是他也是妳和我: 13. 第十二夜

喺舞台劇入面, 其實四家姐只有好少戲份。
佢自己都話係玩吓, 同埋幫吓班朋友執頭執尾多。
套劇好好睇, 雖然個劇名好恐怖:
《倒吊在生命樹下的人》
阿角去睇, 只係因為覺得個戲名好襯自己而家。

根據三家姐既回憶:
「從來未見過細佬喊得咁犀利。」
阿角既回應係:
「套戲好好睇嘛! 睇完仲成個人鬆哂, 好似咩麻煩嘢都俾哂耶穌咁!」




四家姐既回應係:
「咁咪好囉!」
但係, 淨係得四家姐知道, 阿角原本係拎咗2張飛。早一日既飛。
但亦難得, 個細佬真係有睇戲, 講得返成個劇情出黎之餘, 連邊度精彩邊度要改, 幾乎同尋晚既演員檢討一樣, 好明顯細佬真係有睇戲。
同埋, 見到佢決志有舉手, 有行出黎, 祈禱信耶穌。
未嘗唔係一個好結果。

---------------------------------------------------------

初七, 啟市。




阿角有半晝既工作, 都係 farewell party。
難得老細肯放手, 俾個老伙計過埋年先退休, 呢個時勢真難得。
而且開工利是係玩大抽獎, 由100蚊至1000蚊自己抽, 雖則阿角係新仔, 但係最尾留低俾佢果封都有200蚊。
諗返好似無人抽到100蚊喎。

新年其實無嘢做, 準時6點「さようなら」。
阿角成世仔都無抽獎運, 難得咁都抽到獎, 就去斬半隻豉油雞孝敬吓媽媽。
返到屋企, 四家姐同五家姐都已經返到屋企排隊沖涼, 阿角就幫吓媽咪手開飯。
坐低食飯, 媽咪就問:
「你話之前都係叫交接, 咁即係今日第一日返新工, 順利嘛?」




阿角夾隻雞翼俾媽咪, 就答:
「其實今日都無嘢做過, 聽日先正式啟市。今日叫做執吓頭執吓尾啦。」
媽咪就放低筷子, 拎咗封利是出黎, 遞俾阿角:
「工作順利, 利利是是呀!」
阿角雙手接過:
「多謝媽咪!」
家姐開始嘈:
「嘩! 我地都無!」
媽咪開始反駁:
「咩無呀, 你做第一份工果陣都有俾你啦! 你呀, 仲讀緊書, 到你返工先啦!」
好開心既家庭。

10點幾, 大家又各自返房訓。
阿角又慣性地, 睇吓 Text, 睇吓樂兒......
輸入中......




等咗成5分鐘, 阿角終於見到樂兒打既嘢:
「阿角, 你點呀?」
「我好好呀!」秒回。
然後, 阿角既電話響起。
「樂兒」

阿角過份興奮, 反而樂兒好似有啲嚇親:
「阿角, 你, 無嘢丫嘛?」
阿角都發現自己太過興奮, 用返平時既聲線:
「你今日返學, 點呀?」
樂兒突然用好慘既聲音講:
「我未做哂功課, 阿sir話聽日交唔到既話, 就要扣分。」
阿角強忍住衝動, 用返好耐以前既講嘢方法:
「咁我有無嘢, 可以幫到你?」
「咁你陪住我做功課啦。不如你繼續讀丫?」




「讀《哈李波突》?」
「好唔好呀?」
「好呀! 你知我唔識傾偈架啦! 咁我讀埋第一本最尾果度啦......」

阿角一路同樂兒傾, 一路記住樂兒喺 Text 果句:
「其實我都未俾你了解我, 不如我地做住朋友先啦。好無?」