是他也是妳和我: 9. 第七夜 (3/3)

「咁做乜唔追 Carman ?」
樂兒食位兩粒花生問。阿角就繼續講啦:
「所以故事就係咁黎。結果我入咗 U , 但係佢就無 offer, 所以佢自修 retake 多一年。」
樂兒嚇咗一嚇, 話:
「乜你累到人入唔到大學牙?」
阿角怨枉地說:
「無呀! 我都有繼續陪佢溫多一年書, 成日喺大學搵定房等佢黎溫書。」
跟住又話:
「等佢考完最後一科, 我哋食Tea慶祝考完, 之後就喺City紅門外, 同佢講咗囉。」
樂兒完全投入花生mode :




「講咩呀? 講鍾意人牙? 咁有心機陪佢一年, 佢咪好感動囉? 咁都唔得米?」
「好人卡囉! 我係一個好人嘛!」
樂兒望住阿角, 見佢好似期待緊D乜咁望住自己, 但又唔知佢期待乜。
想我問落去? 想我讚佢? 定點? 
唔知喎! 
傻仔。

「咁第三個呢?」
阿角又dup返低頭:
「呢個就大學同學黎既。你知 Engineering 無乜女仔讀, 有既都 O Camp 俾班組爸 mark 哂。Year 2 突然有個女仔插班, 仲要係全班唯一一個著裙返學既。」




阿角唔理樂兒「嗚」咗一聲, 繼續:
「身為有眾多靚仔fd既毒男, 一早背哂佢地班人既對白, 所以好快就可以『扮到變好fd』。識落傾開偈知道, 原來佢又係姐姐……」
阿角無拿拿眼角哨咗一下樂兒, 樂兒就堀返阿角一眼。阿角叉開話題繼續答:
「又係住旺角, 女人街果邊, 所以就日日約埋一齊返學一齊放學。」
「咁仲唔搞掂?」
「跟住個Sem我就 Quit 咗 U, 出咗黎做嘢, 就無再見。」
樂兒似乎食夠花生, 放返包花生入膠袋, 又坐直個人, 轉身望住阿角, 問:
「咁, 做嘢啦, 咁多靚女, 都無個啱?」
阿角突然認真mode, 坐直個人, 轉過身, 慢慢咁, 拎起樂兒雙手, 望住樂兒雙眼, 慢慢咁講:
「有呀, 睇啱咗一個, 今次唔放手。」




 
阿角緊緊, 握住樂兒雙手, 望住樂兒雙眼。
樂兒雙眼閃咗一閃。
阿角開口, 就話:
「我鍾意你! 你會做我女朋友嗎?」
樂兒又眨一眨雙眼:
「真既咩?」
「真既。」
阿角講完, 又攬實樂兒。
「知道喇知道喇! 知道你錫我了! 」
阿角輕輕扼住樂兒既右手, 就問樂兒:
「咁你而家放唔放心我?」
樂兒若有所想, 望返去面前既書櫃, 答:
「等我再觀察吓你先啦!」
樂兒又企起身, 拎起大褸, 細細聲背住阿角講咗句:




「總之, 我唔係處女啦。」
阿角呢個時候企咗起身, 從後面抱住樂兒, 將個頭貼住樂兒左邊面, 就講:
「多謝你肯話我知。好多謝妳!」
樂兒細細聲問:
「你唔係介意咩?」
阿角輕輕力搖頭:
「唔呀! 我驚妳介意我咩都唔識添呀!」
「點會呀! 你無咩過仲好啦!」
「咁, 你教我啦!」
樂兒fing開阿角對手, 轉身對住阿角, 嬲住問:
「咩呀你! 咩教你呀?」
阿角雙手放在樂兒兩手臂上, 就話:
「我咩都唔識, 驚妳會唔鍾意呀!」
順手又攬實樂兒:
「到適合既時候, 你再教我啦!」




樂兒諗咗一諗, 伸出雙手, 攬實阿角。隔住大褸, 從阿角身上, 傳黎溫暖既體溫。
 
----------------------------------------------
 
兩人企喺度攬咗無一陣, 大門就有鎖匙聲傳黎。阿媽返到屋企。
好彩個衣櫃夠大。
樂兒同阿媽打聲招呼, 同埋講句「生日快樂」, 阿角就話送樂兒返屋企, 兩人走出門口。臨出門口, 阿媽叫停樂兒, 派封利是俾佢, 又派多封生日利是俾佢, 又老懷安慰咁望住樂兒, 叫佢多D上黎食飯。
 
年初二10點幾既亞皆老街, 仍然好多人。阿角拖住樂兒既手, 一路行, 一時又望吓樂兒, 一時又滿足咁傻笑, 搞到樂兒唔知點咁。但係, 望住阿角個傻樣, 樂兒又感到安心。