那些被錯過的人: 諾曦

「喂阿杰，你個樣做咩咁攰呀？」

『鬼咩。。琴晚足足去咗三次廁所呀。。』我對住阿希舉起中指。

「冇事。」
我望一望後面，見到阿悠如常趴咗喺枱度訓覺。不過琴晚好似十分鐘都唔夠，就無哂聲氣。

『條仔。。弱。。』

「阿杰。。」Miss Wong神情哀傷咁望住我。




「譚Sir要見你呀，你又做咗咩呀？」Miss Wong遞咗張紙俾我。
「要見我？」

我諗緊琴日發生過咩事。阿悠。。仆街唔係呢樣呀！琴日俾陳Sir見到我入咗C班班房。

「哇！冇俾手冊佢啫，佢報串俾譚Sir知呀？」
「過幾日落去嘅時候，記得忍吓口呀。可能佢會放過你呢？」
「好喇，今日要處理埋少少班務。」Miss Wong面向返其他同學講。

『放過我？諗吓好喇，我呢啲黑名單，睇嚟都要留返30分鐘堂。』





「今日我哋調位先，我幫大家編好喇。」Miss Wong放張紙落Projector。
「喂！正啦！你同阿悠坐呀。」
「唔係嘛？」

我望向Projector，最角落寫住蕭樂悠，隔離寫住林俊杰。

『哇，我會唔會俾佢食咗咖？』但說實話我係有啲期待嘅。

「坐去你個燈制位喇，咁多嘢講！」




「啊！點解年年都要坐燈制位！」
「咁你高呀嘛！」Miss Wong笑住回應佢。

我坐低咗，望住阿悠有少少尷尬。

「啊。。多多指教。」我好尷尬咁講咗句最行嘅說話。

「嘻。」
阿悠擰過頭望住我，偷笑咗一吓，又望返向牆個邊。

『你真係好撚ON9呀！』我內心係度咆哮。

今日全日都係搞班務，落去拎校簿，派教科書，檢查有冇問題。食完飯就落禮堂，聽今年嘅興趣班介紹，最後上返班房。上到班房，Miss Wong俾咗張紙阿悠，我望到係訓導嘅「召見紙」，唔通佢拖仔返屋企呢件事，俾學校發現咗？

「咦？要見訓導？衰咩呀？」我扮哂熟咁問阿悠。




「咁你又衰咩呀？」
「你又知我要見嘅？」
「我今朝聽到嘛，咁你幾時見？」阿悠用冷漠嘅聲線講。
「我以為你趴係度訓覺添～哦！你咁留意我嘅？」
「我冇留意你。因為Miss Wong大聲啫。」

「咦～好似係你留意我喎。。你坐最前點知我趴係度咖？」阿悠突然用一個妖艷嘅笑容望住我，仲愈哄愈埋。
「你係咪對我有興趣呀？」阿悠隻手輕輕掃過我膝頭，仲伸咗吓脷。

『頂唔緊。。突然咁高火力。』

「冇。。冇呀！我對你冇興趣呀。。」我居然口震震。
「冇興趣。。咁。。性趣呢？」
「喂喂，我認輸。。我唔同你玩喇。。」
「死傻仔。」阿悠用返冷漠嘅聲線講，然後趴返低。




「唉，我八卦你咩事見訓導啫，話哂都隔離位。你知你。。嗯。你唔介意嘅，咪同我講囉，我會聽嘅。」
「哦。」阿悠好Hea咁答我。

晏晝嘅堂，我哋都冇理對方。有時我見到佢係櫃筒篤電話，斷估都係約緊仔。

『臭雞。』

鈴～～！鈴～～！
「喂，你條女一支箭走咗喇。」
放學鐘一響，阿悠就飛奔出課室。
「不如你收一收皮，收少少已經夠，唔洗多。」
「講吓笑啫，杰哥。你咁唔玩得咖咩？」「但冇得諗咩？條腿好長喎，啱哂你。」
「冇。得。諗。」
「OK！你話點就點！宜家返歸？」
「未呀，去一去圖書館先，今晚再講！」





事關我應承咗阿然，幫佢借書。搵書當然難我唔到，我初中成日都摺係圖書館，上吓網睇吓書。

「唔該想借書。」我行到Counter搵人幫手。
「啊！係係！我嚟緊！」係一把嬌滴滴嘅聲音。

「你好！係咪想還書呢？」
「唔係呀，我想借書。」
「好呀。請等等。」佢天真無邪嘅笑容，我覺得好可愛，忍唔住微笑。
「林俊杰？你做咩係度笑呀？」
我比佢嚇親，因為佢竟然知道我叫咩名。
「你知我全名？」
「哈，因為。。因為你張學生證係我度囉！」
佢講完之後微微笑，呢刻我覺得自己柒咗，仲有啲面紅。
「好喇，搞掂喇！」




「哦。。唔該你。。」
「下次見！」

佢可愛嘅笑容配上佢嘅笑眼，如果我有個精靈球，我一定收服佢。

「下次見？」
「係呀～你下星期嚟還書咪見到我囉～」佢再一次展露佢個笑容。
「同埋我哋係同一層嘅，好易見啫。」

同一層？原來佢同我同級，仲以為佢係師妹，奇怪我從來都冇留意到佢存在。太多嘅疑問係我腦海盤旋，導致我呢刻腦閉塞。

「你叫？」
「我叫諾曦，４Ｃ咖！」
「哦！咁還書個日再見喇，拜拜！」
我頭也不回就離開咗圖書館，離開個刻，都仲聽到佢嘅笑聲。

我跑返上班房，係樓梯見到阿希。
「喂，阿杰。。」
「收皮喇！屌你老味！我話你知，唔想死嘅，宜家即刻落圖書館借兩本書！」

我命令阿希去借書，因為，我要還書，我要還好多好多嘅書。

「借？借咩呀？」
「事撚但喇，總之，借！借完俾我，就係咁簡單！」

之後，我跑返自己班房。沿路見到每一個我識嘅人，我都叫佢哋借書，借乜都得。

途經阿然班房，我衝入去，阿然都仲係比囡圍住，我擺低本書俾佢。

「以後想借書，同我講，我樂意為你效勞。」

我捉住阿然隻手講，旁邊兩條囡都俾我嚇親。


續