是他也是妳和我: 3. 第三夜

阿角無諗到, 個電話一傾, 就傾到凌晨4點幾。
記憶既盡頭, 好似都係阿角訓著教, 先完咗個電話。

阿角由細到大都無試過都女仔傾咁耐電話。
又唔係無同女仔傾過, 但係都只係同女同學傾吓功課, 或者為咗中學午間廣播劇而對稿, 最長果次都只係同 (鍾意既) 女同學 (聽佢訴苦, 佢見返之前舊校個男朋友之後點點點.......) 傾咗個零鐘。
正宗既 A0 , 經驗值零既人生。

無諗到呢個電話, 樂兒講咗好多自己既嘢俾阿角知, 樂兒由屋企人因各種原因唔係屋企, 所以成間屋得佢一個人, 去到設計學院班同學平時無聊D乜, 都講俾阿角知;
而阿角又講返佢既單親而又成屋女人既日常生活, 連樂兒都識得串返佢:
「原來你洗過既女人底褲, 仲多過我呢個女人。」




阿角都會自嘲:
「無偈啦, 我D家姐多到可以開一枱麻雀, 而我只係敍茶遞水。」
樂兒又會窒返佢:
「咁你好應該好清楚女人既話題先啱喎?」
阿角又識答:
「如果成堆都係家姐既話, 咁我就會自然發揮囉! 話時話, 其實我地咁好傾, 都係因為你都大我兩個月, 我係咪應該叫你『姐姐』呢!」
「咁就乖喇, 弟弟!」

-----------------------------------------------------





鬧鐘響, 阿角又起身返工。
見到有1個訊息:
「你係咪訓咗呀? 訓咗既話, 我都訓喇。聽日搵你啦!」
阿角又睇唔明:
(聽日? 即係星期一定星期二先?)
唔理喇, 返工。

「Hi, 靚女......」
今日好D, 阿角開到2張單。
(算啦! 好頭好尾。收工。)




阿角已經放棄:
(份工都唔啱我, 做唔黎。好彩已經搵到工。)
阿角返到公司, 辭完職 (俾老細話: 做唔夠一個月就走人) 出返黎大街, 見到有人等緊佢:
「今日咁早收工既?」

今日天氣暖返, 樂兒著咗件淺紫色樽頂冷衫, 深藍色牛仔褲, 紫色波鞋, 紅色背囊。
不過扎咗個髻, 但係無戴眼鏡。手上又拎住包雞蛋仔, 食緊。
阿角心頭好輕鬆, 連頭髮同笑容都鬆開:
「係呀, 辭咗職喇。」
反而樂兒好驚訝:
「辭職? 做得好地地, 做乜唔做呀?」
呢句說話反而嚇親阿角:
「吓? 我做得好地地? 你唔記得咗我點識你呀?」
樂兒記返起尋晚傾過既內容:
「咁又係~~」




阿角繼續踏前, 話:
「一路行一路講啦!」
樂兒就一齊轉身, 跟住佢身旁一齊行:
「我要返屋企呀, 阿媽煮咗飯。」
阿角邊行邊擰轉頭望向樂兒:
「吓? 唔係陪我食飯咩? 我屋企無飯食喎!」
「下次先啦! 最多我送你返屋企。」
阿角都係住喺旺角, 不過就近花園街街市。
(編按: 行10分鐘就返到公司, 竟然辭職 !!! 嬲 !!! )
而樂兒住大角嘴。

去到阿角屋企樓下, 樂兒將半包雞蛋仔遞俾阿角:
「你幫我拎住先....」
跟住除低個背囊, 打開拎咗本書出黎:
「你等陣食完嘢, 沖完涼, 就好打電話俾我喇! 我要聽《哈李波突》呀!」




阿角望一望右手半包雞蛋仔, 又望一望樂兒手上本用書套包得好靚既《哈李波突》第一集, 就話:
「你本書成3吋厚, 得半包雞蛋仔做人工?」
樂兒就咋起驕黎:
「好啦! 讀俾姐姐聽啦! 無人肯幫我讀呀!」
阿角無佢咁好氣, 左手接過本《哈李波突》, 就話:
「一晚讀唔哂架! 我聽朝要返新工。」
樂兒真係好開心咁笑, 面珠又變到紅扑扑:
「就咁話啦! 12點前訓啦!」