[微血腥] 覺能之戰 (逢二、四更新): 覺力賽篇第十二章: 第一場領地爭奪戰 (二)

「你哋係D1區，請到D1區報到。」職員道

等待區的休息室與一般體育館的休息室相似，但設施明顯嶄新先進，可見用了不少錢裝修。大型的置物櫃、軟硬適中的沙發、新型按摩椅、牆般大的電視及著名品牌的音響設備，美中不足的是他們待半小時就離開，根本沒太多機會用，亦緊張得沒心去享受設施。

「究竟D3係邊隊？幾時知？」楓問

「螢幕顯示仲有一隊未報到，我諗到齊就顯示。」樺指著電視

「吓，仲未到？咁有自信？仲有半個鐘開始，心理準備都要掛？」梓旻到休息室的時候已經有點緊張





「咁可能人哋覺得我哋太緊張。」詡說

「邊有人好似你咁開打前玩按摩椅咁輕鬆㗎？」美慧盯著他

「都話你太緊張！」詡停下了按摩椅

「好喇！唔好開場前嘈，練下AP好過啦！」樺大聲制止他們再爭吵下去

眾人專心做AP訓練，約十五分鐘後，突然出現比賽的聲效，螢幕突然轉畫面，出現了比賽場的平面圖，及一些資訊，如觀眾人數、場地溫度、比賽人數及隊伍位置等。





「D3係Kristy一組！」楓大叫

「Yes!」詡隨著大叫，再說：「至少唔係啲死唔斷氣嘅隊伍。」

「但唔好輕敵！」梓旻提醒，他愈來愈緊張，沒有因知道對Kristy 一組而感高興

「假如⋯我哋真係⋯好早完咗⋯咁應該幫邊隊？」樺問

「緊係幫手打尚華個隊，如果我哋晉到級，我都唔想有機會對佢哋！」詡回





「佢哋喺⋯A⋯3⋯」楓望向電視

「唔使記位置啦，假如佢哋同我哋一樣打距離近個隊，咁就應該會係A2搵到佢，如果唔係，都唔會喺原本位置啦！」美慧說

「你又啱喎！」楓恍然大悟般

「好喇！我諗都差唔多，帶好錶準備出去，梓旻準備升起我！」美慧的一句，眾人立即檢查自己的裝備

在倒數十分鐘時，工作人員把休息室的門打開，催促他們進入會場。梓旻立即用AP包圍美慧的腰部，眾人緩慢地移動至會場內。進入會場的一刻，梓旻的五感頓時變得敏感，觀眾的掌聲及歡呼聲四起，攝錄機對焦及移動的聲音也吸引到梓旻的注意，參賽者進場的音樂聲在梓旻耳裡變成了扭曲的音調。他的呼吸聲愈來愈大，他從呼吸中感受到空氣中的濕度，感受到他漸漸泛紅的臉，愈來愈響的心跳聲，隨之而來的是一陣頭暈，再來是一種噁心的感覺從胃部向食道延伸。

「梓旻！梓旻！冇事吖嘛？」美慧在梓旻面不斷揮手

「冇⋯冇⋯我⋯有啲想嘔嗻⋯」梓旻一身冷汗

「果然企喺賽場嘅感覺係唔同啲，雖然觀眾席離呢度頗遠，但都聽到好大聲歡呼聲。」詡看起來一點也不緊張，像來玩一般





「梓旻，冇事嘛？啱啱樺嚇到呆咗。」楓走過來問。

梓旻望向樺，她一臉蒼白的，他完全明白她的感受：「我⋯冇事⋯」

「詡，倒數就開始喇！我哋要準備跑，愈近佢哋區域開戰愈好！」美慧指向D3

「喂！你哋仲唔嚟standby?」楓在揮手，她已經走得遠遠

「點解佢可以咁輕鬆？」詡側側頭，然後就跑走：「嚟喇！」

對梓旻而言，他們三人也異常輕鬆，就像這不是第一次出戰般，唯一較正常的就是他身邊的樺。面色蒼白的樺有點顫抖地安慰梓旻：「梓旻守住，一陣我加強完佢哋，就會陪你守住！」