因為EX 我成為左一個禿頭嘅毒撚 然後遇到一隻猫: 13. 學屆比賽

轉眼間，我嘅籃球學屆比賽亦都正式展開。當年仲係A-Level年代，中一二三係C grade, 中四五係B grade，中六七係A grade，所以中三嘅我，喺當時籃球隊絕對係C grade嘅主力。因為我係一個射手，唔少戰術都會圍繞住我去做form。而當時除左我，隊中仲有另外兩位中三嘅主力，就係負責剷籃嘅希仔同埋當時已經接近米八身高嘅中峰技安。不過其實所謂嘅戰術都好簡單，一係就希仔自己突破得分攪掂，一係傳比技安爆籃底，一係搵人幫我做pick等我射波。
 
做過射手就會明白，如果你隊入面有一個可靠嘅中峰同一個剷波勁吸引到敵人嘅隊友，你相對上會打得輕鬆好多，出手機會亦可以多好多。可靠嘅中峰令你可以安心射波，因為就算射失，佢都有可能搶到籃板，而識突破嘅隊友當引到敵人包夾佢，你就有機會走去空位接應佢嘅突破分波然後射波。所以係我地三個鐵三角下，果年係絕對有機會問鼎冠軍。當然最主要係因為我地學校籃球隊只係屬於最低組別嘅Division 3，所以對手唔會係好強。
 
Pool賽基本上無咩挑戰下我地就三戰全勝輕鬆晉級，而Grace都有守信用同Mabel一齊黎睇左我第二場比賽。有佢做觀眾我果場當然更加賣力，仲拎左全隊最高分添。
 
「今日打得唔錯喎~」果晚Grace MSN主動搵我。
 
「哈，因為知你係度嘛~」我面紅紅咁打。
 




Grace:「原來我咁重要架?」
 
我:「係呀，難得你黎支持我點可以失威呢? 」
 
Grace:「咁唔通我唔黎你就會渣d? 」
 
我:「係架~ 所以你要繼續黎睇呀~ 」
 
Grace:「你就想! 不過如果你入到決賽，我就考慮下再黎睇啦~ 」
 




我:「你話架! 」
 
Grace:「係呀我話架，加油!」
 
                                                            
有左Grace衣個約定同支持，我更加進入狀態，之後16強同8強嘅比賽我準到連自己都有d唔敢相信，愛情嘅力量原來真係好神奇。不過到到四強，我地就遇到強敵，因為對面都有一個射手，仲有一個專門mark住我嘅難纏球員，結果比賽陷入左膠著狀態。雖然我被涷結，但理論上仲有阿希同技安攞分，而對面除左個射手外其他隊員整體實力都唔差，所以分數都一直拉得好近，但我地就仍然一直可以保持微微領先。但或者因為阿希今場分擔太多得分工作，到最後兩分鐘佢終於捱唔住抽筋要離場，結果我地嘅分數就一直停滯不前，而對面就一球一球咁追上黎，終於係最後十秒鐘反超前左我地一分。
 
最後一個攻勢，入就贏唔入就輸，得分重任就落左係技安或者我度。不過因為我已經比專人涷結，所以對面應該會重點防守技安唔比佢拎波。衣個時候我突然靈機一觸，邊個話射手真係淨係識射波? 衣個或者係一個契機令對手疏於防範。始終對左成場波，我其實都發現對方專門mark我果位球員，雖然好靈活好難纏又好專注，但從佢進攻嘅參與度同埋一d動作行為，我相信佢其實唔係打左籃球好耐，經驗唔多，我可以好好利用衣點。於是係技安果然比兩個人mark死嘅情況下，我急速跑去一個位撇開防守球員拎波，然後作勢一接即射。因為時間已經無多，對方果然心急比我呃到跳起左，我就把握機會用一個假動作帶球突破殺入籃圈然後襯緊mark技安嘅人未趕到黎我就跳起黎一個騎射，結果成功避開封阻，個波擦板而入。就係憑住衣球我地險勝對手1分成功殺入決賽。
 
 




「我地入到決賽喇!你下星期一定要黎睇呀~」果晚一見Grace online我即刻msg佢。
 
Grace:「恭喜晒!咁決賽係幾時呀?」
 
我:「下星期二五點。係XX球場。Mable佢地都會黎睇架，你可以同佢地一齊~」
 
Grace:「好呀，我同琴老師調一調時間先。加油呀!」
 
我:「我會! 不過如果有d獎勵就更好喇~」
 
Grace:「下? 你想要咩獎勵?」
 
我:「嗯… 例如如果我地贏到你再陪我出多日街啦~」
 
Grace:「咁係獎勵咩? 我驚你又要報銷多件衫喎…」




 
我:「係都值呀~」
 
Grace:「你睇你開心到開始口花花亂講野喇…」
 
我:「咁…得唔得?」
 
Grace:「好，你贏到就陪你出去玩當慶祝啦，不過調返轉輸左就要罰~」
 
我:「罰咩?」
 
Grace:「罰你一個月唔可以同我講野~」
 
我:「下! 罰得咁重?」
 




Grace:「係呀，不過唔輸咪得囉~」
 
果陣同Grace傾偈真係好開心。好似每次同佢傾完偈心情都會特別好。衣家睇返當時嘅情境，原來不知不覺間大家嘅對話好似都開始有D曖昧嘅感覺。
 
 
入得決賽對手當然唔會弱，而且對手係上年嘅冠軍，只係因為上年佢地學校B grade同A grade成績太差所以先升唔到上Division 2。
 
不過無左專人涷結又見到阿Grace 真係有黎睇比賽，我完全重拾之前幾場嘅狀態，加上阿希同技安嘅配合，三個進攻點令對方唔太守得住我地嘅攻勢，只係同一時間我地其實亦同樣唔太守得到對面嘅進攻，因為佢地五個球員嘅實力都好平均又高大，所以技安以往嘅優勢係今場並唔算大，甚至我地嘅籃板球係少有地輸比對手。而由於雙方嘅進攻好似係五個打三個咁，我地三個體力消耗始終會比較快，所以去到第四節，我地都開始有d力不從心，分數再咬唔住對方。比賽仲有一分鐘，但我地再比對方入左一球落後四分。
 
雖然好累，但當我望到阿Grace係場邊好緊張咁望住我地，彷彿不停咁想透過自己嘅眼神叫我加油果陣，我對腳好似又有返d力氣，於是我對我地嘅控球後衞小新舉起左三手指。衣個係我地其中一個戰術，主要係大家盡量拉空對手，再由另一個隊員阿威幫我做pick等我射三分。衣個係我地專登練黎預備落後要追分時用，而衣家正正係用嘅時候。
 
於是小新控住波同樣舉起左三隻手指，然後大家都慢慢移去自己嘅位置。佢地都無抗議無反對，因為衣個係大家對我衣個球隊入面皇牌射手嘅信任。事實上要贏我地亦需要一個三分波先有機會，因為我地嘅體力已經唔足以應付加時賽。
 
於是我深呼吸左一口氣，然後就跟預定路線狂奔，阿威見我行動亦同時跑過黎幫我pick走mark我嘅球員。就係衣一個空位，我接到小新嘅傳球然後起跳一射，皮球應聲入網。
 




「Yes!」我忍唔住振臂大聲歡呼。
 
「好波呀阿祖!」
 
「加油呀湘東!」
 
「守住衣球呀湘東!」
 
隨著我嘅入球，場內場外都響起一陣好大嘅歡呼聲，而衣個三分波亦令我地湘東中學士氣大振，大家都有返晒精神同體力好落力咁做好防守。對面隊衣個時候仲領先緊一分，比賽就得返三十幾秒，所以佢地都好正路咁傳黎傳去諗住拖到最尾先出手完成最後一個攻勢，咁就算最後射失，我地都係得返好少時間可以去進攻。
 
面對對手有心拖廷時間，我地都好心急好想截到對方嘅傳球，只但係我地同時又要好冷靜唔可以飆波，因為亂咁飆波好易會失位然後破壞成個整體防守架構比對方乘虛而入。衣個時間阿希把握到對方傳球一個鬆懈伸手勉強截到對方嘅傳球路線改變左個波嘅方向，個波直向邊界方向飛去。如果就咁比個波出界，就係對方界外球，佢地可以繼續拖時間，我地好大機會會就咁輸左衣場決賽。由於最近個波係我，所以我同另一個敵人好努力咁一齊跑去追個波，我希望可以追到個波唔比佢出界，而佢則努力同我搶唔比我救得返個波。
 
我眼見就咁跑已經趕唔切，只好搏一搏奮力一跳，成個人飛跳出界外，然後撈返個波埋黎。就係我掂到個波果陣，我見到小新，於是我係跌落地下之前，隻手一fing張個波傳左比佢，然後自己應聲仆左係地下。由於我地已經拎到控球權，小新立刻向球証示意暫定，而我因為仆左喺地下，隻右腳都瘀左仲流埋血添。無獨有偶，我仆低嘅位置好近阿Grace佢地，所以我起身嘅時候好型雙眼好有火咁同阿Grace講左句。
 
「應承過你嘅野我一定會做到!」




 
然後我就立刻返返去我地後備席果度匯合隊友。如果衣個情節令你有少少覺得似曾相識，咁我都唔怕認，無錯，我衣個突然嘅舉動確實係受男兒當入樽入面嘅櫻木花道所啟發。