[微血腥] 覺能之戰 (逢二、四更新): 對角篇第十四章: 搜救行動 (四)

Baldwin、Fay及阮超都相繼坐下休息。鹿仔、梓旻及詡三人則走近玻璃圓柱，原來玻璃圓柱是一個大型顯示屏，走馬燈式顯示不同任務資訊及定點位置。鹿仔突然開口以極細聲音道：「Lorre同Buck都係第一屆嘅人，兩個都合作得幾多，佢本來應該升上隊長位，但佢個人比較怕麻煩，仲要講嘢唔客氣，一口就拒絕，上面都冇佢符。不過佢性格唔錯，工作相處係ok嘅。」

「佢似乎係公事公辦嘅人，我跟佢都放心……話時話，T Bike唔係一人一架？」詡問

「每一架運輸機得十二架T Bike，每小隊分得三架，一定分唔曬。同埋，都要同你地講聲，T Bike本身係疏散用，每架加埋司機都載得四個人，所以當足夠三個避難者上咗車，你地唔係做揸嘅就要留係現場保護人群。如情況危急，你地要自己用腳離開現場。」鹿仔語帶嚴肅。

突然，詡的手錶在閃動，他看看手錶，皺皺眉頭，轉身背著他們，不知在做什麼。

鹿仔側身面向玻璃圓柱的地圖，再在沿海的某位置打圈，再在不遠處的數個三角形圖案上打圈：「好似鼓鼓爸爸咁講，百核係沿海位置，而你地會係約一公里外有個露營勝地疏散人群。一旦發現百核走近露營營地半公里範圍內，你地就唔可以再停係原地或慢慢移動，要立即而且快速帶人群反方向疏散。如愈嚟愈迫近你地，T Bike載完最後一群避難者，就有可能趕唔到返轉頭救你地！」





梓旻有點不安：「咁即係…放棄我地？」

鹿仔搖搖頭：「與期叫放棄你地，不如講救唔到你地。首先係未必趕得到，其次係主攻擊隊理應已經趕上。一般隊員會建議匿埋逃走或者匯合主攻擊隊，但你地冇武器，幫唔到手之餘，仲陀手掕腳。有得走就走快啲。就算係百核嘅分身都好難搞。」

詡正經嚴肅的問：「知唔知今次嘅百核係有極大隻？」

梓旻瞄了一下詡，他從未見過詡那麼認真的樣子，或者是他們認識的日子尚淺。究竟是他面對工作是那麼認真，還是剛才手錶有什麼讓他認真起來呢？

「問得好！」鹿仔稱讚道。接著他帶著梓旻二人圍著圓柱走了數步，似乎在查找某種資訊，然後在一大串數字前停下道：「兩隻細，明顯細小，可能係紅核初期進化。有一隻……非常大，呢個數已經稱得上巨大，好少會達到呢個體積！好彩你問一問，我諗我都係提下其他救援隊好啲！」





正當鹿仔打算離開，詡突然叫停他：「等等！我可唔可以同梓旻一組？我地覺力戰同組，大家知點合作！」

鹿仔思考了數秒答：「好啦！你同Lorre同Baldwin講聲啦！」

鹿仔離開後，梓旻不解問：「點解突然想一組？」

詡說出了一個可理解的想法：「你可以自己飛，或帶我飛，同你一組我有好處！」