[微血腥] 覺能之戰 (逢二、四更新): 真相篇第四十三章: 往事 (三)

「點解咁肯定呢？」樺問

「解唔到，除非佢地成功拉攏月文，根本唔會發生呢啲事。而佢地成唔成功拉攏月文就要睇你喇！梓旻！」

「所以你就用盡方法拉我入嚟？」梓旻望向甘生

「你注定會加入我地，我只係順水推舟。」甘生道

「咩叫注定？同孟蝶講嘅另一個時空有冇關係？」梓旻這一問，三人都表露驚訝的表情，但很快就回復





「都正常嘅，佢唔知月文唔講俾梓旻知。」甘生好像想把事情合理化

「我係咪應該可以知多啲呢？」梓旻問

「今次你真係要自己問你家姐，如果佢肯俾你知，我都好願意講。如果唔係，我唔肯定後果會點。」亞常道

「至少你唔會死，因為你地唔可以互相傷害？」澈硯目不轉睛的看着亞常

「我都有弱點係佢手嘅，我唔死唔傷，都有其他嘢需要佢幫手，所以冇得傾。你地走啦！再留都唔會知多啲㗎喇！」亞常趕他們走，但他們想賴死不走。見狀，甘生手一揮，三人被推出會議室外





被甘生推走後，樺先回M隊辦公室，而梓旻氣沖沖的拉著澈硯回到零隊辦公室，他希望能夠找到月文，並逼她說出整件事的來龍去脈，但他們發現月文並不在辦公室，只有Lina在處理文件。

「你知唔知我家姐去咗邊？」梓旻暴躁的語氣及突然出現嚇了Lina一跳

「我諗佢而家應該喺醫院樓層探壹雄，壹雄啱啱醒返。」Lina答完，梓旻即衝出辦公室，澈硯緊隨其後

他們來到醫院樓層，衝進壹雄留醫的隔離病房，這時月文、浩政及壹雄在對談。

「家姐，我⋯⋯」梓旻打開門道





「閂埋道門，企埋一邊，一陣間同你傾！」月文沒有讓梓旻把話說完，便指示他到病房內的一個角落靜待。然後，她再望回壹雄，繼續剛才他們未說完的話題：「我當然好歡迎你唔需要我幫你洗走你過去嘅記憶啦！但你必須要確認自己能夠處理得到自己嘅情緒同壓力，而且由於你已經唔需要我幫你抑壓回憶，我必須要做啲嘢保險自己，例如落暗示。」