燒味檔撞到個女仔,佢話要幫我搵返最重要嘅人？

成日聽人講話馬路如虎口,冇諗過呢隻老虎平時都係食人,但係到我嘅時候就食咗我嘅記憶.唔單止係關於意外當日嘅事唔記得,就連身邊嘅人都唔記得.不幸中之大幸係我嘅身體完全康復,並冇啲咩大事,而醫生都同我講短期失憶呢啲好快就會記得返唔使太擔心.
—————————————————————
而事實證明佢冇呃我,兩個禮拜內我已經記得返屋企人同好多朋友.雖然我隱約覺得仲有個好重要嘅人被我忘記咗,但我諗隨住時間我會記得返佢.
—————————————————————
為咗慶祝我嘅好轉,我決定去買盒燒鵝飯慶祝下.去到屋企附近嘅燒味檔之後,我一踏入去腦海就浮現兩個身影,但係佢哋嘅身影好模糊.我嘗試再諗清楚嘅時候,就感覺有個人撞咗過嚟.
—————————————————————
「啊…唔好意思啊…」
佢抬起頭望我嘅時候露出一個驚訝嘅樣,之後慌忙咁避開我嘅眼神.
「嗯…你識我嘅？唔好意思啊因為我前排被車撞失憶,又見你個樣好似識我咁所以問下.」
呢句嘢我已經講過無數次,有一兩次真係認錯人,條友就當我係呃人咁急急腳走咗去.




「吓？你？失憶？你認真？」
我好認真咁點頭,話俾佢知我唔係講笑.
「我…以前係你嘅好朋友.」
佢仍然逃避緊我嘅眼神,我諗住問佢叫咩嘅時候後面就傳嚟罵怨.
「想點啊,塞住晒個門口,唔買就走啦.」
我望一望後面嘅肥師奶,佢仲細細聲講咗句嘢.
「而家啲廢青乜都唔做,淨係識阻住地球轉.」
我正準備反擊嘅時候佢就拉住我之後同個師奶講咗聲對唔住.
「算啦,啲師奶係咁戇鳩,唔好理佢,入去坐低再講啦.」
—————————————————————




想回到過去 試著讓故事繼續 至少不再讓你離我而去
—————————————————————