我有果種感覺，所以我亦一直唔敢表白或者做d咩過界野，因為一做可能之後就連朋友都做唔成。突然間，我親身體會到當日Mabel 70/100蚊嘅比喻，雖然本質上我同Mabel以及我同Leanne原本嘅感情根本就無得比較。
 
而繼續過左我都唔知算唔算係兵嘅幾個月生活後，Leanne對我嘅態度都開始唔同左，變得冷淡，約佢出去亦經常會拒絕。
 
「其實我係咪做錯左d咩?」有日我終於忍唔住問佢。
 
Leanne:「無呀。」
 
我:「咁點解你對我好似冷淡左咁多?」
 
Leanne:「其實我都唔應該再瞞你… 因為我唔想我男朋友誤會呀…」
 




「男朋友? 幾時嘅事? 之前完全無同你提過嘅?」Leanne嘅說話就好似流星錘咁一野打左落我個心口度，好彩我地係隔住螢光幕咁傾而唔係面對面，我仲可以裝作若無其事咁問。
 
Leanne:「其實我都唔知點講起好… 初初我都無諗過自己會鍾意佢甚至同佢一齊，不過有時有d感覺就係突然咁發生… 點都好，因為我已經唔係單身，所以希望你明白我要有返d避忌，對唔住呀…」
 
「我可唔可以問下你，你對我其實係咪從來都無任何感覺?」衣個問題好似每次電視劇入面相似橋段都會問。
 
Leanne:「嗯… 我一直都當你係好朋友，同你相處都好舒服。不過自從鍾意左我男朋友後，我就知我對你唔係果種感覺。」
 
「明白… 咁… 祝你以後幸福快樂啦~」心裏正滴著血，但我仲係扮無事咁祝福佢。
 
Leanne:「多謝~」
 
結果衣兩段曾經貌匃有發展可能性嘅關係，就係咁全都係亳無先兆下完結，我繼續都係A0。
 
 




果晚萬念俱灰嘅我突然間諗起Mabel，果刻我好掛住佢好需要佢。
 
「Here?」掙扎左陣我拎起電話send左句message 比佢。
 
「?」但佢嘅回覆就好似一盤冷水咁淋左落黎，咁耐以黎佢都未試過就咁一個符號回覆我。
 
「今晚可唔可以陪我?」但我當然唔會就咁放棄繼續嘗試。
 
「… No…」結果係另一盤嘅冷水。
 
「我知我之前好過份，但我真係好掛住你好想見你…」我再退一步。
 
「haha，衣句說話我等左咁多年竟然終於有機會聽到。不過Sorry… 我已經有男朋友喇，如果你仲係咁，我覺得我地最好唔好再溝通。」但Mabel嘅答覆繼續令我大吃一驚。
 
之後任我再講d咩，Mabel都唔再應我，然後我先意識到連Mabel都選擇左離開我。




 
(Mabel都已經有男朋友? 曾經咁愛自己嘅Mabel都會鍾意左第二個? )
 
衣個打擊可能比Leanne同Cindy對我嘅打擊更大，我一時間竟然真係接受唔到。