[微血腥] 覺能之戰 (逢二、四更新): 敵或友篇第二十五章：屍體的秘密 (四)

亞豪的喪禮數日後便在主研究所的水底禮堂舉行，一百八十度落地玻璃窗外是水底的景象，加上位置離水底不算太遠，有些陽光射向水面的餘光，風景格外漂亮。可是，此禮堂的主要用途是為隊員舉辦喪禮，那令人傷感的氣氛加上水的藍色令整件事多了一層憂鬱。

當Kiki站在台上開始細說亞豪的生平，再道出她對哥哥的思念，在場的人無一不感哀傷。其後與亞豪共事的隊員也續一上台分享與亞豪相處的時刻，雖然大部分也是哭聲居多，但也不乏一點點的笑聲，可見亞豪經常帶給人歡樂。喪禮完結前，Buck也有對場問候Kiki和給她帛金，看來Buck比珈純好百倍，至少看起來沒有特別歧視零隊。

「喂！喂！亞旻！」澈硯拍拍梓旻低聲道：「走喇！」

「好…好……」梓旻跟著澈硯悄悄離開，走出了走廊的時候，梓旻想到亞豪的不明死因，便問澈硯：「你可唔可以查到佢點死？」

「應該可以，用研究員身份就得！話說，我地得一個鐘時間，一個鐘之後管理員就會開啟自動監視系統，一有人係走廊走動就會響警報！」澈硯舉舉研究員證件，再拍在拍卡位上打開了一道門





「濫用職權！」梓旻笑言

「係善用職權！」澈硯笑回

他們之後再通過了一些樓梯和幾道門，主研究所活像迷宮一樣，梓旻相當有信心憑自己是走不出主研究所。最後，他們走到一條漆黑的走廊，澈硯看著房間門上的號碼，不斷重複：「二十八！二十八！搵到！」

房門號碼下有一個拍卡的位置，澈硯拍下卡，房門突然變成透明玻璃，他們看到在房內在一個特大籠牢，籠牢背後的鄭子謙正坐在書桌上望向門。房門的拍卡位置下出現了「YES？NO？」的字眼，澈硯按了「YES」，門瞬間變回黑色再打開。

他們進去後與鄭子謙隔著籠牢對望了一會，鄭子謙問：「你地係……之前……」





「我係亞旻，佢係澈硯，我地想問關於『獨』嘅嘢！」梓旻爭取時間問：「你知唔知吳鈞悅係邊個？同一角有咩關係？」

「吳鈞悅？唔知喎！未聽過！」鄭子謙一臉無知的回

「咁一角嘅嘢你知幾多？」澈硯接著問

「會解救我地嘅人，唔同『獨』合作，就咁多。」鄭子謙回答

「人？點解用人嚟叫怪物？」梓旻問





「佢人形同有智慧，就只係咁……我地冇人確定佢係過度使用AP變成咁，定係佢本身係隻怪物。不過，怪物都係人變，冇分別。」鄭子謙說了一件令二人驚訝的事

「怪物係人變？即係點？」澈硯興奮的問

「你地殺咗咁多怪物都唔知？當一個人過度用AP，你地叫嘅A Mark就會擴大，蠶食你地嘅身體，最後會包圍你全身，你地就會變成怪物！你地唔係吖？一直殺緊人都唔知？」鄭子謙感到非常意外

「我……我地唔知……」梓旻過度吃驚而發愣起來

「原來用盡AP係咁解……咁知唔知點避免？」澈硯問

「以我所知，唔好試自己底線……同定期抽血……真係唔知？」鄭子謙眼神充滿疑問

「每次啲怪物都化灰又冇原貌睇，點知？」梓旻反問

「怪物係由體內抽出核，化咗灰，再破壞核先會冇屍體。如果冇抽出就咁破壞核，只要等一段時間就會變返人嘅屍體。」鄭子謙解釋，二人也說不出話來