是他也是妳和我: 15. 沒有下一夜

「搞掂, 跟住焗30分鐘就食得。」
樂兒好滿足咁望住個蛋糕, 然後柵埋個焗爐門。

「你跟住......」
樂兒正想問阿角想食乜, 轉一轉身, 正好阿角都睇緊個蛋糕,
兩人幾乎面貼面, 樂兒嚇到縮一縮。
「小心, 焗爐!」
阿角好緊張咁拉住佢, 不過又無攬住, 只係拉住右手手臂。
只係兩人仍然係幾乎面貼面。
然後, 阿角好似無表情咁, 自己企返直, 同埋放開樂兒隻手。




正當樂兒唔知俾咩反應時, 阿角又變返笑口噬噬果個樣, 仲伸手指篤一篤樂兒個鼻, 就話:
「傻妹, 整蛋糕整到個鼻都有。」
樂兒睇住阿角塞咗隻手指入口, 就話佢:
「污糟架! 乜你咩都擺入口?」
點知阿角只係話:
「都幾好食丫!」
然後, 阿角又篤一篤樂兒個鼻。

洗完手出返黎, 樂兒又走咗入阿角間房:
「睇吓你有無整巢我本書先。我買黎珍藏嫁!」




跟住樂兒就喺第三格書櫃拎咗本《哈李波突》第二卷出黎, 摺開黎睇。
睇咗兩眼, 就塞咗本書俾阿角:
「你繼續讀啦!」
「吓? 呀! 好啦!」
阿角就企咗係度讀, 而樂兒就坐係張床度聽佢讀。
讀咗兩頁, 阿角終於忍唔住, 合埋本書, 問樂兒:
「其實樂兒, 你......」
樂兒諗咗一諗, 答:
「無。我同佢無喺返一齊。」
阿角明顯好開心咁, 又口疾疾咁問:




「咁...」
「有, 我仲有見佢, 佢亦都返返入團, 即係返童軍。」
阿角又突然好失落, 又問:
「咁...呀...」
「唔會, 起碼短期內, 我都唔會。」
阿角又好閃縮咁, 坐埋落床, 問:
「呀...咁...」
「唔會, 我咪話過, 我地係朋友囉!」
阿角又好訝異咁問:
「但...」
樂兒搖搖頭:
「一方面, 我真係無打算再拍拖住; 另一方面, 其實我都無答應過你。你記唔記得?」
樂兒瞪大雙眼, 配上個好真誠既微笑, 側側地面咁望住阿角。阿角發現, 原來自己真係好鍾意佢。
但係, 只要有一日繼續維持呢個關係, 阿角就唔能夠放低呢份感情。





樂兒突然又轉身, 向住朗豪坊, 就話:
「其實我地仲後生, 與其放咁多時間去拍拖, 不如做多D有意義既嘢。」
樂兒又轉返身, 拍一拍阿角個肚腩, 又話佢:
「你都要做多啲運動呀, 肥仔。要唔要姐姐陪你去跑步?」
阿角突然好似諗通咗, 露出一個笑容, 回復返正常咁, 笑返樂兒:
「妳都好似比之前肥咗啲啲喎, 姐姐!」
隨手又篤咗篤樂兒既手臂。

-------------------------------------------------

「好似甜咗少少, 你話呢?」
樂兒咬咗一啖個蛋糕, 皺一皺眉, 問阿角。
阿角反而好享受咁話:
「唔係呀, 好似你咁甜, 幾好丫!」





樂兒嬲咗一吓, 大大力搣咗阿角手臂一下:
「丫你, 問吓你意見, 你又笑我!」
阿角搓住隻手就答:
「咁我真係鍾意你丫嘛, 而你笑起上黎真係好甜, 我好鍾意嘛。」
樂兒都無佢咁好氣:
「得喇, 知你鍾意我喇, 都唔使句句都講丫。」
阿角突然靜咗落黎。

「做咩呀, 阿角?」
樂兒見阿角咁奇怪, 就問佢。
但阿角只係搖搖頭, 連眼都紅埋。
樂兒只能夠靜靜咁望住阿角, 望住佢滴咗幾滴眼淚。
過咗一陣, 阿角抹一抹眼淚, 就笑返, 講:
「唔好意思。不過可能呢排都會咁。」
樂兒搓一搓阿角背脊, 無講嘢。




阿角又拎起一舊蛋糕, 食咗一啖, 笑住就話:
「好似真係甜咗啲喎, 你有無睇錯食譜嫁?」
樂兒都係無答。
阿角自己拎電話, 開返個食譜睇:
「無丫, 80克糖嘛。」
又拎起一舊, 又咬咗一啖:
「甜甜地, 都幾好食丫! 你又試吓啦!」
跟住就塞去樂兒嘴邊。
見樂兒食咗舊蛋糕, 阿角又話:
「呢啲留返俾你拎俾伯母食啦!」
阿角打開個膠盒蓋, 似乎想將蛋糕放入盒, 然後就拎蛋糕, 但跟住又停低手, 話:
「痴咗底, 拎唔到。」
樂兒開始明白, 配合住阿角,就話:
「不如成個盤拎返去啦。」





佢地拎咗個大袋, 入住成個盤, 阿角就話:
「呢隻味熱好食啲, 不如趁早俾伯母試吓味?」
樂兒點點頭, 就拎埋背囊, 行去門口, 答:
「我遲啲, 洗乾淨, 就約你還返個盤啦!」
阿角明白樂兒既意思, 都點點頭, 答:
「OK, 等妳電話。我送妳返去?」
樂兒搖搖頭:
「唔使啦, 你仲要洗嘢。唔整返乾淨個廚房, 會俾媽媽鬧呀!」
然後樂兒行出門外, 就對阿角講:
「拜拜!」
阿角仍然帶住一絲既希望, 同九分既失落, 答樂兒:

「拜拜!」