[微血腥] 覺能之戰 (逢二、四更新): 敵或友篇第二十三章：賽前準備
「點解你唔幫佢？話我知點解你唔幫佢？」梓旻又再次發起「預知夢」，他夢到自己在某人的辦公室內破口大罵某個人。這「預知夢」比以前不同的是他這次非常清晰地知道自己在發夢，以及這個夢並不如之前般完整，這辦公室只有一半是可見的，夢中被他痛的人、其聲音及所站的那半個辦公室都是漆黑一片。
「我知你可以救到佢！點解唔救？」夢內的梓旻似乎聽到一些難以信服的解釋，開始痛感：「我唔信你！佢地個個都話你最熟識AP嘅嘢！你仲要係部隊最後王牌級人馬！你一定救到……你明明一定救到……」
夢內的梓旻跪在地下痛哭，似乎那個某人打算伸手安慰，他拍走那人的手，吞口水道：「佢係我最好朋友！最好拍擋！既然救唔到佢，我唔會俾佢未婚妻出事！」
夢內的梓旻打起精神擦擦眼淚，說：「我知你打算利用樺幫你做嘢！我知你利用緊佢想復仇的心幫你做啲危險嘅嘢！立即叫停佢！」
對方似乎不願放開樺，夢內的梓旻走近對方說：「交換！你唔係一直要我加入你個隊㗎咩？我同樺交換！只要你唔叫佢做嘢！我就加入你個隊！」
沉默了一段時間，對方似乎作出讓步，夢內的梓旻說：「好！我接受！」
***
「亞旻！搞咩？全日渾渾噩噩咁嘅？」澈硯在工作時間找正為隊伍間速遞工作的梓旻
「冇……冇……」梓旻本來在沉思昨日的夢，被突然出現的澈硯嚇一跳
「又因為……夢？」澈硯問
「冇，邊有咁多夢。」梓旻不太想讓澈硯知他的夢，始終有關樺的部份，他知道也沒有好處
「明顯有關喎！」澈硯不信道
「冇，你跟嚟做咩？聽日先復工唔係咩？」梓旻嘗試轉移話題
「冇，樺話今晚去詡到傾覺力戰啲嘢喎！」澈硯想起來意
「點解你知先過我？仲有，點解唔用手錶手機？」梓旻有點不開心
「因為我想搵你傾偈囉！好悶！」
「你睇唔睇到做緊嘢？」
「梓旻！」許久沒見的尚華在P隊辦公室外向梓旻揮手
「尚華！好耐冇見！」梓旻非常高興
「好耐冇見！我地好耐冇一齊練嘢！」尚華開朗道
「約個時間咁一齊？你應該都攞咗武器啦？」梓旻有點興奮
「攞咗，P隊嘅武器特別悶，全部都係拳套。」尚華拍拍掛在腰旁的拳套
「我……係個鎚仔，O隊武器係特別啲。」梓旻把文件暫時飄浮，拍拍掛在腰旁的鎚子
「明嘅！呢位……一定係澈硯！好高興認識你！」尚華友善的伸出手
「我都係，你一定係Buck個細仔！」澈硯有點不爽的握尚華的手，他因梓旻對尚華的反應而不快
「咩話？」梓旻驚訝望向澈硯
「呀……係……好少人知，唔好講俾太多人知！」尚華有點尷尬
「居然？」梓旻驚訝望向尚華
「的確唔多人知你仲要係岡仔同Crystal 細佬。」澈硯明顯故意說
「吓？真㗎？」梓旻雖對尚華的家人身份感到驚訝，但對澈硯的不禮貌更反感：「你係咪特登？明知人地唔想咁多人知！」
「你都好想知㗎！」澈硯笑言
「希望你地唔好講出去，爸爸唔想我靠佢。」尚華有點為難，梓旻有點不好意思
「唔止，唔想認添啦！未同佢反面得你一個咋！」澈硯似乎不願停下
「喂！」梓旻想喝止澈硯
「唔緊要，佢都講得啱嘅……」尚華尷尬的笑言：「我地再約啦！」
尚華急急離開後，梓旻再怒斥澈硯：「你……真係要學下禮貌。」
「佢老豆對我有禮貌，我咪對佢有囉！」澈硯不忿的說
「咁佢老豆唔關佢事吖！」梓旻怒言
「聽聞人地老豆唔鍾意你喎！」澈硯反駁
「係唔鍾意浩政！人地冇講明唔like我！而且人地個女都暗戀浩政吖！」梓旻放下文件到P隊辦公室時，不忙看清辦公室內沒人才細聲說
「所以兩父女關係咁差囉！」澈硯似未不怕被Buck發現般大聲說，這令梓旻更生氣
「你理得人唧！你嚟只係提我今晚去詡度咋？提完喇！走啦！」梓旻生氣的趕走澈硯
「但……」澈硯知這次真的惹梓旻生氣了，有點害怕
「唔歡迎你！走！」梓旻決絕的道，澈硯也只好乖乖離去
下班後，梓旻直接回到宿舍，由於詡已成為正式隊員，他已搬到與梓旻同一樓層。梓旻扣門後，打開門的竟然是美慧，梓旻因沒有預計美慧會在場而嚇了一跳。他步進房內看見全部人也已到達，一座零食山在桌上，梓旻也不客氣的把開雪櫃食了一罐汽水喝。
「點解美慧會係度？」詡坐在床上吃著芝士薯圈，梓旻立即被吸引過去
「因為你地冇人夠我有腦！」美慧沾沾自喜的
「你當我死㗎？」澈硯吃著花生道，坐在他身邊的樺輕輕提醒他不要弄髒別人的房間
「你個腦都唔係以正常方式運作，同死咗冇分別！」美慧一如既往的嘴不留人
「好喇！一人少句啦！」樺忍不住出口，但不果
「啱喇！有樺做你女朋友，可以教返你點做返個正常人！」美慧仍不放過貶低澈硯的機會
「你根本係太得閒先係度！」澈硯居然被挑釁了
「我得閒？支援組準備覺力際都好多嘢做㗎！處理完場地租借，又要set 攝影機，又要處理航拍機器維修同遙控訓練，又要處理對外宣傳策略，請司儀請翻譯，仲有商場合資格賭局申請。今年仲要搞埋電視直播服務！仲有平時啲出動警報呢？唔係由我地監察、聯絡同處理，憑空爆出嚟㗎？」美慧突然認真，似乎澈硯刺中了美慧的痛處，二人怒目相向，而詡興致勃勃的看著他們吵架
「等等先！電視直播服務？唔係只向樓下商場直播咩？」梓旻不敢相信居然會向大眾轉播覺力賽
「下年開始就會開始對外直播，同電視台合作，打算推廣成大眾節目。」美慧仍瞪著澈硯
「吓？咁咪仲容易俾人知我地弱點？」梓旻說
「為賺錢嘛！」美慧喝下菊花茶
「咁同用條命去換錢有咩分別？」詡問
「其實你地一直用緊條命去換錢㗎啦……」澈硯插話
「點用條命去換錢？」楓無知的問，這問題令全場沉默數秒
「我覺得部隊應該面試環節增加智力測驗。」澈硯提議，被樺大力拍頭
「我同意！」詡興奮舉手
「值得研究！」美慧同意，楓似乎未知他們在說什麼
「唔反對。我地都係入正題啦！」梓旻提醒各人今天本來是為覺力戰的安排而聚集
「好！正題係，覺力戰如何合作，大家有咩想法？」詡問
「好似上次咁！」楓天真的道
「可愛嘅楓BB，一來你地冇咗我上陣，已經唔可以好似上次咁！兩來，今次場地唔同，將要係實地訓練，地點公佈咗係西北部沼澤公園！三嚟，今次要用到武器，你地知唔知大家嘅武器係咩同有咩用？」美慧像哄寶寶的說，詡逗趣的扮美慧的口型，澈硯被他逗笑，然後又被拍頭了
「唔知喎！」楓無知的答
「所以我地而家就要分享咗情報先！」美慧說
「我講先，我發掘咗更多自己能力嘅可能性，只是可以輕微治療同加強你地體能，仲可以用毒。毒輕則五感變慢同會興奮，重則感覺慢到好似停頓咗咁。」樺斯文的介紹自己的能力
「好似吸咗毒咁。」詡想像
「吸毒？」楓無知的問，但被大家忽略了
「差唔多，所以覺力賽我唔會用太重份量，始終唔可以令先鋒隊永久傷害。而我嘅武器係針同發射器，瞄準敵人後發射，唔需要插中目標，係目標附近就會自動打開後尾位置，噴出毒物。壞處係分唔到敵我，你地都要小心，以及有數量限制，不過我會帶大量針係身。」樺把她的武器放在桌上，發射器的外貌活像一支軍綠色的狙擊槍，另外有一個黑色長腰包內放滿針，針似銀色為主，外形酷似一個大型螺絲釘
「似乎用嚟埋伏敵人較合適。下個！」美慧道，詡反白眼表示看不慣美慧主持大局
「我！拳套。」楓拿出一雙拳套
「冇喇？」詡問
「講下有咩功能？」樺嘗試引導楓
「呀……保護雙手，同出AP拳風唔會爆咁？」楓簡介
「喂！你呢對係基本通用版P隊拳套嚟咋喎！」澈硯拿起拳套說
「吓？但佢話係我自用喎！」楓驚訝的道
「你自用嘅基本通用版P隊拳套囉……你冇要求加嘢？佢冇為你度身訂造？呢對拳套完全唔係度身訂造㗎喎……」澈硯把拳套翻來覆去的查看
「冇，我話平時拳套都得就俾咗我。」楓回答
「咁普通？你點過畢業試㗎？」詡不解為何楓可以接受這武器
「未過。」楓天真的回答
「未過？但你唔係升咗做隊員喇咩？」梓旻驚訝的問
「係呀！佢話得好少數人過唔到，但又未差到要踢我走，所以名義上升咗我，但宿舍仍然係見習樓層，好似Dali一樣。」楓解釋
「Dali都係？唔怪之得佢明明係正式隊員都住係見習樓層啦！」澈硯恍然大悟的道
「居然咁都俾過。」詡搖頭皺眉
「好喇！下個！」美慧大聲道
「我嘅係加咗銀色物料嘅拳套，打落人到會硬啲。」詡拿出他的拳套，與楓的差不多，只是設計上加添的銀色物料的圖案，銀色物料雖輕微鼓起但不見得有增加攻擊力
「佢咪同我一樣？」楓指著詡的拳套
「唔一樣，起碼唔係通用版，仲加重咗少少攻擊力，仲靚少少添！」詡輕輕撫摸自己的拳套，仿似很寶貝它一樣
「嚴格嚟講係有分別，但唔嚴格嚟講冇乜分別。啲銀咁薄，有咩用？」澈硯好像有說廢話一樣，讓美慧反了白眼
「總之有用！」詡咬牙切齒的道