因為EX 我成為左一個禿頭嘅毒撚 然後遇到一隻猫: 6. 壁報比賽(二)
因為擔心放學唔夠時間，所以喺各個同學交晒功課後我同Grace就約左黎緊星期六諗住一齊完成衣項工作。可能係為左方便做野，Grace果日身穿一身休閒運動服，比我嘅感覺無平時咁斯文同文靜但就多左d活力感。
「開工!」
好快我地就開始工作，我主要將預備好嘅材料釘上壁報，而Grace則負責所有物料嘅最後期加工。睇見佢係預先已經cut好嘅紙板上將果個乒乓波球員畫得栩栩如生，我先終於有機會見識到佢畫畫原來真係好靚，唔怪得可以係唔同嘅比賽中獲獎無數。
因為安排分工得好，臨近黃昏我地終於順利完成。睇住我地一手一腳整出黎嘅壁報，大家都好滿足同有d激動。
「整得咁辛苦，等我地開齋試玩下先!」講完我就隨手把放係枱上面嘅膠槍遞左比佢。
「好~」稍作猶豫佢就拎起左把槍。
“噗!”
隨著佢按下槍上面個發射掣，附帶吸力嘅子彈應聲射向了箭靶，不過就停左係靶上最外圍嘅位置。 佢無出聲，然後立刻又再射左兩槍，但衣兩槍就連靶都射唔中。衣個時候我睇見佢一臉唔服輸嘅樣，靜靜咁走到壁報板前面拎返果三發子彈，然後又走回原位再射過。而當衣個動作循環左五次後，佢終於第一次射中紅心。
「Yes!」
佢不禁振臂高呼叫左聲。然後好快佢又拎起左另一把弓箭，開始嘗試射箭。衣刻嘅佢，係我從未見過嘅黃可欣，然後我先發現原來係佢文靜嘅外表下，隱藏住一顆貪玩嘅心，而且性格仲好好勝添。
支箭終於射中紅心後佢又行去拎左個籃球，點知估唔到第一球就射入左。見佢好自豪咁笑左一笑就諗住放低個籃球然後去拎乒乓球拍，衣個時候我終於忍唔住講左句
「不如我地黎個比賽?」
佢有d驚訝，但好快又問「點比先? 你籃球隊架喎，邊度公平呀?」
「嗯… 每人射十球，入多d果個為之贏，我讓你遠d射。嗱，你條界係衣度，我條界係衣度，遠你差唔多成倍，夠公平喇掛?」我邊講邊係地下放低左兩支筆，第二支筆同壁報板嘅距離比第一支遠左足足一倍。
「咁又好似比得過喎~ 不過贏左有咩獎勵先?」佢諗一諗就接受左衣個提議。
我:「你贏左可以叫我幫你做一件事啦。」
Grace:「咁如果你贏呢?」
「嗯…我贏左你陪我行日街?」我裝作不經意咁隨口up，但其實心入面係既怕醜又緊張。
「行街?」Grace有d意外又有d好奇。
「驚輸就算啦~」唔想比佢有太多時間思考，加上我啱啱捕捉到佢好勝嘅一面所以我故意咁講。
「你就驚輸! 黎啦，我先~」果然佢即刻就中左計。
輸贏其實並唔重要，因為無論邊個贏對我黎講都係一個機會可以拉近我地嘅距離，當然我贏會更好啦。但無諗過阿Grace射十球竟然可以入到七球，攪到我都即刻有d壓力，因為作為籃球隊嘅我輸左會好瘀架嘛。
「我一球都未射過，比我射幾球熱下身先啦~」所以我作出左要求，始終衣個唔係平時打開嘅籃球，都真係要射幾球適應下先得，唔係初初好難射得入。
「唔得喎，你要讓我嘛~ 不過見你咁慘，比你射一球熱身啦~」Grace笑得好奸咁講。
估唔到Grace為左贏原來都幾厚顏無恥。不過唔想顯得自己小家，所以我都無再講d咩，拎起左個波就行去屬於我嘅果條線嘅前面，稍為瞄準下一射，果然完全唔適應，大力左唔少，個波撞到籃球板上方然後彈左出黎。
「差好遠喎阿祖~ 不過你熱身完下球要開始計喇!」Grace見我射成咁一副已經勝券在握嘅樣子。
我無應佢，執起個波，好快就射出我比賽入面嘅第一球。不過今次就細力左，個波緊緊掂到前框未至於air ball。
Grace今次無再出聲，但就繼續係側邊陰陰嘴咁笑。
只不過好快就我令佢嘅笑容慢慢被凝重所取代，因為已經適應左重量同距離嘅我好快就連入左6球，直至第八球一時失手先射失左，即係我要贏剩返果兩球就一定要入晒。
“Chup!” 轉眼間我又入多球。
「我追平喇喎，唔講野喇?」這時輪到我向佢露出一副勝券在握嘅表情。
「哼…你呃我嘅都唔公平!」Grace衣刻已經笑唔出而且仲扁晒嘴。
「咁都唔公平? 我遠你成倍喎，你黎試下射呀?」我沒好氣咁稍為向佢抗議一下。
「咁你日日打波衣d對你好閒咋嘛，而且你仲係shooter黎嘅…」佢一臉委屈咁講。
「點解你會知我係shooter?」但我就好驚訝點解佢會知我打咩位。
「唔講你聽!」佢好倔強咁拎轉左塊面扮住嬲咁講，真係好可愛…
「好… 唔好話我恰你，最後一球我後多3步射，咁我都贏到你就唔好怨喇~」為左要佢心服口服同埋知道背後原因，我再次作出左讓步。
「好~」Grace即刻露出一副奸計得逞嘅樣。
「不過我入左你要話埋我聽點解會知我打shooter喎。」我扮到好有信心咁順勢提出。
Grace:「你入左先算啦~」
坦白講，要係衣個五米有多嘅距離射入，其實我都唔係太有信心，不過果陣諗，如果我地係有緣份，個天自然會比我射入衣球，如果係無緣射唔入，咁都只係順應天命啫。
咁諗完後，我突然覺得我嘅壓力細左好多。
「頂，其實我以前真係幾型…」正漂浮係上空嘅我睇見以前嘅自己忍唔住要講。
「睇完你咁多嘅片段，你以前真係比衣家有自信好多。而就我所見，自信係雄性吸引雌性一個好重要嘅魅力。」貓仙人認真地說。
(唔睇返我都唔記得原來Grace同我分手前嘅自己係咁charm…)
不過當我仲係天度自怨自憐緊嘅時候衣個平行時空嘅我已經射左個波出去。
雖然偏離左少少，但最後個波都仍然撞側框入左。
「Yes!」我都忍唔住好似之前Grace咁yes左一下。其實yes唔係因為入波，而係覺得個天比左個signal我話我聽我同Grace係有緣，佢著左緣燈比我地發展。聽落係好傻咁，但後生果陣就係咁架啦。
「果陣係好感激個天開左緣燈比我地，但衣家諗返，其實衣個緣燈係催毀左我嘅一生…」上空嘅我又忍唔住講。
「催毀你嘅唔係衣個緣燈，係你自己嘅決定。專心睇落去你就會明我講乜架喇…」貓仙人淡淡回應。
「可惡，咁都輸! 不過你咁遠都射得入，係抵我輸嘅… 」Grace表面雖然有d唔忿氣，但空中嘅我衣家先留意到當時嘅佢個嘴角原來係微微向上。
「我好彩啫~ 」我謙虛應道，不過其實都係講出事實。
「運氣都係實力嘅一部份黎嘅，我地學校嘅籃球隊以後就交比你喇~」
「哈哈~ 好啦，唔好扮野住先，快d話我聽點解你會知我打咩位~」睇見佢 一副放心交棒咁嘅樣令我都忍唔住笑左出黎。
「因為我睇過你嘅比賽，見你係入面射入左好多球，而且你地嘅戰術好多時都係隊友幫你做單擋比你射波…」Grace終於解釋。
「你有睇過我比賽?點解嘅? 而且你仲好似好熟籃球咁喎…」對於衣個答案我好驚訝。
「其實以前有段時間我都好鍾意打籃球架，不過有次整親隻手指攪到成個月練唔到琴後我就無再玩lu，但間中我都會睇下NBA同學校d籃球比賽…」Grace帶點傷感咁講。
「原來係咁… 咁都幾可惜喎… 咦，咪住! 你以前有打籃球? 唔怪得入到咁多球啦! 仲要扮初學者呃我!」我衣家先知自己原來中左佢嘅奸計，好彩最後都贏到。
「唔好咁少氣啦~ 我玩果陣都好耐之前喇，而且我都無講過我無打過籃球，所以都唔算呃你呀~ 不過無諗過最後都係輸比你…」Grace厚著臉皮又有點自嘲咁講。
「狡辯! 好彩我夠勁啫~」而我今次無再比佢嘅演技呃到。
衣日玩完後，我地執好野後又再一齊返屋企。