[微血腥] 覺能之戰 (逢二、四更新): 敵或友篇第二十七章：冬季覺力祭開始 (二)

眾人都湧到會議室去，現正播放西北部沼澤公園的宣傳片及簡介。簡介播放完之後，男女主持用中英文讀出開幕致詞：「歡迎大家嚟到冬季覺力賽，今年會舉辦31場嘅比賽，今年仲要由隊員級全力比賽，真係令人既興奮又期待！大家都可能已經對我地隊長級嘅隊員有所認識，係時候要認識一下AP特種部隊嘅『新血』喇！」

在辦公室的眾人也不禁笑了一笑，大家都知道這安排非讓大眾認識新人那麼簡單。

「仲有仲有！我地今年電視直播，令更加多人可以監察我哋隊員嘅質素，仲可以提升大眾對覺力嘅了解。就讓我地開始今個季度嘅覺力賽啦！喺隊員入場正式開始之前，提提現場嘅觀眾，你地可以用電視調教有評述員嘅即時轉述或冇評述員嘅轉述嘅聲道！而係甘氏大廈收睇直播嘅觀眾，如果想收聽到評述員嘅即時轉述，記得照指示去到有轉述嘅樓層收睇比賽。好！我哋今季第一場比賽正式開始！」

「嘩！第一場就係單方面大屠殺！」雲耳木耳看到比賽名單後道，畫面顯示其中一隊是由盲妹、岡仔、Lorre、亞宏及Curse組成的隊伍，而另一隊的名字梓旻一個都不認識，只知是兩T兩P一M的組合

「叫得佢地打頭陣總有原因嘅！」鹿仔道





「對面個隊頂唔到十五分鐘就真係純陪襯！」富哥說，他由評述員的即時轉述得知對戰隊伍

「抽籤喇！抽籤喇！唔知抽到邊個位開始呢？」Kiki興奮道，畫面中岡仔抽中了「C」，而另一隊抽中了「A」，然後畫面轉成公園地圖
 

比賽隊伍需於所抽中的起點開始比賽，而他們的據點將會是各個觀鳥屋，英文顯示其所屬起點及觀鳥屋。

「咦？有啲機喎！另一隊近啲自己嘅觀鳥屋喎！」詡指著畫面

「傻啦！盲妹組喎？少少路程唔係咩大問題，而且唔一定返去防，係我有咁嘅牌面會直接攻！」鹿仔似乎對盲妹組充滿信心





「我都覺！廿蚊盲妹組！」Kiki把二十元放在會議桌上，過去這動作是亞豪會做的，想到這梓旻心裡又沉了一沉

「我一百盲妹，但個個都盲妹冇嘢好賭喎？」鹿仔拿出一張一百元

「咁我對面組……十蚊。」富哥加入賭局

「十蚊咁少？我廿蚊！」詡也興奮的跟上，然後充滿期待的望著梓旻

「我……十蚊盲妹……」梓旻避開了詡的視線





「我覺得都有啲機，十蚊對面！」Crystal拿出十元

「我十蚊對面，因為我有朋友喺嗰組！」雲耳木耳邊拿出錢邊說

「我都係盲妹！」澈硯拿出五十元放在桌上

對戰的隊伍於各自起點就緒，開賽槍聲一響。A點的隊向所屬觀鳥屋狂跑，而盲妹隊如鹿仔所說，他們多彩取進攻態度多於防守。Curse首當其衝從起點C向起點A跳過去，同時在空中用專屬武器吹泡機向敵方吹出泡泡，而對方一位如熊般高大、穿著重厚形似裝甲的制服的P隊男成員手一拍，所有泡泡即時爆開。同時，一個穿著大露胸裝扮的T隊男成員右手持虎爪刀，把刀轉一轉再於空中一劃，Curse的手臂的衣袖被割開，Curse一瞬間露出痛苦的表情。

「大嚿嘅叫亞熊，露胸叫Tiger。」鹿仔介紹

Curse當然沒有放棄，著地後一口氣放出大量泡泡。亞熊後退兩步，帶上面罩大口呼一口氣，從面罩上的位於口部的裝置呼出大風，一半以上的泡泡爆開，剩下的向Curse飄去。Curse手一揮，泡泡也停下來，再聚合成兩個大泡泡，再由上向下揮手，手一指亞熊，兩個大泡泡立即向亞熊移動，亞熊盡力避開泡泡。同一時間，Curse一個關斗跳到Tiger的面前，Tiger向Curse揮下刀，Curse把Tiger的手推走，再嘗試用槍指著Tiger，又被Tiger推開。

鏡頭一轉，盲妹、岡仔、Lorre及亞宏在十字路口分道而行，盲妹及亞宏往觀鳥屋C走去，而岡仔及Lorre則去觀鳥屋A搶旗。岡仔衝前，Lorre殿後。岡仔手上帶著鐵蓮花，用力向前打去，類似拳風的AP把對方的M隊女隊員打趴在地上，同隊的T隊男隊員見狀，轉身拿出兩個摺扇，打開扇子兩手一揮，岡仔立即跳往高空，成功避開了攻擊。在岡仔身後的Lorre向前轉動三叉戟吹箭，沒有受到一點傷害。





「T隊嗰叫Balan，冇乜存在感，唔使特別記佢！」鹿仔介紹，雲耳木耳把一圈廢紙拋向鹿仔，似乎Balan就是她的朋友。鹿仔笑笑繼續說：「Lorre嘅武器唔爛唔係因為支吹箭勁，係因為佢用AP保護咗支武器，多多學習Lorre，個人覺得除咗浩政，佢都係非常值得落注嘅必勝盤，而家多咗直播，多咗人投注，我都落咗唔小錢係佢身上！哎呀！」

「成日掛住賭！」這次輪到Kiki用廢紙掉他