是咁的，我做咗份好奇怪嘅intern: 第二章

「見習殺手……？即係……滅蟲？」我不肯定那個男人在說什麼，反正殺手又不是真正的殺手。

「唔係，係貨真價實嘅殺手。殺人嗰隻。」他卻這樣說。

我一下子還是無法消化他的話，只是呆若木雞的站在這裡。

是貨真價實的殺手？

「你估呢個世界嘅平衡真係靠火箭兵團維護咩？」他似笑非笑的說。





「我只係估唔到香港有殺手啫……」我這才擠出一句說話。

「廿年前已經有啦，陶大宇，師奶殺手，不過佢而家轉咗行做萬有引力測試員，呢排倒轉緊地球咋嘛……ok我只係想舒緩下氣氛，但係無錯，香港係有殺手，而且唔止一間殺手公司。」

所以我幾個月之後便會殺人……？

「大部份人都係過唔到心理關口，但係請你記住，你唔做，呢個行業唔會消失，要死嘅人唔會繼續生存。你需要諗嘅，只係你對呢份工有無興趣，同埋……承唔承受到佢嘅代價。」

「代價？」





「同身邊嘅所有人斷絕關係，從此孤獨生存，只有呢間公司嘅人你先會繼續接觸。一來係保護身邊人，二來……」他苦笑了一下，再說:「你覺得真係會有人接受到自己識得一個殺手咩？」

我快速思索了一下。父母早逝，沒有什麼朋友……看來我是真的適合？

「好少可有人聽到呢度都仲未走，可能你就係注定要加入我地嘅一份子。」他再游說。「當然你唔使急，可以考慮下再返嚟答我地，不過最好就快啦，始終實習期有限。」

實在是太瘋狂了，真是要接受嗎？

「但係我真係要親手了結人地嘅生命喎……」





「喺你之前嘅見習生，都未有一個需要親自落手殺人，你咁樣會唔會舒服啲？」他再說。「我再講多次，要死嘅人始終會死。仲有，我地唔係來者不拒，如果嗰個人唔值得殺，我地唔會接。你當係一份儆惡懲奸嘅工作啦。」

「但係……我地大家都係人，有乜嘢資格做判官？」

「正如你問大家都係人，警察有乜嘢資格拉人，法官有乜嘢資格斷定一個人有無罪，政府有乜嘢資格制定措施要我地跟，本來有好多嘢就無得解。」

我不得不說，他真的解開了我心中的枷鎖。

我最終決定了接受這份工作。

「不過你都要通過測試，我地先會請你。」

我本來以為都是體能測試，怎料考反應和觀察力的部分還比考體能更多。

「都幾有潛質，你合格。而家我要正式問多你一次，你係咪願意做我地嘅見習生？最後一個機會反悔，當你簽完合約之後，你見習殺手嘅身份要絕對保密。我地會喺你身上安裝追蹤器同監察器，確保你唔會洩密。一旦發現，我地會用我地最擅長嘅方法處理你。」





「無問題。」