因為EX 我成為左一個禿頭嘅毒撚 然後遇到一隻猫: 29. 女神

做得女神，Leanne嘅外表當然係無可挑剔，高瘦，有腿有胸，大眼高鼻，皮膚白滑，樣貌上亦仙氣十足，可以話係朱菌嘅面孔搭上陳法拉高峰時期嘅身型。而隨左外表之外，Leanne把聲亦十溫柔動聽，我相信無一個男人會唔鍾意聽到佢把聲。無誇張咁講，Leanne絕對可以話係集天地靈氣於一身嘅女仔。
 
但既然咁完美，自然唔難想像到底有幾多狗公會埋佢身。本身Leanne並唔高竇，但因為真係吸引左太多男人埋身佢根本無力應付亦覺得好煩厭，所以久而久之，佢選擇左咩男人都唔理，甚至有日突然傳出原來佢係lesbian嘅消息，先慢慢少左半堆狂蜂浪蝶埋身，
 
點解我會識佢呢? 係我原本個世界，因為佢太過出名，我當然都知有衣個人物存在，亦確實好難唔為佢而心動。不過因為當時已經有Grace，亦坦白講知自己根本唔會有機會，所以就無再多諗。而心水清嘅讀者應該亦留意到Leanne衣個名其實係上一個世界都有出現過，因為佢仲有另外一個身份就係同Cindy係好friend嘅死黨。果陣因為同Cindy略帶曖昧嘅關係而Leanne都知衣件事，所以就更就加唔會諗。到最後我好快懸崖勒馬同Cindy再無聯絡，咁同Leanne就更加唔會有任何交匯。
 
但因為之前有段時間真係同Cindy好friend，所以間中佢都有講下佢衣位死黨嘅野我聽。例如Lesbian只係煙幕，為左唔想再比成堆狗公不停纏擾，佢有個friend提議佢不如扮Les，咁應該好多人會知難而退。之後佢就係搵左個女性朋友同佢拖住手咁遊左花園兩個圈，雖然未至於話清零，但確實令到搔擾佢嘅人數少左至少一半。至於仲有另一半，除左因為衣個世界總會有d男人過份自信，覺得自己有一日可以將女神拯救出黎，將佢變返直外，我相信都係因為Leanne魅力真係太大令佢地難以忍心放手。
 
衣個世界嘅我因為無Grace衣個女朋友，A0嘅我又對拍拖充滿憧憬，所以由我第一眼見到Leanne果陣我就已經淪陷，深深咁比佢吸引住。而亦因為我無女朋友嘅關係，衣個世界雖然我同Cindy都熟，亦因為Carter多左好多話題，但從day1開始，佢對我始終都會好似對其他男同學咁有一層避忌，唔會比自己同我太熟太多deep talk，所以衣世我地就真係只係好朋友而無發展出其他超越朋友嘅感情。
 




而有日當我意外知道左佢同Leanne係死黨果陣，我自然唔會放個衣個機會，係咁叫佢搵機會介紹Leanne我識。Cindy敵不過我嘅煩擾，亦本住鍾意Carter嘅人唔會係壞人衣個邏輯，所以係一次偽巧合嘅安排下，我終於真正近距離接觸同認識到衣位迷到萬千少男嘅中大女神。
 
可能因為Cindy嘅緣故，Leanne對我並唔算冷淡亦無咩戒心，所以認識左後好快我就拎到佢嘅MSN同電話，然後展開左我地嘅對話。
 
Leanne對我唔算冷淡但又唔會特別熱情，基本上我撩佢佢都會覆而且唔算太hea，但又從來唔會主動撩返我傾偈。如果我想約佢出街呢，佢就會用唔同原因拒絕我或者提議約埋Cindy一齊。不過其實都正常嘅，女神又點會咁易追，所以我都係一方面間中繼續搵Mabel出火一方面繼續等同Leanne可以熟d嘅機會。而一個契機就係幾個月後Cindy發現左佢青梅竹馬嘅男朋友出軌。
 
 
因為衣個世界入面我同Cindy雖然熟，但並唔似原本世界咁熟到會互相分享大家拍拖嘅事，所以當佢發現佢青梅竹馬嘅男朋友有第二個果陣，佢並無同我講而係同返佢嘅好朋友Leanne講。而我之所以會知，係因為咁岩當Cindy搵Leanne果陣，我本身都同Leanne係MSN傾緊偈。
 
「Cindy喊晒咁搵我，我要即刻出去陪佢，唔同你傾住喇!」然後佢突然留低左衣句說話比我後就off左line。




 
因為同Cindy熟，聽到Leanne咁講我都有d擔心，但又唔方便問，於是等到第二日再見到Leanne online我就立刻問佢發生咩事。
 
「都係你地d男人衰囉! Cindy發現左佢個男朋友有第二個…」可能知我都Cindy熟又或者佢忍唔住好想鬧下d男人，所以佢亳無避忌咁講左個原因我聽。
 
「竟然? 佢地由細識到大，感情好好架喎…」我感到驚訝但又唔算真係好意外。
 
Leanne:「就係咁先過份! 所以男人真係無一個信得過… 幾親都係會出軌…」
 
「咁又唔會全世界嘅男人都係咁嘅…」我決定為全世界嘅男人，抱括自己defence一下。




 
「咁你唔係?」 而Cindy嘅問題令我突然心跳加速，莫非佢對我有興趣所以咁問?
 
「我梗係唔會啦! 我到衣家都未拍過拖就係因為我認真!」我把握機會回應sell下自己。不過打完衣句我又諗起Mabel，心入面立刻有種唔好意思嘅感覺。
 
「真係咁好?」Leanne當然唔會就咁信。
 
「當然啦!」而我亦無能因為咁就縮。
 
「咁不如你考慮下Cindy啦! Cindy係個好女仔黎架….」點知Leanne之後嘅說話直接粉碎左我嘅希望同埋期待。
 
「下… 完全無諗過喎…」我無奈答道。
 
「咁衣家開始諗下啦! 最多我幫你地制造機會!」Leanne繼續做說客。
 




我:「隨緣啦… 我對佢無果種感覺呀…」
 
「感覺可以陪養架嘛! 至少have a try~ 真係無先算啦! 治療情傷最好嘅方法就係發展另一段感情!」Leanne一副專家口吻咁講。
 
於是之後Leanne係陪Cindy嘅時候，不時都會叫埋我。Cindy第一次突然見到我都有D愕然，亦有d埋怨Leanne。不過可能因為我地本身都算熟，佢又諗可能咁會幫助到我去追Leanne，所以知道我知道左佢發生咩事後，都唔特別抗拒我嘅出現。不過無耐，佢就開始估到Leanne叫埋我嘅原因。結果件事就陷入左一個好古怪嘅情況，一方面Leanne想撮合我同Cindy，但另一方面Cindy雖然知Leanne想做咩，但亦覺得衣個係我同Leanne發展感情嘅好機會，於是就順住佢意成日答應我地三人行再暗地裏想制造機會比我同Leanne。
 
不得不讚，Cindy作為朋友其實真係算唔話得，明明自己失戀唔開心都仲為我著想。不過更奇妙嘅係，因為佢算係回復左單身，加上知我一直鍾意Leanne，所以對我就再無左之前果種避忌，而本身我地就係屬於好傾嘅朋友，唔係係我原本嘅世界我地都唔會咁friend仲發展到差d就有左感情。所以慢慢地，我地都越傾越好傾，然後一種超越朋友之間嘅感覺似乎都開始好似上一個世界咁係我地中間不自覺咁萌生。
 
而另一方面，我同Leanne亦因為衣種三人行日子越黎越熟，佢對我都無左一開始果陣層膜或者偏冷感，開始真心當我係一個好朋友。果陣嘅我，曾經都真係有幻想過自己會唔會有日可以享受到齊人之福…