雞仔聲表姐（全篇完）: 努力向上
（12）努力向上
平時Whatsapp中，Johnny如常send message俾Chloe。
Chloe keep住收工去上堂，好多時要趕功課，就算兩個拍拖都無乜時間見面。
睇嚟佢真係無時間同我行街食飯…
唉…
Johnny好想見 Chloe，奈何佢太忙，抽唔到時間…
既然佢無時間…
咁我去接佢收工，俾個驚喜佢…
又可以見面…
Good 喎！
「奀仔，我有事早啲走。」
「去溝女？」奀仔問。
「係拍拖，唔係溝女。」Johnny好自信回答。
「真係估唔到你溝到靚女。」奀仔講：「大冷1賠10000，早知我瞓身買喇！」
「你可以再買我娶到佢喎。」
「咁堅？」奀仔直豎姆指：「勁呀！」
奀仔羨慕表情，令Johnny更自豪…
自豪溝到靚女Chloe。
好快去到Chloe公司樓下，企响大門附近等佢。
唔同佢講，俾個驚喜佢。
等咗差唔多1粒鐘，見到有班西裝友出嚟。班西裝友好開心嘅樣，係咁講嘢。
西裝友當中，有個突出嘅OL靚女…
果個OL靚女，就係Chloe。
Chloe都笑笑口…
係俾班西裝友氹到佢笑？
Johnny估計緊，Chloe見到佢出現。
「Chloe。」Johnny急步行埋去Chloe到，想俾班西裝友知道佢係Chloe男友。
「點解你响度嘅？」Chloe問。
「接妳收工嘛。」Johnny拖住Chloe隻手，班西裝友見到Johnny有啲愕然…
可能係Chloe有男朋友…
而佢男朋友唔係咩型男…
又或者唔抵得Johnny溝咗Chloe，所以以不屑眼神望住佢。
「點呀，Chloe，去坐陣囉。」其中一條西裝友講，Johnny見到有人叫Chloe唔知去邊，佢就望望條友係乜。見到條友高高大大，未至於男神不過都幾型…
Johnny知道佢型過自己，不過輸人唔輸勢，無退縮咁講：「我同Chloe…」
Chloe估到Johnny想講咩，就插嘴：「我同男朋友去街，你哋去喇。」
「…」型男食檸檬，擝大個口得個窿…
Johnny見到Chloe拒絕佢，仲當面話自己係佢條仔，自自然然覺得好威！
哈哈，想溝我條女？
你食屎喇！
Johnny好開心，拖住Chloe離開。
「你嚟得啱喇，我有嘢想講。」
「講咩呀？」
「份報告出咗。」Chloe講：「我無bb。」
「無bb？」Johnny好開心：「咁咪好囉！」
「係呀，唔駛無預期下生仔。」
「係。」
「既然無bb…」Chloe講：「你打算點？」
「我打算點？」
Chloe認真問，嚇到Johnny…
佢係個高班靚女，受歡迎份工又好過我…
佢諗住分手？
Johnny驚到面都青，Chloe見到就問：「你咁驚做咩呀？」
「妳…」Johnny講：「妳想點吖？」
「我問你你又問我？」
「…」今次到Johnny擝大個口得個窿。
「咁我講，我唔係隨便女仔…」Chloe停一停，再講：「你係咪有心想同我一齊？」
「係呀，我都同Sandy講過唔會飛妳…」
「既然你有心，我想問你幾錢人工？」
「$15000」
「你有無諗過轉工？」
「我…」Johnny無諗過，所以唔知點答。
「如果我哋結婚，你有無能力養妻活兒？」
「…」Johnny都係無答。
「你學歷去到邊？」
「中五畢業。」
「你有時間約我去街，有時間接我收工，點解唔用哩啲時間進修？」Chloe講：「唔鍾意讀中英數，都可以讀啲專門技能…」
俾Chloe話自己嘥時間，Johnny有啲唔開心。
「你有心去做嘅，就算做唔到我唔怪你，但係你咩都唔做諗住成世哩份工…」Chloe講：「咁你唔會係我嘅Mr Right…」
我唔去進修…
諗住成世做哩份工…
就唔會係Chloe嘅Mr Right…
Chloe講完，兩個又靜默…
靜默一輪後，Johnny講：「我去進修。」
「你肯去？」Chloe有啲出奇。
「係，妳讀咩我跟住妳去讀。」
「讀書喎，唔係去拍拖喎。」
「係，為咗我哋將來，我會去做！」
「真係？唔好得個講字喎。」
「係呀，唔去增值就唔可以養妳同個仔！」
Johnny講到好firm，Chloe聽到雙眼瞇成一線。
「咁而家去報名。」
「咁心急？」
「係呀！」
今次又係Chloe拖住Johnny，只係今次去報名上course，唔係去爆房。
兩個手拖手去報名，話咁快就報咗一科係Chloe都有讀…
「以後咪同妳一齊上堂？」
「係呀，係咪好開心呢？」
「梗係喇，同靚靚女朋友上堂喎。」
「低能仔！」Chloe錫咗低能仔一啖，搞到佢勁開心。
忽然Johnny諗到啲嘢。
「我哋一齊咁耐都未影過相，不如响哩度影張吖？」
「好呀。」Chloe講：「响專業學院影，到畢業再影。」
Johnny攞電話自拍，第一張同Chloe影嘅相…
仲要係Chloe OL！
「張相好靚呀。」
「會唔會係女主角靚呢？」Chloe笑笑講。
「當然喇。」Johnny講：「我用嚟做wallpaper，一開電話就見到妳。」
「傻仔。」 Chloe又錫咗傻仔一啖。
「見電話見到妳…」Johnny又諗到啲嘢。
「妳講：聽電話喔。」
「吓？」Chloe唔明。
「妳講喇，我唔會玩妳喎。」
「古古怪怪！」雖然Chloe話 Johnny古怪，不過都聽佢話，講：「聽電話喔。」
「我講咗喇，咁點呢？」
「妳打俾我。」
「我打俾你？」
「係呀，妳打先喇。」
「Ok。」Chloe打電話俾Johnny，佢個電話響起Chloe把聲：聽電話喔。
「哦，你用我把聲做鈴聲！」
「係呀，係咪好正呢？」Johnny奸笑，Chloe笑住打佢。
「以後電話響，就係妳把聲。」
「我把聲…」Chloe講：「你屋企人知唔知我哋拍拖？」
「我未講呀。」
「咁電話響佢哋咪聽到我把聲？」
係喎…
咁佢哋咪知我同表姐拍拖？
「妳有無同姑丈講呀？」
「你都知佢份人幾古板喇。」Chloe講：「遲啲我哋真係結婚嘅先同佢講。」
「咁我都唔講住。」Johnny講：「其他親戚呢？」
「同親戚講，咪即係同你屋企人講。」Chloe俾Johnny激死！
「即係只得朋友知，親戚唔知。」
「係囉，低調啲。」Chloe講：「講就唔會講，佢哋知就知。」
「好！」Johnny大叫：「我哋低調拍拖！！」
「你咁大聲，點低調呀？」
「哈哈哈！」
兩個好開心，開始低調拍拖。
（12）努力向上---完