因為EX 我成為左一個禿頭嘅毒撚 然後遇到一隻猫: 27. 意外

然後好快，時間就到到我父親出事果日。故事發展同原本世界都一樣，不過係母親暈倒入院果日，黎我屋企搵我嘅就由Grace變成左係Mabel。
 
「祖，Auntie有無事呀?」一開門見到我Mabel就問。
 
「醫生話無咩大礙，係過度操勞加上情緒有d起伏太大所以先暈倒，休息下應該無事聽日可以出院。」我帶著疲累同Mabel講。
 
「咁都好d…你無野嘛? 衣段時間你都辛苦，要take care好自己呀…」Mabel見我好累個樣擔心地講。
 
「嗯…」
 




「有無咩我可以幫手?」Mabel見我無晒精神就問。
 
「陪我飲下酒?」本身我已經自己開始飲緊，而果刻我同樣確實想有人可以陪下自己。
 
「好呀~」Mabel當然應承。
 
於是Mabel就留低左陪我飲酒，而我地就講下以前嘅野不知不覺越飲越多。
 
「不如我地聽下歌?」飲到咁上下我突然心血來潮提議，然後就隨手拎左Mabel送比我果隻Eason塞左落部Hifi開始播歌。
 




「哈，送左比你咁耐自己衣家反而先第一次有機會聽~」酒精上頭Mabel塊面開始有d紅。
 
「所以衣家咪專登播比你聽囉~」我都有d面紅紅講道。
 
Mabel:「原來唔經唔覺就差唔多兩年…」
 
我:「係囉…」
 
Mabel:「我送比你張生日卡你扔左未?」
 




我:「梗係未啦…點捨得扔呀…」
 
「普通一張卡啫，有咩捨唔捨得呀…」Mabel唔知係有d試探性咁講，定係自嘲緊我無發現張咭嘅秘密。
 
「但入面有你對我嘅心意…」但因為酒精關係，我無點留意隨口就講左出黎。
 
「生日快樂都算心意?」Mabel繼續自嘲。
 
「生日快樂點解唔算?」發現自己岩岩柒左我嘗試補救。
 
然後Mabel就無再出聲，只係一直望實我。
 
「你… 知道左?」過左陣，佢終於問道。
 
「知道咩呀?」而我就繼續扮傻。




 
「唔駛再扮喇… 你嘅表情已經出賣左你… 我知你知道…」Mabel有d失望咁講。
 
「咁明顯想唔知都唔得啦…」望住Mabel紅紅嘅臉，我知已經隱瞞唔到只好苦笑道。
 
「咁你點解一直扮唔知?」Mabel追問。
 
「因為我唔知點handle好…」我如實作答。
 
「所以你…對我無感覺?」Mabel有d唔好意思咁問。
 
「我一直當你係我好兄弟…」我都有d唔好意思咁答。
 
「好兄弟… 因為…我唔夠女人?」Mabel臉色一沉再問。
 




「唔係…而且我近排越黎越意識到你係一個不折不扣嘅女人…」我突然諗起聯會營果次碰撞。
 
Mabel:「咁點解唔可以鍾意我?」
 
「我唔知呀…我真係從來無諗過…」我都唔知我係一直唔敢諗定唔想諗。
 
「咁如果咁呢…」Mabel突然間行近我然後攬住左我。
 
「兄弟都可以攬格。」我完全不為所動咁講。
 
「咁…咁呢?」佢俯前錫左我塊面一啖。
 
「聯會營你都試過咁錫我啦…」我繼續淡然咁答。
 
「咁…咁呢?」佢個嘴輕輕觸碰左我個嘴一下。




 
「你知唔知你做緊咩?」我仍然完全無反應咁問。
 
「我知… 我做緊一d我一直好想做但唔敢做嘅野…」佢面更紅咁答道。酒精似乎賜予左無窮嘅勇氣比佢。
 
佢見我無反應又無推開佢，於是佢又再錫落黎但就開始越停越耐，再越錫越大力，最後慢慢含住左我成個嘴。
 
本身就已經半醉，唇上傳黎嘅觸感同Mabel身上傳黎嘅女兒香全都刺激住我個身體每一個沉睡以久嘅咸濕細胞，加上我果陣本身情緒就已經唔係好穩定好想有個渲洩口，又從未同女仔咁近接觸過，面對Mabel不斷嘅進擊，我身體越黎越有反應，然後開始回抱住Mabel，再反錫返佢。
 
感受到我嘅反應，Mabel有d開心，然後我地兩個越黎越無自制能力，開始向著更進一步嘅方向發展…
 
「係你主動架，唔好後悔…」心入面留低左衣句說話後，我就成個壓左落Mabel身上…
 
「喂喂喂… 又係咁!?」天上嘅我見到衣幕熟悉但又有d唔同嘅畫面又開始向下面嘅自己咆哮。
 




「唔怪得你地d人類咁鍾意飲酒啦，佢就好似味精咁，不過唔係增加味道而係增強你地心入面最厡始嘅慾望…」貓仙人一副食花生嘅樣講。
 
「咁人同獸其中一個最大嘅唔同就係自我控制嘅能力，只係酒精好多時會off左衣個control啫… 話事話，味道你都識?」我好奇咁問。
 
「神係無野唔識，而且你地成日係食物加衣樣野，我想未試過都好難啦…」貓仙人自然咁答。
 
「你…」我望住貓仙人突然有種感覺。
 
「專心返下面嘅畫面唔好再問d唔關事嘅問題喇!」不過貓仙人好敏銳咁stop左我。
 
第二朝當我起身個頭仲好痛，但就見Mabel頭髮散亂咁訓左係我側邊。一望之下大家都無著衫我就知今次仆街了，不斷埋怨自己點解會做左d咁嘅野。
 
「你醒嗱?」Mabel衣個時候都醒左，一見到我就好甜咁問。
 
「係呀…」我苦笑應道。
 
跟住Mabel主動挨過黎攬住我然後又合上眼。岩岩先拎左人隻豬，衣家即刻推開佢好似好仆街咁，所以我就由佢攬住我然後開始諗點樣善後。琴晚係醉左一時失控，衣刻我對Mabel可能會有性衝動但就真係完全無戀愛果種感覺，我唔想同佢變做男女朋友而只係想大家繼續做返兄弟…
 
「你肚唔肚餓? 不如我整早餐你食?」過左陣我就搵個原因脫離左佢然後起床。
 
「好呀，我一陣黎幫手~」
 
於是我就立刻著返衫然後衝左去廁所梳洗。到到我開始煮緊麵果陣Mabel都著返衫出左黎。
 
「有無野要我幫手?」佢個樣好開心但又好似有d怕醜咁問。
 
「無喇，你坐低等食得架喇。」而係衣個時間我又點好意思要佢幫手。
 
「真係好，一起身就有人煮野比我食~」
 
我無再回應佢。
 
「阿祖呀，你係咪真係一直以為聯會營果次係我嘅初吻?」坐左一陣佢突然間又問。
 
「唔係咩?」我問。
 
「你真係唔記得… 你仲記唔記得上次我扭親腳果陣問過你一樣野?」Mabel臉上閃過一絲嘅失望，但好快又笑返。
 
「係咪問我記唔記得細過揹你過次攞走左你一樣野?」我努力回想完後講。
 
「係呀… 都仲係唔記得?」Mabel又問。
 
我:「無咩印象…」
 
「果次你揹我…其實已經攞走左我個初吻…」Mabel有d怕醜咁講。
 
「竟然係咁? 係我攞走?」我真係有d意外…
 
「Um…其實係我偷偷地襯你唔為意果陣錫左你一下嘅…」Mabel更加唔好意思。
 
「原來係咁…」
 
「所以其實我細細個已經鍾意你架喇…」Mabel細細聲咁講。
 
「Mabel…不如我地當無事發生過，忘記左琴晚發生嘅事做返好朋友?」雖然好想問佢咁係幾時同點解鍾意我，但我驚咁會比左錯誤signal佢。而且見佢越開心，我就越難受，我唔忍心再比假希望佢於是終於忍唔住講左出口。
 
「所以…你對我真係一直都無感覺?」Mabel面容一僵然後面色即刻變得好難睇。
 
「我真係一直當你係我好buddy…琴晚我都唔知自己點解會咁… 我唔想呃你，對唔住呀…」我無直接回答以免傷佢心。
 
「傻啦… 我無事，係我自己一廂情願啫… 好呀，忘記左佢我地當無事發生過繼續做buddy啦~」Mabel呆左兩秒後笑住口咁講，但好明顯睇得出係強顏歡笑。
 
「Meimei…」我好擔心佢但又唔知可以再講d咩。
 
「唔好意思我唔係好舒服… 個早餐我唔食走先喇…對唔住…」佢聽到我咁叫佢後立刻震左一震，然後dup低左個頭好格硬咁講，聽得出佢係喊住咁講… 而當佢講完後就拎轉身奪門而出，淨低想追又唔敢追嘅我一臉內疚咁企左係度。
 
「禽獸! 人渣! 衣個唔係我黎架!」係半空中嘅我見到咁嘅自己又忍唔住鬧道。
 
「衣個係另一時空嘅你，不過大家經歷都唔同，所以某程度上你都可以話佢唔係你黎嘅。」貓仙人一臉事不關己咁講。
 
「點解我會做得出d咁嘅野架...」
 
「哈哈，冷靜… 唔係我驚你有排激動呀… 或者慢慢你可以透過衣個世界重新認識過自己。」突然貓仙人又有d幸災樂禍咁嘅樣。