[微血腥] 覺能之戰 (逢二、四更新): 真相篇第四十三章: 往事 (五)

二人離開醫院樓層後，澈硯一臉若有所思的樣子，本來梓旻沒有打算理會他，但他一直持續到下班的時間。

「搞咩呢？全日都咁嘅樣。」梓旻回宿舍的路上問

「一星期喎？一星期可以搞到咁多嘢？」澈硯說

「咩一星期？」梓旻問

「你家姐消失一星期，一星期裏面仲要亞常佢地可以先後加入，仲要推返李博士，仲要再叛變，有可能咩？」澈硯問





「我點知唧？我家姐都唔同我講嘢！」梓旻也開始疑惑起來

「仲有，我尋日入到去放巨大百核屍體嘅位置，影埋相⋯⋯但我唔知應唔應該俾你睇⋯⋯」澈硯猶豫道

「咁你就唔好講我聽啦！講得就俾我睇啦！」梓旻不爽的回答，然後就跟着澈硯回到澈硯的房去，澈硯表現非常緊張，令梓旻很不自在，但當澈硯打開電腦相片後，梓旻就明白為何他的反應那麼奇怪，相中的屍體居然是他姐姐戴月文

就在此時，詡扣門並大聲問：「澈硯！梓旻係咪係你度？」

相片的內容震驚梓旻，而詡的出現讓梓旻腦內閃過當時出巨大百核任務時詡奇怪的反應，不知何故要與梓旻同組，詡似乎早知內情。梓旻的臉瞬間變得脹紅，皺起眉頭及緊鎖下巴，滿臉怒容的衝去門口。





「唔好吖！」澈硯想阻止也阻止不了，梓旻已經把詡拉進來，並按到床上，澈硯立即幫忙關上門。未等詡定神，梓旻使用AP，憤怒道：「由呢刻開始，係呢間房裡面，你唔可以對我講大話，如果唔係就全身上下都痛到你想死！」

「喂！咁我講又死，唔講又死喎！」詡驚訝道，但梓旻沒有理會他，把他拉到螢幕前

「講我聽！點解收埋百核屍體嘅地方有我家姐係度？」梓旻指着螢幕

「我唔⋯⋯呀！」詡似乎全身上下發痛，痛得躺在地上抽搐

「你知！講！」梓旻憤怒叫





「講啦！痛死你呀！」澈硯在旁道

「呀⋯⋯」詡繼續大叫

「個個係唔係我家姐？係定唔係？」梓旻大聲問，詡大叫掙扎了一會，最後用盡力點頭。點頭後，他不再抽搐，但按著頭似乎在暈，然後抱著垃圾桶吐起來

詡的回應讓梓旻感絕望，無力的坐在床上，問：「咁頭先我一直講嘢嗰個係邊個？」

剛吐完的詡癱坐在地上，答：「都係你家姐。」

梓旻立即望過去：「咩意思？點會同時有兩個係我家姐？你又講大話？」

澈硯插話：「佢冇全身痛喎！係唔係同異時空有關？」

詡望望澈硯，望望梓旻，輕輕點頭後，又抱垃圾桶吐起來，吐完再道：「放過我啦！我答唔到喇！會死人㗎！」





「得你可以講咋！」梓旻大叫道

「我爸都可以！我爸都可以！」詡立即道

「你爸？又邊位？」澈硯問

「亞常！」詡說，兩人大驚

「佢啱啱先話唔講得喎！」梓旻說

「但佢啱啱叫我帶你地上佢房解釋喎！」詡回，梓旻及澈硯二人對望

「澈硯，醫好佢！我地走！」梓旻說完，澈硯便上前醫治詡