[微血腥] 覺能之戰 (逢二、四更新): 謊言與隱瞞篇第三十一章: 新同伴？(六)

「唔通係AP劑？」梓旻嘗試回想當時AP劑的顏色

「AP劑好似係暗紅色。假如嗰支係AP劑，即係佢未經你准許就幫你注射？」詡問

「呀……我唔知，不過佢地的確建議我入隊，佢地話會盡全力幫我搵失蹤嘅屋企人。」子謙發現了一包薯片，立即拿起問：「食唔食得？我好多日冇食過零食，入面只有啲冇味嘅肉同飯，知唔知有幾慘？」

「食啦！零食係公家。講返轉頭，你屋企人唔見咗？邊位屋企人？」梓旻問

「父母同哥哥，喺我被捉後約一星期。」子謙停下了吃薯片，嘴角向下彎道：「雖然唔係關係好好，真係唔算好好。佢地錫亞哥多過我，雖然佢地成日話將佢地間鋪留畀我。但係我唔想佢地就咁消失。」





「成家唔見曬？」梓旻驚訝問，子謙點頭

「我相信先鋒隊可以幫到你，唔好太擔心。」詡拍拍子謙的手臂

「係，我相信佢地得，高級隊長好似都可靠。」子謙再次吃起薯片

「高級隊長？你指浩政？」梓旻問

「唔係，佢係……」子謙忽視停下，手按著頭，好像快要倒下一樣





「你冇事吖嘛？」梓旻關心問

「真係粗暴嘅洗腦。」詡低聲道

「洗腦？你分到？」梓旻邊問，邊把子謙扶到休息室，讓他躺在沙發上

「唔完全分到，但呢個(指指休息室那邊)一定係洗腦，講到指定嘅資訊就頭痛。」詡拿起了剛才子謙未吃完的薯片

「我記得上次亞常想洗我地腦，令我地呼吸困難咗一陣。」梓旻回想起之前的會議





「亞常個隻未令你地好似子謙咁暈低算係溫柔，甘生個隻會仲自然啲。」詡吃起薯片

「自然？」梓旻問

「洗咗都唔係好覺，只要用心諗下就知自己被洗腦，但問題係就算知都解除唔到。所以係我角度係唔知自己被洗腦會開心啲，因為知咗都會跟住做。」詡解釋

「即係話，比起痛苦生存，寧願做個無知嘅人？我唔太同意。完全冇可能解除？」梓旻問

「有嘅……其實有非常充分嘅理由唔跟得佢地就可以，例如你跟佢地洗腦內容就會有重要嘅人死。不過聽聞最強嘅洗腦係應該令你冇理由去反抗，甘生曾經講過自己未做到咁嘅程度。」詡回

「如果……可能洗腦唔畀我攞武器，但你夾硬迫我攞咗會點？」

「會難受或恐懼到想死，好似怕自己攞咗武器之後會發生危險嘅事。即使你知唔會發生，你都會好驚。」

「咁預防呢？」





「你強過洗腦者就冇問題，或聽聞你本身冇某種常識或感受都可以。例如你本身係冇人情嘅人，就算點洗腦去愛人都冇用。」

「你真係好熟喎……」梓旻假裝質疑詡

「我……我……」詡立即緊張起來

「講笑！講笑！」

剛好，肆祿及伍清回來，梓旻及詡便沒有繼續話題。直至下午，由於子謙剛頭暈而沒有胃口吃飯，他拜託梓旻享用午餐後買三文治給他。梓旻及Lina一同走到餐廳，時間還未到大多數同事用餐時間，因此餐廳內幾乎沒有人。他們買了飯後，找了一個角落坐下，壹雄很快到來。