那些被錯過的人: 戲院

去到戲院，阿然同阿婷去買飛，我就去買爆谷汽水。

我一個人當然拎唔到咁多，所以諾曦就拉埋Cathy過嚟幫手。

Cathy仍然都係好熱情，一見到我就飛身撲埋嚟，好彩我一個閃身避開咗。

諾曦見到之後，就喺度訓話，叫佢唔好成日撲埋嚟。

嗰感覺就好似我女朋友咁。





我哋最後簡咗套愛情片，一行九個人，當然要玩抽位啦。

２２３３，我哋分開四邊坐，我同諾曦分別抽到Ｇ４同Ｇ５。

真係天助我也，連個天都要我哋坐埋一齊。

但估唔到嘅係，Cathy抽到Ｇ６，不過諾曦馬上拎走張Ｇ５，然後指示我去坐Ｇ４。

睇戲嘅過程，諾曦睇到喊哂，而我基本上都無乜留意套戲，因為全程掛住偷望諾曦。





「哇，搞咩仲喊緊呀？」

「個女主角好蠢嘛，嗚嗚。。。」

「我俾三次機會你，三次都唔成功嘅，我哋就命中注定唔可以一齊。」阿婷模仿電影裡面嘅對白。

「係咖！鍾意人就要把握機會啦！」

「喂！無呀！我無鍾意佢囉！」





Cathy好大聲咁講，然後眼望住我。我正想回應嘅時候，諾曦已經搶先回應。

諾曦嬲到塊面紅哂，然後望住我。

「吓？你望我做咩呀？」

我向後退咗步，雙手放喺心口，作狀唔俾諾曦行埋嚟。

「哼！」

諾曦見到我個反應之後，用力擰轉面唔望我。

「你仲話唔係鍾意阿杰，你睇你塊面紅哂！不過。。」

阿婷欲言又止，雖然我好想知佢不過啲咩，但諾曦即刻遮住佢把口，所以無辦法。





睇完戲之後，其他人有事走先，得返我哋5個人。

我哋去咗附近一個商場行街，Cathy阿婷同阿然企最前，而諾曦同我係後面跟住。

『拖佢隻手，拖佢隻手！』

我內心隻魔鬼不斷引誘我，當然我唔會理啦，拖拖拖，拖完朋友都無得做呀！

「啊，不如今晚食放題？」阿婷問大家。

「我。。」

「得喇知你要同屋企人食嘛，都無預你，阿杰呢？」

「我。。我唔食喇。」

「哦！你想送諾曦返去呀？」

「唔係喇，佢今晚約咗人打波。」

喺我準備回答嘅時候，阿然衝咗出嚟護航，果然係好兄弟。

「係呀，今晚要比賽。」

「咁我哋一齊返去。。？」

「可以呀。」

諾曦望住我，好細聲咁講。我當然秒答可以啦，然後諾曦輕輕笑咗一吓。





「唔好阻住佢哋拍拖喇，我哋繼續行啦。」

Cathy美麗嘅助攻！之後佢哋幾個就繼續行街，而我同諾曦就行去巴士站。


續