雞仔聲表姐（全篇完）: 協議

（9）協議


星期六10點半，Chloe嚟到尖沙咀準備去驗孕。

佢心情緊張，如果有咗會好麻煩。

不安心情，去到醫務所樓下時收到Johnny whatsapp。

「早晨，我到咗間診所」





佢咁早到？

「我响樓下，而家上嚟」

「好」

佢真係嚟，無呃我喎…

Chloe搭𨋢上去，當到達醫務所見到Johnny，Johnny一見到佢就打招呼：「Chloe。」





「Hi。」Chloe都回應，語氣普通。

「妳食咗早餐未？」

「食咗，你呢？」

「我未食呀。」

「咁你去食先喇，未夠鐘。」





「唔得，食早餐事小，陪妳驗身事大，我梗係要陪妳喇。」

「唔。」Chloe淡然回應，然後大家坐低去等。Chloe雙手放响大脾上，狀態緊張抓握，因為着嘅係短褲，睇到白浙皮膚上有微微紅痕…

Johnny見到咁，就同Chloe講：「唔駛緊張，放鬆啲。」

放鬆啲？

Chloe望向Johnny，眼神流露住緊張。Johnny拍拍佢隻手：「抓到大脾紅哂喇。」

大脾紅哂？

Chloe無發覺自己抓大脾，鬆爪時姑娘叫佢入去。Chloe緊張下手指同Johnny手指互扣，拖住手入房。





「兩位請坐。」醫生同佢哋打招呼，兩個都坐低。

「蘇小姐嚟驗孕，我問少少資料。」醫生講：「上一次性行為係幾時？」

Chloe望住Johnny，Johnny答：「今個月2號。」

「有無採取避孕方法？例如避孕套、避孕藥、結紥手術？」

醫生一問，Chloe就搣Johnny大脾。

Johnny答：「無。」

「咁性行為係咪體內射精？」

Chloe聽到搣得更大力，痛到Johnny神情扭曲：「係…」





「咁好喇，我要同小姐做檢查，麻煩先生响出面等等。」

「好。」Johnny講：「我响出面等妳，唔駛緊張。」

Chloe點點頭，之後Johnny出去等。

等緊時Johnny都有啲緊張…

如果真係一炮就中，佢會墜胎？

會生出嚟？

我哋結婚？





Johnny諗幾個可能性，Chloe都行出嚟。

「點呀，醫生點講呀？」

「點講？等報告囉。」

「有無話幾耐？」

「做咩呀？你好緊張？」Chloe反問。

「妳有無bb喎，我一定緊張喇。」

你一定緊張？

咁應該…





「既然你識緊張，我哋揾個地方傾傾。」

「好，好。」

兩個又去餐廳進行第二次和談。

「我問你，假如我有咗…」Chloe未講完，Johnny就講：「我會負責。」

「負責？點負責呀？」

「妳決定點，我會全力去做。」

「我決定點？」Chloe懊惱表情：「bb係生命，我唔會咁自私墜胎剝奪佢生命。」

「妳會生佢出嚟？」

Chloe咬咬嘴唇，然後點頭。

「我哋結婚。」Johnny講：「我會養佢。」

「結婚？我哋都無感情點結婚呀？」

「我哋識咗咁耐…」Chloe打斷佢說話：「之前果啲唔係男女感情。」

「我哋開始陪養呀，溝妳果時都唔多唔少有感情喇。」

陪養感情結婚？

Chloe諗緊佢哩番說話，Johnny講：「唔記得呀？妳唱歌都話佢差過我，又話扮唔知我愛妳…」

Johnny提到合唱開心場面，忍唔住笑笑打佢：「仲好講，正正經經一首歌你搞事！」

Johnny乘勢講：「嫁俾我吖。」

Johnny求婚！

Johnny突然求婚，Chloe呆咗…

佢要娶我？

係因為有bb，所以先娶我？

「咪講咗囉，未有感情呀。」

「同妳求定婚先，等妳知道我想娶妳。」Johnny拖住Chloe雙手：「拍拖增加感情…」

「我唔要大住個肚做新娘！」

「咁妳驗孕報告出咗，有bb就註冊，咁咪唔會做大肚新娘囉。」

「咁…」

Chloe諗諗，佢講嘅都算係方法，唔會殺小生命，而且對佢觀感其實唔差…

不過…

「我有嘢問你，你要老實答我。」Chloe好認真同Johnny講，Johnny點頭回應。

「果晚係你趁我醉搞我，定係我叫你做、叫你射入去？」

「我無趁妳醉搞妳，真係妳叫我做、叫我射。」Johnny都認真講。

「你無講大話？」Chloe再問，Johnny就伸出三隻手指講：「我發誓，如果我講大話嘅，Chloe就飛咗我！」

「之前你都話有我飛你，無你飛我喇。」Chloe笑住掩佢個口：「奸得你吖！」

「無奸，無奸。」

兩個大笑，之後Chloe講：「我哋可以拍住拖先，如果你唔係我Mr. right，我寧願做單親媽媽。」

「知道，我一定會做妳Mr. right！！」

Johnny好開心，攬住Chloe kiss…

Chloe都回復笑容，雙眼瞇成一條線同佢kiss。


（9）協議---完